«نەمىس-فاشيستەرىن جەڭگەنىمىزدىڭ 75 جىلدىق تورقالى تويىن دۇنيە ءبۇلىنىپ كەتسە دە وتكىزبەي قويمايمىن» دەپ كۇشەنگەن كورشىمىزدىڭ پرەزيدەنتى ءپۋتيننىڭ بۇگىندە قاباعىنان قار جاۋىپ، كىرپىگىنە مۇز قاتىپ جۇرگەن جايى بار. الايدا قاي ديكتاتور ساليقالى پكىرىگە توقتاپ، قيسىنعا باعىنۋشى ەدى، سول قىرسىقتىعىمەن ول تويدى ءبىرجولاتا وتكىزبەۋ دەگەندى جىلى جاۋىپ قويىپ، كەيىنگى ءبىر لايىقتى كەزەڭگە قالدىردى. ونى ەندى الدىمەن قۇداي، ودان سوڭ مىنا كورونوۆيرۋس دەگەن ۇلكەن ىندەت بىلەدى.

ءبىز بولساق ءوز پرەزيدەنتىمىز قاسىم-جومارت توقاەۆتىڭ شەشىمىمەن اتالعان مەرەكەدەن بيىل ءبىرجولاتا باس تارتتىق.

الايدا، ءپۋتيننىڭ جەڭىس پارادىن وتكىزە الماعاندىعىنا قابىرعاسى قايىسا قايعىرىپ، قايتسەك وسى مەرەكەنى اتاپ وتەمىز دەپ جانتالاسىپ جۇرگەندەر ءبىزدىڭ ەلدە دە جەتىپ ارتىلاتىن كورىنەدى. بۇل جەردە ءبىزدىڭ قوستانايلىقتار الدىنا جان سالماي تۇر.

اسىرەسە، وبلىس ورتالىعىنداعى «قوستاناي قالاسىنداعى مەكتەپ-بالا باقشا گيمنازيا» مەملەكەتتىك مەكەمەسى دەگەن دارداي اتاعى بار وقۋ-تاربيە ورنى وزدەرىنشە «كەرەمەت جاڭالىق» اشىپتى. وسى بالا باقشانىڭ ادىسكەرى قازىر كارانتينگە بايلانىستى ۇيلەرىندە وتىرعان بالالارعا تىنىشتىق بەرمەي، ولاردىڭ اتا-انالارىنا «وشپەس پولك» (بەسسمەرتنىي پولك) دەگەن رەسەيدىڭ باستاماسىن وزدەرىنشە اتاپ وتۋگە ۇسىنىس جاساپتى. ءبىر عاجابى، سول اتا-انالار مۇنى جۇرەگى جارىلارداي بولىپ قۋانا قارسى الىپتى.

الگى ادىسكەردىڭ ايتۋىنا قاراعاندا، مۇنداعى تاربيەلەنىپ جاتقان 245 بالانىڭ اتا-اناسى مۇنداي «اسا يگىلىكتى دە، اسا پاتريوتتىق شارانى» شىن نيەتىمەن دۇركىرەي قۋاتتاپتى. ءبىر دەمالىس كۇنىندە عانا 42 فوتوسۋرەت سالىپ جىبەرىپتى. تەك، ءبىر وكىنىشتىسى، بۇل دەمالىس كۇندەرى تىم ازدىق ەتكەن كورىنەدى. ال ەگەر ول ءبىر اپتاعا سوزىلعاندا الگىندەي سۋرەتتەر ەڭ كەمىندە ەكى ەسەگە كوبەيەتىندىگىنە سەنىمدى. بۇلاردان ەندى تاماشا ءبىر روليكتەر جاساۋعا بەل بۋىپ وتىرعان كورىنەدى. سوسىن ءسىرا، 9 مامىر كۇنى كوشەگە شىعۋعا باتىلى جەتپەسە دە، تەلەديدارادان كورسەتىپ، رەسەي الدىنداعى پاتريوتتىق پارىزى وتەلىپ، ءبىر جەڭىلدەپ قالاتىن سەكىلدى.

مىنەكەي، تاۋەلسىزدىك العانىمىزعا تۋرا وتىز جىل بولسا دا وزدەرىن قازاقستاننىڭ ەمەس، رەسەيدىڭ ازاماتى ەسەبىندە سەزىنەتىندەر ەلىمىزدىڭ زاڭدارىنا پىسقىرىپ تا قاراماستان جەڭىستىڭ 75 جىلدىعىن وزدەرىنشە اتاپ وتۋگە بەل بۋىپ وتىر. بالا باقشانىڭ اتى-جونىنە قاراعاندا ول قالالىق اكىمدىككە قارايتىندىعى بايقالادى. ال ولاردىڭ تاراپىنان «وۋ، بۇلارىڭ قالاي؟ ەل پرەزيدەنتىنىڭ شەشىمى سىزدەرگە ەش قاتىسى جوق پا؟ الدە سىزدەر رەسەيدىڭ زاڭىمەن ءومىر ءسۇرىپ وترىسىزدار ما؟» دەپ تە ايتۋعا جۇرەكتەرى داۋالاماعانعا قاراعاندا، جوعارى جاقتان دا ەش ءۇن شىعا قويماس.

نەسى بار، ەندى وزگەنى ايتپاعاندا، وسىناۋ ءشوۆينيزمنىڭ ءيسى مۇڭكىگەن باستاماعا جاس سابيلەردى ارالاستىرۋعا قاراعاندا ۇلتتىق يدەولوگيا دەگەندى الدەقاشان ۇمىتقان سەكىلدىمىز. جانە دە ءبىر وكىنىشىتىسى، بۇرىن: «سپاسيبو دەدۋ، زا پوبەدۋ!» دەپ ۇرانداتساق، ەندى ءتىلى شىعا قويماعان نارەستەلەرگە: «سپاسيبو پرادەدۋ، زا پوبەدۋ» دەپ بىلدىرلاتاتىن كورىنەمىز. ودان كەيىن: «سپاسيبو پراپراردەدۋ» دەگەندى قوسامىز. ال ورىستاردا «پرا» دەگەن ءسوزدىڭ شەگى بولمايدى. ياعني بۇل ۇراندا دا ماڭگىلىك شىعار. اسىرەسە، قازاقستاندا.

جايبەرگەن بولاتوۆ

Abai.kz