ءۇندىستان بيلىگى لاداكحتاعى قاقتىعىستا 20 اسكەريدىڭ ولىمىنە قىتايدى ايىپتادى. ءۇندىستان سىرتقى ىستەر مينيسترلىگى وكىلىنىڭ حابارلاۋىنشا، اسكەري قاقتىعىس 15 ماۋسىمدا بولعان. قىتاي گالۆان جازىعىنداعى جاعدايدى بىرجاقتى رەتكە كەلتىرگىسى كەلگەن.

قىتاي ءوز كەزەگىندە قارسىلىق ءبىلدىرىپ، ءۇندىستان اسكەرى شەكارا سىزىعىن بۇزىپ، قىتاي ساربازدارىنا ءبىرىنشى بولىپ شابۋىل جاسادى دەپ ايىپتاپ، نوتا جولدادى. ولاردىڭ مالىمەتىنشە، ءۇندى اسكەرى قىتاي شەكاراسىن ەكى رەت كەسىپ وتكەن.

سارسەنبى كۇنى ءۇندىستان مەن قىتاي سىرتقى ىستەر مينيسترلەرى سۋبرامانيام دجايشانكار مەن ۆان ي تەلەفون ارقىلى سويلەسىپ، شيەلەنىستى شەشۋگە كەلىسكەن.

سوڭعى 45 جىلدا ءبىرىنشى رەت ءۇندىستاننىڭ تاريحي جانە گەوگرافيالىق ايماعى لاداكحتا قىتايمەن قاقتىعىس بولىپ وتىر. بىلتىر لاداكح دجامما مەن كاشمير شتاتىنان ءبولىنىپ، ءوزىنىڭ جاڭا مارتەبەسىن جاريالاعان.

باتىس اقپارات اگەنتتىكتەرىنىڭ حابارلاۋىنشا، قاقتىعىس كەزىندە 20 ءۇندى ساربازى قازا تاپقان.

قىتاي تاراپى قۇربان بولعاندار جايلى مالىمەت بەرمەدى.

قىتاي مەن ءۇندىستان ۇزاق جىلداردان بەرى كاشميردىڭ سولتۇستىك بولىگىندەگى تاۋلى ايماققا جانە سولتۇستىك-شىعىستاعى ارۋناچال-پرادەش شتاتىنداعى 60 مىڭ شارشى شاقىرىم جەرگە تالاسىپ كەلەدى. 1962 جىلدىڭ كۇزىندە جانجال شەكارالىق سوعىسقا ۇلاسقان. 1993 جانە 1996 جىلدارى قىتاي مەن ءۇندىستان بەيبىت كەلىسىمگە قول قويعان.

Abai.kz