"پاترۋل" سەريالىن B.A.S production پروديۋسەرلىك ورتالىعى "نەزاۆيسيمىي تەلەۆيزيوننىي كانال" كومپانياسىنىڭ تاپسىرىسىمەن تۇسىرگەن. سەريال قازاقستاندىق NTK تەلەارناسىندا كورسەتىلگەن.

ورىس تىلىندە تۇسىرىلگەن سەريال پوليتسيادا ىستەيتىن سەرىك پەن بەرىك تۋرالى. سەريالدىڭ ءبىر ەپيزودىندا ولار ءۇستى-باسى كىر، قازاقشا دا، ورىسشا دا سويلەمەيتىن ءبىر ادامدى تۇتقىندايدى. وعان اۆتوكولىك جۋعىزىپ، پوليتسيا بولىمشەسىندەگى كەڭسەنى سىرلاتادى. تۇتقىندالعان ادامنىڭ تاجىكستان ەلشىسى ەكەنى كەيىن بەلگىلى بولادى. ول ەلشىلىككە بارا جاتىپ اداسىپ كەتكەن...

تاجىكستان بيلىگى قازاقستاننىڭ سىرتقى ىستەر مينيسترلىگىنەن سەريالدى تۇسىرگەن B.A.S production پروديۋسەرلىك ورتالىعى مەن NTK تەلەارناسىنىڭ ارەكەتىنە "قۇقىقتىڭ باعا بەرىپ", "تەكسەرۋ جۇرگىزۋىن" تالاپ ەتتى. دۋشانبە بۇل سەريالداعى كورىنىستەر "ۇلتارالىق ارازدىق تۋعىزىپ، تاجىكستاندى جامان قىرىنان كورسەتەدى" دەپ ەسەپتەيدى.

2016 جىلى تاجىكستان رەسەيلىك "كومسومولسكايا پراۆدا" گازەتىن ەلدە تاراتقىزباي قويدى. گازەت ءجۋرناليسى تاجىكستان تۇرعىندارىن "ناشا Russia" سيتكومىنداعى راۆشان مەن جامشۋت ەسىمدى ميگرانتتارعا تەڭەگەن. دۋشانبە مۇنداي ماقالا "تاجىك حالقىنىڭ ار-نامىسىنا تيەدى" دەپ ەسەپتەدى.

كەزىندە قازاقستان ساشا بارون كوەننىڭ "بورات" ءفيلمىن "حالىقتى مازاق ەتتى" دەپ قابىلداعان. الايدا، سول كەزدەگى ەل پرەزيدەنتى نۇرسۇلتان نازارباەۆ ونى ءازىل دەپ قابىلداۋعا شاقىرىپ، قازاقستاننىڭ سول كەزدەگى سىرتقى ىستەر ءمينيسترى ەرجان قازىحانوۆ "بورات" ءفيلمىنىڭ ارقاسىندا ەلگە تۋريستەر كوپ كەلە باستادى دەگەن. دەگەنمەن ساشا بارون كوەننىڭ "ديكتاتور" ءفيلمىن قازاقستان دا، تاجىكستان دا كورسەتۋگە تىيىم سالعان.

Abai.kz