مەديتسينالىق ساقتاندىرۋ قورى باسقارما توراعاسىنىڭ ورىنباسارى مارات شورانوۆ ەپيدەمياعا قانشا قاراجات بولىنگەنىن جانە ولار ناقتى نە ءۇشىن جۇمسالعانىن ايتتى،- دەپ حابارلايدى kursiv.kz.

شورانوۆتىڭ ايتۋىنشا، ەپيدەمياعا قارسى ءىس-شارالارعا رەسپۋبليكالىق بيۋدجەتتەن 55 ميللياردتان استام تەڭگە بولىنگەن. ونىڭ ىشىندە شامامەن 36 ميلليارد تەڭگە ەپيدەمياعا قارسى شارالارعا قاتىسقان قىزمەتكەرلەرگە بەرىلەتىن جاردەماقىعا، 19,5 ملرد. تەڭگە پاتسيەنتتەردى جانە ولاردىڭ ەمدەلۋىن باقىلايتىن مەديتسينالىق ۇيىمداردىڭ قىزمەتىنە اقى تولەۋگە، 5 ملرد.تەڭگەنى پتر ادىسىمەن كوروناۆيرۋستىق ينفەكتسيانىڭ بار-جوقتىعىن تەستىلەۋگە جۇمساعان.

سونىمەن قاتار، قور جاڭا اۋرۋدى ەمدەۋگە تاريفتەر ورناتقان. وعان سايكەس، كارانتيندىك گوسپيتاليزاتسيا كەزىندە مەديتسينالىق مەكەمەدەگى توسەككە تاۋلىگىنە 10 413,96 تەڭگە، الدىن-الا گوسپيتاليزاتسياعا جاتقاندا - 11 619,80 تەڭگە، ەمدەلگەن جاعدايدا ءبىر توسەككە كۇنىنە 15113,34 تەڭگە تولەنەدى ەكەن.

مارات شورانوۆتىڭ سوزىنشە، شىعىندارداعى ايىرماشىلىق اۋرۋحانالاردىڭ ءار دەڭگەيىندەگى دياگنوستيكالىق جانە ەمدىك شارالاردىڭ سيپاتىنا بايلانىستى. مەديتسينالىق مەكەمەنىڭ پتر زەرتتەۋى ءۇشىن 11 499,46 تەڭگە الىنادى. قاراجاتتىڭ كوپ بولىگى – (ارقايسىسى شامامەن 400 ميلليون تەڭگە) - الماتى جانە نۇر-سۇلتان اۋرۋحانالارىنداعى پتر دياگنوستيكاسىنا ءبولىندى. ويتكەنى بۇگىنگى تاڭدا بۇل ەكى قالا بارلىق پاتسيەنتتەردىڭ جالپى سانىنىڭ 50% قۇرايدى.

سونىمەن قاتار ول، ەمحانا دەڭگەيىندە پتر زەرتتەۋى ءۇشىن 3,7 ملرد.تەڭگە بولىنگەنىن ايتتى. ال، وڭىرلەر بۇل قاراجاتتى سانىنا قاراي الدى. مەديتسينالىق ساقتاندىرۋ قورى باسقارما توراعاسىنىڭ ورىنباسارى ءار وبلىستا ناۋقاستاردى تەكسەرەتىن ەمحانالار، فيلتر دەپ اتالاتىن اۋرۋلاردى انىقتاعانىن ايتتى. بۇلار، نەگىزىنەن، جەدەل رەسپيراتورلى ۆيرۋستىق ينفەكتسيالار مەن پنەۆمونيامەن اۋىراتىن ادامدار، سونداي-اق جوسپارلى تۇردە گوسپيتاليزاتسياعا كەلگەندەر.

- بارلىق مەديتسينالىق ۇيىمداردىڭ ۋاقىتىندا قاراجات الۋى ءۇشىن ولارمەن قوسىمشا كەلىسىمدەر جاسالدى، قىزمەتتەردى ساتىپ الۋ جانە تولەۋ ەرەجەلەرى وزگەرتىلدى. بولىنگەن قاراجاتتىڭ 99%-ى كەلىسىمشارتقا وتىرادى، - دەپتى شورانوۆ.

قازىر قور جاڭا مۇزداتىلعان پلازمانى ساتىپ الۋعا ارنالعان ءتاريفتىڭ قۇنى (76 857,14 تەڭگە) جانە انتيدەنەلەردى انىقتاۋ ءۇشىن تالداۋ تاريفتەرى (وقۋ تۇرىنە بايلانىستى 4563.04 جانە 5911,17 تەڭگە) تۋرالى ۇسىنىستار دايىنداعان.

ەپيدەمياعا قارسى ءىس-شارالاردى قارجىلاندىرۋدىڭ وزەكتى ماسەلەسىنىڭ ءبىرى مەديتسينالىق قىزمەتكەرلەرگە جاردەماقى تولەۋ. شورانوۆ مسق سىياقى تولەمدەرىنە كۇندەلىكتى مونيتورينگ جۇرگىزەتىنىن اتاپ وتكەن. ساۋىردە ەپيدەمياعا قارسى شارالارعا قاتىساتىن جانە جاردەماقى الاتىن مەديتسينا قىزمەتكەرلەرىنىڭ سانى ناۋرىز ايىمەن سالىستىرعاندا 2,5 ەسە ءوسىپ، 17,7-دەن 42,6 مىڭ ادامعا جەتكەن.

سونداي-اق ەسەپتەلگەن جاردەماقى مولشەرى دە 56%-عا ءوسىپتى. ءساۋىر ايىندا مەديتسينا قىزمەتكەرلەرىنە 7,6 ملرد.تەڭگە بولىنگەن. ناۋرىزدا بۇل سوما 3,3 ملرد.تەڭگەدەن استام بولعان. سەبەبى، ءساۋىر ايىندا كوروناۆيرۋستىق ينفەكتسيانىڭ ەپيدەميالىق جاعدايى ناشارلادى. سوندىقتان ەپيدەمياعا قارسى شارالارعا مەديتسينا قىزمەتكەرلەرىنىڭ كوپشىلىگى تارتىلعان.

ەپيدەميالىق جاعدايدى ەسكەرە وتىرىپ، قور مامىر ايىندا بۇل شارالارعا 8,6 ملرد.تەڭگە ءبولۋى مۇمكىن ەكەن.

Abai.kz