ماماندىعىمىز – جۋرناليستيكا.

اقپاراتسىز ءومىر جوق. اقپارات بولسا، ەكى ءجۇزدى قىلىشتاي: ءبىر ءسوز ەلدى العا جەتەلەيدى، ەكىنشىسى – كەرى تارتادى. كەرەك بولسا، ءبىر اۋىز ءسوز ءبىر كۇندە-اق ماڭگى مىزعىماستاي كورىنگەن جۇيەنىڭ بىت-شىتىن شىعارىپ تاستاي الادى.

سوندىقتان سوزبەن ويناۋعا بولمايدى. ونى ايتقاندا نە جازعاندا، ارينە، باتىل بولۋ شارت. بىراق، سونىمەن بىرگە اباي بولۋ دا كەرەك.

بەس جىل ۋنيۆەرسيتەتتە وقىپ، كوز مايىن تاۋىسىپ، جۋرناليستيكا ماماندىعىن قىر-سىرىن ۇيرەندىك. تەورياسىن زەرتتەدىك، پراكتيكاسىن ۇيرەندىك. جۋرناليستىك جولىمىزدى اۋداندىق گازەتتەن باستادىق.

كەيدە ءبىزدىڭ ماماندىق تۋرالى نەبىر عايبات سوزدەر ايتىلىپ جاتادى. ماسەلەن، «ەڭ كونە ەكىنشى ماماندىق» دەپ ءاجۋالاپ، ءتانىن ساتاتىندارمەن دە تەڭەستىرىپ جاتادى.
مەنىڭشە، ماسەلە ماماندىقتا ەمەس، ونىڭ ناقتى يەلەرىندە!

ءيا، بيلىككە نە بەلگىلى ءبىر وليگارحتىق توپقا، ناقتى ۇيىم نە قولدان جاساپ العان كۋميرگە ءوز ءسوزىن ساتىپ ءجۇرىپ، كۇن كورىپ جاتقاندار دا بار.

بىراق مەملەكەتتىك باق-تا جۇمىس ىستەپ جۇرگەندەرىڭ ءبارى شەتىنەن وتىرىكشى دەپ كىم ايتتى؟ ۇكىمەت قارجىلاندىراتىن باق-تا دا تالاي ازاماتتار قوعامعا ادال قىزمەت جاساپ جاتىر. باس جاققا بارىسپاسا دا، ولار دا حال-قادەرىنشە شىرىلداپ شىندىقتى ايتىپ جاتىر.

نەمەسە بيلىكتى سىناپ جۇرگەن باق وكىلدەرىنىڭ ءبارى شەتىنەن شىنشىل، وبەكتيۆتى دەپ كىم ايتا الادى؟ ول جاقتا دا بەلگىلى ءبىر توپتىڭ نە ۇيىمنىڭ سويىلىن سوعىپ، اقتى قارا ەتىپ، فەيك پەن حايپ دەرتىنە شالىققاندار دا تابىلىپ جاتادى.

ءوز باسىم "وپپوزيتسيالىق باق" دەگەن تەرمينگە قارسىمىن. پارتيا نە تۇلعا وپپوزيتسيالىق بولا الادى، ال ناعىز باق ەشبىر ساياسي كۇشتىڭ - قۇي، ول بيلىك پارتياسى بولسىن، قۇي، وپپوزيتسيالىق بولسىن - "بارىپ كەل، شاۋىپ كەلى" بولماۋى ءتيىس!

ويتكەنى جۋرناليست ايتۋعا ءتيىس شىندىق كوبىنەسە اق پەن قارانىڭ ەكى ورتاسىنان تابىلىپ جاتادى...

مەنىڭشە، جۋرناليستيكانىڭ ەڭ باستى كريتەريى – ەلدە بوپ جاقتان وقيعالار تۋرالى بۇكپەسىز، ەشبىر بوياماسىز اقپارات جەتكىزۋ.

قالعانىنىڭ ءبارى – سوۆەت داۋرىنەن قالعان ۇگىت-ناسيحات، ساياسي بيۋروكراتيا، ءبىر كۇندىك كونيۋنكتۋرا نەمەسە جانرلىق ەرەكشەلىكتەر!

بيۋدجەتكە تاۋەلدى جانە ءوزىن تاۋەلسىز سانايتىن باق-تا سوزگە ادال ماماندار جەتكىلىكتى.

بۇگىن سولاردى قۇتتىقتايمىن!

كىمنىڭ كىم ەكەنىن جۋرناليستەردىڭ وزدەرى-اق، ەڭ باستىسى، كوكىرەگى وياۋ، كوزى اشىق وقىرماننىڭ ءوزى بىلەدى.

ءبىر وكىنىشتىسى، وسى كۇندەرى بيلىك كوبىنەسە وزىنە جاعىمدى ءسوز ايتىپ، استىنا كوپشىك قويىپ، ماقتاۋعا اۋەس جۋرناليستەردى ماقتاپ، ماراپاتتاپ جاتادى. 30 جىلدان بەرى مەملەكەتتىك يدەولوگيا تىعىرىققا تىرەلىپ، مەملەكەتتىك باق جۇيەسى داعدارىسقا ۇشىراپ جاتقان قازىرگى كەزدە ونداي ديفيرامبتاردىڭ ءوزى ارتىقتاۋ كورىنەدى ماعان.

ال بيلىكتىڭ كەمشىلىگىن ءتۇزىپ، اششى شىندىقتى جازىپ جۇرگەندەر شەندىلەر تاراپىنان ونداي قۇرمەتكە يە بولا الماي قالادى: ءوزىن سىناپ-مىنەپ جاتقانداردى كىم ۇناتسىن؟

بىراق ودان ولارعا دەگەن حالىقتىڭ قۇرمەتى كوبەيمەسە، ازايمايدى.

كاسىبي مەرەكەمىز قۇتتى بولسىن، اقپاراتتىق بارريكادانىڭ بەر جاق، ار جاعىندا جۇرگەن دوستار!

ءامىرجان قوسانوۆتىڭ الەۋمەتتىك جەلىدەگى جازباسى

Abai.kz