وزبەكستاننىڭ تۇڭعىش پرەزيدەنتىنىڭ قىزى گۇلنارا كاريموۆانىڭ تاركىلەنگەن بايلىعىنىڭ اراسىندا "ۋزبەكيستون پوچتاسي" ("وزبەكستان پوشتاسى"), Perfectum Mobile وپەراتورى، تاشكەنتتىڭ ەڭ جاقسى اۋداندارىنداعى 98 پاتەر بار.
تىزىمدە مدس مەديتسينالىق ورتالىعى مەن ەكى جەكەمەنشىك كلينيكا، اۋەجايداعى جانە تاشكەنت قالاسىنداعى duty free ساۋدا نۇكتەلەرى، Levi’s, Mango, Benetton جانە باسقا دا الەمدىك برەندتەرىنىڭ دۇكەن جەلىلەرى، بەس مەيرامحانا، ءتورت كينوتەاتر، ەكى سپورت جانە سپا-كلۋبى، جيىرمادان استام قۇرىلىس الاڭى، استانا ورتالىعىنداعى 20 ساۋدا الاڭى، ريەلتور كومپانيالارى، فەرمالار، اۋىل شارۋاشىلىعى فيرمالارى بار.
يسلام كاريموۆ جولداۋىندا اناسىنىڭ بايلىعى سوت شەشىمىنسىز پرەزيدەنت شاۆكات ميرزياەۆ كۇيەۋ بالاسىنىڭ قولىنا وتكەنى ايتىلعان.
"اتامىزدىڭ ءوزى سالىپ بەرگەن ءبىزدىڭ ساياجاي دا ءسىزدىڭ كۇيەۋ بالاڭىزدىڭ ارالاس جەكپە-جەك قاۋىمداستىعىنىڭ يەلىگىنە ءوتتى" دەپ جازدى گۇلنارا كاريموۆانىڭ بالاسى.
وزبەكستانداعى Coca-Cola زاۋىتى دا قازىرگى مەملەكەت باسشىسىنىڭ كۇيەۋ بالاسىنىڭ قولىنا ءوتتى دەيدى يسلام كاريموۆ. "اكەم م. ماكسۋديدىڭ ايتۋىنشا، وتباسىمىزدىڭ كاسىپورىنى - جۇزدەگەن ميلليون دوللار تۇراتىن Coca-Cola وزبەكستان زاۋىتى ءسىزدىڭ كۇيەۋ بالاڭىزدىڭ باسقارۋىنا ءوتتى" دەلىنگەن كاريموۆ جولداۋىندا.
ول گۇلنارا كاريموۆادان تارتىپ الىنعان بايلىق مەملەكەت قازىناسىنا الىندى دەگەنگە كۇمان كەلتىرگەن. ء"بىزدىڭ ساياجايدى، Coca-Cola جانە باسقا دا اكتيۆتەردى اشىق ساۋداعا شىعارعانىن ەستىمەدىك" دەپ جازدى يسلام كاريموۆ.
"قازىر ولاردى مەملەكەت ەمەس، باسقا بىرەۋلەر باسقارىپ وتىر" دەپ جازدى وزبەكستاننىڭ تۇڭعىش پرەزيدەنتىنىڭ نەمەرەسى.
وزبەكستاننىڭ بۇرىنعى پرەزيدەنتىنىڭ ۇلكەن قىزى گۇلنارا كاريموۆانى وزبەك سوتى تۇرمەگە وتىرعىزدى. وعان قىلمىس توبىن ۇيىمداستىردى، اقشا بوپسالادى، بايلىقتى تالان-تاراجعا سالدى، زاڭسىز مۇلىكتى لەگاليزاتسيالادى جانە باسقا دا قىلمىستار جاسادى دەگەن ايىپتار تاعىلدى.
وزبەكستاننىڭ باس پروكۋراتۋراسى گۇلنارا كاريموۆانىڭ شەتەلدەگى ەسەپشوتتارداعى اقشاسى ەلگە قايتارىلۋى كەرەك دەپ ەسەپتەيدى.
باس پروكۋراتۋرا كاريموۆا مەملەكەتتى جانە ونىڭ ازاماتتارىن 1 ترلن 270 ملرد 200 ملن سۋم، 1 ملرد 651,8 ملن دوللار شىعىنعا باتىردى دەپ حابارلادى.
قازىر گۇلنارا كاريموۆا تاشكەنت وبلىسى زاڭگىاتا اۋدانىنداعى ايەلدەر كولونياسىندا وتىر. ونىڭ شەتەلدەگى ەسەپشوتتارىنداعى اقشاعا بىرنەشە مەملەكەت تالاسىپ جاتىر.
Abai.kz
