شىمكەنت گارنيزونىنىڭ اسكەري سوتى بىلتىر 24 ماۋسىمدا ارىستا بولعان جارىلىسقا قاتىستى قىلمىستىق ءىستى قاراۋدى باستادى،- دەپ حابارلايدى Tengrinews.kz.

"قىلمىستىق ءىس بويىنشا 16 ادامعا ايىپ تاعىلدى، 1473 ادام زارداپ شەككەندەر رەتىندە تانىلدى. ولاردان بولەك، سوتقا سوتتالۋشىلاردىڭ ادۆوكاتتارى مەن پروكۋرورلار قاتىسادى. ءبىرىنشى سوت وتىرىسىنا 204 قاتىسۋشى كەلدى، ونىڭ 16-سى سوتتالۋشى، 19 ادۆوكات، 3 قوعامدىق قورعاۋشى، 5 پروكۋرور مەن 165 زارداپ شەككەن ادام", - دەلىنگەن سوتتىڭ حابارلاماسىندا.

سونداي-اق، سوتتاعىلاردىڭ مالىمەتىنشە، سانيتارلىق ەپيدەميولوگيالىق تالاپتاردى ورىنداۋ بارىسىندا سوت زالىنا بارلىق قاتىسۋشى كىرگىزىلمەدى.

ەسكە سالايىق، بىلتىر 24 ماۋسىمدا تاڭعى ۋاقىتتا ارىس قالاسىنىڭ ماڭىنداعى اسكەري قويما تەرريتورياسىندا سناريادتار جارىلعان بولاتىن. تۇرعىندار جاپپاي قالادان شىعىپ كەتىپ جاتتى. كەيىن قالا تولىقتاي ەۆاكۋاتسيالانعان ەدى.

توتەنشە جاعدايدان ءۇش ادام قازا تاۋىپ، 200-دەن اسا ادام زارداپ شەككەن بولاتىن.

Abai.kz