بەيبىت كۇننىڭ شىرقى بۇزىلماسىن!
بىزدەر جەڭدىك! جوق بولىپ، جارالى بوپ.
ءبىز كۋاندىق الدىمەن قارالى بوپ
قارسى تۇردىق اجداھا الدىندا ءبىز
تۋعان جەردىڭ ايازى، بورانى بوپ!
(مۇقاعالي ماقاتاەۆ)
قىمباتتى ارداگەرلەر!
«ەسىك» مەملەكەتتىك تاريحي-مادەني قورىق-مۋزەيى بارشاڭىزدى 9 – مامىر جەڭىس كۇنىمەن قۇتتىقتايدى! بۇل جەڭىستە سىزدەردىڭ ۇلەستەرىڭىز، كەشەگى ەرەسەن ەر ۇرپاقتىڭ قوسقان ۇلەسى وراسان زور! بۇگىندە كەنەرىنە قايتا تولعان تەڭىزدەي بوپ ەلىمىز شالقىپ-تاسىپ، ۇرپاعىمىز بەيبىت كۇن كەشىپ، ءوربىپ جاتساق ول دا سىزدەردىڭ باستارىڭىزدى قاۋىپكە تىگە ءجۇرىپ، وتان ءۇشىن قان كەشكەن قارالى جىلدارداعى قايسارلىقتارىڭىزدىڭ ناتيجەسى! سول ءۇشىن دە ءبىز سىزدەرگە باسىمىزدى يەمىز! ەرلىكتەرىڭىز ەلگە مۇرا، ۇرپاققا ونەگە! ەرلەر داڭقى ارتا بەرسىن!
قۇرمەتتى وتانداستار!
انالاردىڭ كوز جاسىمەن، اتالاردىڭ القىزىل قانىمەن، سانسىز قۇرباندىقپەن كەلگەن جەڭىستىڭ قۇنى دا ولشەۋسىز بولسا كەرەك! ونىڭ قۇنى تەك اشىق اسپان، بەيبىت كۇنمەن وتەلمەك!
ەندەشە، ەلىمىزدىڭ ىرگەسى ءبۇتىن، اسپانىمىز اشىق، بىرلىگىمىز بەكەم بولعاي! ەرلەرىمىز ايبىندى، شالقارىمىز ايدىندى بولسىن!
بەيبىت كۇننىڭ شىرقى بۇزىلماسىن!
قۇرمەتپەن
«ەسىك» قورىق-مۋزەيى ۇجىمى!
Abai.kz
