سوڭعى مالىمەت بويىنشا، قازاقستاندا كوروناۆيرۋس جۇقتىرعاندار سانى 2047 ادامعا جەتتى. 505 ادام جازىلىپ شىعىپ، 19 ادام قايتىس بولدى. ەلدە توتەنشە جاعداي جاريالانىپ، كارانتين مەرزىمى 15-ساۋىردەن، 30-ساۋىرگە دەيىن ۇزارتىلعان بولاتىن. سونىمەن، كارانتين قاشان اياقتالادى؟ قازاقستاندا كوروناۆيرۋس جۇقتىرعانداردىڭ سانى شارىقتاۋ شەگىنە (پيك) جەتتى مە؟ ءبىز ەل باسشىلارىنىڭ اقپاراتتارىنا شولۋ جاسادىق.

توقاەۆ: شارىقتاۋ شەگىنە جەتكەن جوقپىز

19-ءساۋىر كۇنى پرەزيدەنت توقاەۆ Twitter جەلىسىندەگى پاراقشاسىندا ۆيرۋس جۇتىرعاندار سانى وسكەنمەن، ءالى شارىقتاۋ شەگىنە جەتكەن جوقپىز, دەپ جازدى.

پرەزيدەنتتىڭ ءباسپاسوز حاتشىسى بەرىك ءۋالي كەلەسى اپتادا ق.توقاەۆتىڭ كوروناۆيرۋسقا بايلانىستى تەلەۆيزيالىق ۇندەۋى جاريالاناتىنىن، وندا ەلدەگە توتەنشە جاعداي رەجيمىنىڭ ۇزارتىلۋى ءسوز بولاتىنىن ايتتى.

ال، قر دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋس ينفەكتسياسىنىڭ تارالۋى مامىردا دا جالعاساتىنىن ايتتى.

«اۋرۋ جۇقتىرعانداردىڭ كوبەيۋى، اسقىنۋى (شارىقتاۋ شەگى) جانە ازايۋىن ءۇش اي بويى - ناۋرىز، ءساۋىر جانە مامىردا قاداعالايمىز. ءبىز مامىردان كەيىن ەشتەڭە بولمايدى دەپ ايتپايمىز. ينفەكتسيا بولادى، قوعامدا تارالادى. ءبىزدىڭ مىندەت - وسىمەن بىرگە ءومىر ءسۇرىپ ۇيرەنۋ. ينفەكتسيا - وتە جۇقپالى. ادامداردىڭ كەي ساناتىن اۋىر جاعدايلارعا اكەپ سوعۋى مۇمكىن. سوندىقتان ەپيدەمياعا توتەپ بەرىپ، تومەندەتىپ العان سوڭ، ۇنەمى كارانتيندە وتىرماۋ ءۇشىن مۇنىمەن ءومىر ءسۇرىپ ۇيرەنۋ كەرەك.

سوندىقتان ءبىز مامىر ايىنىڭ سوڭىنا دەيىن شامامەن 3500 جاعداي بولادى دەپ ويلايمىز. سودان كەيىن باسقا ساندى تىركەي باستايمىز، قازىر ناقتى بىردەڭە ايتۋ قيىن. جاپونيادا، سينگاپۋردە ەپيدەميا قايتا باستالدى. بولجام جاساۋ قيىن، قازاقستاندا ناقتى بىلاي بولادى دەپ بولجاي المايمىز», - دەدى ءبىرتانوۆ.

ءبىرتانوۆ: شارىقتاۋ شەگىنە جەتتىك

سونىمەن قاتار ول، قازاقستان كوروناۆيرۋس ەپيدەمياسىنىڭ ەڭ جوعارعى ساتىسىندا تۇرعانىن مالىمدەدى.

ءمينيستردىڭ سوزىنشە، ەلىمىزدە پاتسيەنتتەردىڭ ءوسۋ قارقىنى ورتاشا ەسەپپەن  8%-دى قۇرايدى. الايدا، بۇل ءالى جاعدايدىڭ تومەندەگەنىن نەمەسە تۇراقتانعانىن كورسەتەتىن كورسەتكىش ەمەس، دەيدى مينيستر.

«ءبىزدىڭ مىندەتىمىز - بەس پايىزدان، سودان كەيىن ءبىر پايىزدان تومەن ءتۇسۋ. سوندا ءبىز ىندەت ازايدى دەپ ايتا الامىز. جاڭا ناۋقاستاردىڭ سانى اۋرۋحانالاردان شىعارىلعان ادامدار سانىنان از بولۋى كەرەك.ازىرگە ءبىز شارىقتاۋ شەگىندە تۇرمىز» ،- دەدى ءبىرتانوۆ.

وڭىرلەردە شارىقتاۋ شەگى ەندى باستالعان

ونىڭ ايتۋىنشا، سوڭعى ءبىر اپتادا نۇر-سۇلتان مەن الماتىدا ءوسىم 5-تەن 15 پايىزعا دەيىن ءوستى. ال، قازاقستاننىڭ باسقا وڭىرلەرىندە كوروناۆيرۋستىڭ شارىقتاۋ شەگى ەندى باستالعان.

ال، كەشە ۇكىمەت وتىرىسىندا پرەمەر-مينيستر اسقار مامين كارانتيندىك رەجيمدى بىرتىندەپ جەڭىلدەتۋ شارالارى قابىلداناتىنىن مالىمدەدى.

«20 ساۋىردەن باستاپ، نۇر-سۇلتان مەن الماتى قالالارىندا كارانتيندىك رەجيم جەڭىلدەتىلدى. سانيتارلىق نورمالاردى قاتاڭ ساقتاي وتىرىپ، ەكونوميكانىڭ بىرقاتار سالاسىنداعى كاسىپورىندار جۇمىسىن باستادى. سونىڭ ىشىندە قۇرىلىس، ونەركاسىپ جانە قىزمەت كورسەتۋ سالالارىنداعى كاسىپورىندار. ەپيدەميولوگيالىق جاعدايدى ەسكەرە وتىرىپ، كارانتيندىك رەجيمگە وزگەرىستەر ەنگىزۋ جانە بىرتىندەپ جەڭىلدەتۋ تۋرالى ءتيىستى شەشىم قابىلداناتىن بولادى. باسقا دا كاسىپورىندار مەن بيزنەس سۋبەكتىلەرىنە جۇمىسىن جالعاستىرۋعا رۇقسات بەرىلەتىن بولادى. مۇنداي جۇمىس ەلىمىزدىڭ باسقا دا وڭىرلەرىندە جۇرگىزىلەدى. دەگەنمەن، بۇل سانيتارلىق-ەپيدەميولوگيالىق قاۋىپسىزدىك قاتاڭ ساقتالعان جاعدايدا عانا مۇمكىن بولادى»،- دەدى ۇكىمەت باسشىسى.

Abai.kz