Үндістан билігі Ладакхтағы қақтығыста 20 әскеридің өліміне Қытайды айыптады. Үндістан сыртқы істер министрлігі өкілінің хабарлауынша, әскери қақтығыс 15 маусымда болған. Қытай Галван жазығындағы жағдайды біржақты ретке келтіргісі келген.

Қытай өз кезегінде қарсылық білдіріп, Үндістан әскері шекара сызығын бұзып, қытай сарбаздарына бірінші болып шабуыл жасады деп айыптап, нота жолдады. Олардың мәліметінше, үнді әскері Қытай шекарасын екі рет кесіп өткен.

Сәрсенбі күні Үндістан мен Қытай сыртқы істер министрлері Субраманьям Джайшанкар мен Ван И телефон арқылы сөйлесіп, шиеленісті шешуге келіскен.

Соңғы 45 жылда бірінші рет Үндістанның тарихи және географиялық аймағы Ладакхта Қытаймен қақтығыс болып отыр. Былтыр Ладакх Джамма мен Кашмир штатынан бөлініп, өзінің жаңа мәртебесін жариялаған.

Батыс ақпарат агенттіктерінің хабарлауынша, қақтығыс кезінде 20 үнді сарбазы қаза тапқан.

Қытай тарапы құрбан болғандар жайлы мәлімет бермеді.

Қытай мен Үндістан ұзақ жылдардан бері Кашмирдің солтүстік бөлігіндегі таулы аймаққа және солтүстік-шығыстағы Аруначал-Прадеш штатындағы 60 мың шаршы шақырым жерге таласып келеді. 1962 жылдың күзінде жанжал шекаралық соғысқа ұласқан. 1993 және 1996 жылдары Қытай мен Үндістан бейбіт келісімге қол қойған.

Abai.kz