ەل اۋماعىندا ىندەت شەڭگەلىنە ىلىنبەگەن ەلدى مەكەن قالمادى. بۇگىندە ۆيرۋستىڭ وكپەگە وتۋىنەن پنەۆمونيادان كوز جۇمعانداردىڭ سانى ساعات سايىن ارتىپ جاتقانى انىق. ونىڭ ۇستىنە ەسكى سوزىلمالى اۋرۋلاردى قوزعاپ، بۇيرەك، جۇرەك، قان قىسىمى ت.ب. دەرتتەردەن دە باقيعا قانشاما وتانداسىمىز اتتاندى. ەندى وسى قايتىس بولعان جانداردى اقتىق ساپارعا شىعارىپ سالۋ قالاي وتۋدە؟

سارىعاش قالاسىنداعى مەدرەسەنىڭ ديرەكتورى ابدۋعاپار سمانوۆ قايتىس بولىپ، ونىڭ جانازاسىنا ءنوپىر حالىق قاتىسقانى جايلى بەينەماتەريالدى كورگەندە جان تۇرشىكتى.

بىرىنشىدەن، جەلىدەن تاراعان اقپاراتتان جانە مارقۇمنىڭ سوڭعى دىبىس جازباسىنان ونىڭ الەمگە تاراعان ىندەت تىرناعىنا ءىلىنىپ قينالىپ جاتقانىن ەستىدىك. ياعني سمانوۆ مارقۇم COVID-19-دان قايتىس بولعان. ءتارتىپ بويىنشا مۇردە تۋىسقاندارىنا بەرىلگەنىمەن ۇيگە اپارىپ جۋىندىرۋعا بولمايدى دا، دەنەنى اۋرۋحانادان بىردەن زيراتقا الىپ كەتىپ جەرلەۋ ءلازىم. جانە مۇنداي جاعدايدا سىرتىنان قارا قاپشىق كيگىزىلىپ، زارارسىزداندىرىلىپ بارىپ، بارلىق ساقتىق تارتىپتەرى بۇلجىماي ورىندالۋى ءتيىس. ال جانازادا حالىقتىڭ مارقۇمدى توبەسىنە قويىپ، سوڭعى ساپارعا شىعارىپ سالعان بەينەجازبادان مۇنىڭ ءبىرىنىڭ ساقتالماعانىن كورەمىز.

ەكىنشىدەن، قازىر جەر-جەردە تۋىستارىن جوعالتقان ادامدار، COVID-19-دان ەمەس، پنەۆمونيادان نەمەسە باسقا ءبىر اۋرۋدان قايتتى دەپ مارقۇمداردى قارا جەر قوينىنا اتتاندىراردا سۇيەككە 7 ادام ءتۇسىرىپ ءمايىتتى جۋىندىرىپ، كەبىندەپ جونەلتۋدە. بۇل جەردە جۋىندىرعان جاندارعا اۋرۋ جۇقپاي ما؟

سارىاعاشتىق ءدىن وكىلى قايتىس بولعاندا سۇيەككە تۇسكەن ادامداردىڭ سول جانازاداعى ءنوپىر حالىقتىڭ ورتاسىندا جۇرگەنى انىق. ەندەشە اۋرۋ تارالۋىنىڭ باستى وشاعىنىڭ ءبىرى- جانازا بولۋدا.

بۇگىن الەۋمەتتىك جەلىدە ماڭعىستاۋلىق ءبىر اۋداننىڭ ازاماتتارىنىڭ جانازادا سۇيەككە ادام تۇسىرمەي، كوپشىلىك جيناماي اقتىق ساپارعا تەك ەت جاقىندارىنىڭ عانا شىعارىپ سالۋىن ۇندەگەن جازبا تارادى. وتە دۇرىس، ەل بولىپ قولدايتىن، ىندەتتىڭ ورشۋىنە توسقاۋىل قويۋدىڭ امالى دەپ سانايمىز.
وسى رەتتە ەلىمىزدىڭ دەنساۋلىق ساقتاۋ مينيسترلىگى بارلىق قالالار مەن كەنتتەردە، اۋىلدارداعى اۋرۋحانالاردا، جانە ۇيلەرىندە قايتىس بولعان ادامداردى جونەلتۋدىڭ ءراسىمىن ناقتىلاۋ قاجەتتىگى تۋادى. مارقۇمنىڭ اجالى تۋراسىنداعى كۋالىك-قۇجاتتا ۆيرۋس كەسىرىنەن قوزداعان مىناداي دەرتتەن كوز جۇمدى دەگەن انىقتاما بەرىلۋى جەدەل تۇردە قولعا الىنباسا، حالىقتى ىندەت قۇرىعىنان ساقتاۋ دەگەن بوس اڭگىمە، دالباسا بولىپ قالماقشى. ال قولدا قۇجات جوقتا جاقىندارى ەشتەڭەگە كونبەي، سۇيەككە ادام ءتۇسىرىپ، جانازاعا كوپشىلىكتىڭ قاتىسىپ، اۋرۋدىڭ ورشۋىنە كەڭ داڭعىل اشىلادى.

بارلىق جاقىندارىڭىزدىڭ، ءوزىڭىزدىڭ، حالقىڭىزدىڭ مىنا ىندەتتەن امان قالۋىن تىلەسەڭىز، ءبولىسىڭىز. ەلگە جەتۋىنە ۇلەس قوسىڭىز. سوندىقتان دا ەشقايسىڭىزدى بەلگىلەمەدىم، جاقىنىڭىزعا جانىڭىز اشىسا جەتكىزە بىلەيىك. بۇل-تاجال ىندەت بولىپ تۇر.

شۇعىل شارا قابىلدانۋى ءتيىس!

انار تولەۋحاننىڭ الەۋمەتتىك جەلىدەگى جازباسى

Abai.kz