CDC مەكەمەسىنىڭ ورتالىق ازيا ايماعىنداعى ديرەكتورى دەنيەل سينگەر 6 مامىردا تەلەفون ارقىلى بريفينگ وتكىزىپ، باق وكىلدەرىنىڭ ساۋالدارىنا جاۋاپ بەردى. ول ۆيرۋس الماتىداعى زەرتحانادان تارالۋى مۇمكىن ەمەس دەدى. بۇنىڭ الدىندا قىتايداعى سايتتاردىڭ ءبىرى "كوروناۆيرۋس قازاقستانداعى "امەريكالىق زەرتحانادا" دايىندالىپ، قىتاي اۋماعىنا تاراتقان" دەگەن مالىمەت جاريالاعان.

"ۆيرۋس دايىنداۋ ءۇشىن وزىق تەحنولوگيا مەن بيوقاۋىپسىزدىگى ءتورتىنشى دەڭگەيگە جاتاتىن زەرتحانا بولۋى كەرەك. مەنىڭ بىلۋىمشە، الماتىداعى زەرتحانانىڭ بيوقاۋىپسىزدىگى ۇشىنگى دەڭگەيگە جاتادى، سول سەبەپتى مەن مۇندا مۇنداي ۆيرۋس جاسادى دەگەنگە سەنبەيمىن. مۇنى اقىلعا قونىمدى بولجام دەي المايمىن", - دەدى دەنيەل سينگەر.

CDC وكىلى زەرتحانانىڭ امەركالىق ەمەستىگىن اتاپ ءوتتى. سينگەردىڭ ايتۋىنشا، اقش ۇكىمەتى بۇل نىساننىڭ قۇرىلىسىن قارجىلاندىرعان، ال CDC قۇرال-جابدىق ءبولىپ، مامانداردى وقىتقان. "الماتىلىق زەرتحانادا ءبىر دە ءبىر امەريكالىق جۇمىس ىستەمەيدى", - دەدى سينگەر.

"كوروناۆيرۋس الماتىلىق زەرتحانادا جاسالۋى مۇمكىن" دەلىنگەن مالىمەتتى قىتايدىڭ Sohu.com ينتەرنەت-رەسۋرسى تاراتتى. وسى سايتتىڭ قازاقستان اۋماعىنا قاتىستى تاعى ءبىر ماتەريالى نۇر-سۇلتاننىڭ وتكەن ايدا پەكينگە نارازىلىق نوتاسىن جولداۋىنا سەبەپ بولدى.

وتكەن جىلدىڭ اياعىندا قىتايدىڭ ورتالىق بولىگىندە قاراعان ۆيرۋستىڭ قايدان شىققانى ءالى كۇنگە دەيىن بەلگىسىز، بىراق اقش بيلىگى قاۋىپتى ۆيرۋس قىتايدىڭ ۋحان قالاسىنداعى زەرتحانادان شىققان بولۋى مۇمكىن دەگەن بولجام جاساعان. قىتاي مۇنى جوققا شىعارىپ وتىر.

دۇنيەجۇزىندە شامامەن 259 مىڭ ادام كوروناۆيرۋستان قايتىس بولدى. قاۋىپتى ۆيرۋستى 3,7 ميلليوننان استام ادام جۇقتىردى.

قازاقستاندا 4422 ادامنىڭ كوروناۆيرۋس جۇقتىرعانى انىقتالدى. 30 ادام قاتەرلى ىندەتتىن كوز جۇمدى.

Abai.kz