قازاقستان جاستارىنىڭ باسىم كوپشىلىگى ساۋدا جانە ماشينا جاساۋ سالاسىندا جۇمىس ىستەيدى ەكەن. ونداعى ورتاشا جالاقى 184,9 مىڭ تەڭگەنى قۇرايدى. بۇل تۋرالى LS سايتى جازدى. 

ستاتيستيكا كوميتەتىنىڭ مالىمەتىنشە، ەلىمىزدە 15 پەن 28 جاس ارالىعىنداعى جۇمىس ىستەيتىن 2 ميلليون ادام بار. بۇل وتكەن جىلمەن سالىستىرعاندا 3,2%-عا از كورسەتكىش.

جاستاردىڭ كوپ بولىگى ساۋدا جانە ماشينا جاساۋ سالاسىندا جۇمىس ىستەگەندى ءجون كورەدى ەكەن. وندا ورتاشا جالاقى 184,9 مىڭ تەڭگەنى قۇرايدى. بۇل ءبىرىنشى توقسانداعى ورتاشا ايلىقتان 7,7%-عا از.

سودان كەيىن جاستاردىڭ كوپ باراتىن سالاسى - اۋىل شارۋاشىلىعى، ورمان جانە بالىق شارۋاشىلىعى ەكەن. وندا قازىر 241,9 مىڭ ادام جۇمىس ىستەپ جاتقان كورىنەدى. ستاتيستيكا كوميتەتىنىڭ دەرەگى سولاي دەيدى. دەسە دە، بۇل سالاداعى ورتاشا جالاقى - 105,1 مىڭ تەڭگەنى قۇرايدى. بۇل باسقا سالالارمەن سالىستىرعاندا ەڭ تومەنگى دەڭگەي. ال قازاقستانداعى ورتاشا ايلىقتان 1,9 ەسە از كورسەتكىش.

جاستار اراسىنداعى ەڭ تانىمال ءۇشىنشى سالا - ءبىلىم سالاسى. مۇنداعى  ورتاشا جالاقى 154,6 مىڭ تەڭگە. بۇل قازاقستانداعى ورتاشا جالاقىدان 22,8% -عا از.

ايتا كەتەرلىگى، جاستار باراتىن بۇل ءۇش سالا دا قازاقستانداعى ورتاشا تابىس دەڭگەيىنەن تومەن سالالار.

ال، دەنساۋلىق ساقتاۋ جانە الەۋمەتتىك قىزمەت كورسەتۋ سالاسىنداعى جاستاردىڭ سانى 7,9% -عا وسكەن. مۇنداعى جالاقى 152,4 مىڭ تەڭگەنى قۇرايدى.

Abai.kz