ن. نىعماتۋلين قازاقستاندىقتاردى وتان قورعاۋشىلار كۇنىمەن قۇتتىقتادى
نۇر-سۇلتان، 7 مامىر، ءماجىلىس ءۇيى. ءماجىلىس توراعاسى نۇرلان نىعماتۋلين قازاقستاندىقتاردى وتان قورعاۋشىلار كۇنىمەن قۇتتىقتاپ، بۇل ەرلىك پەن پاتريوتيزم مەرەكەسى ەلىمىزدە ەرەكشە قۇرمەتپەن اتاپ وتىلەتىنىن ايتتى.
«ۇلى وتان سوعىسى جىلدارىندا بەيبىتشىلىكتى قورعاعان ارداگەرلەرىمىزگە، باسقا ەلدەردە ءوزىنىڭ ينتەرناتسيونالدىق بورىشىن ورىنداعان جاۋىنگەرلەرگە، بۇۇ بىتىمگەرشىلىك ميسسيالارىنا قاتىسۋشى اسكەري قىزمەتشىلەرگە شىنايى العىسىمىزدى بىلدىرەمىز.

بۇگىندە جۇزدەگەن مىڭ قازاقستاندىق ەلىمىزدىڭ بارلىق حالقىنىڭ تىنىشتىعى مەن ءال-اۋقاتىن قامتاماسىز ەتە وتىرىپ، اسكەري بولىمشەلەردە لايىقتى قىزمەت اتقارۋدا.

قازاقستاننىڭ تۇڭعىش پرەزيدەنتى - ەلباسى نۇرسۇلتان ءابىشۇلى نازارباەۆتىڭ باستاماسىمەن تاۋەلسىزدىك العان جىلداردان باستاپ، ەلىمىزدىڭ قارۋلى كۇشتەرى نىعايىپ، بۇگىندە ول ۇلتتىق مۇددەنىڭ سەنىمدى قورعاۋشىسى جانە حالىقارالىق قاۋىپسىزدىكتىڭ جاھاندىق جۇيەسىنىڭ نەگىزگى بولىگىنە اينالدى» - دەدى ءماجىلىس توراعاسى.

سونىمەن قاتار، نۇرلان نىعماتۋلين قازاقستاننىڭ بىتىمگەرشىلىك جانە جاۋىنگەرلىك الەۋەتىن دامىتۋ، كەز كەلگەن قاۋىپ-قاتەرلەرگە قارسى تۇرۋ قابىلەتى مەملەكەت باسشىسى قاسىم - جومارت كەمەلۇلى توقاەۆتىڭ ساياساتىنىڭ ماڭىزدى باعىتى بولىپ تابىلاتىنىن اتاپ ءوتتى.

ءماجىلىس توراعاسى بارلىق قازاقستاندىقتارعا مىقتى دەنساۋلىق، باقىت جانە اماندىق تىلەدى.

Abai.kz