جاعىمپازدار كەز كەلگەن قوعامدا بولعان.
بۇگىندە دە بار.
بولاشاقتا دا بولا بەرەتىن سياقتى.

بايقايمىن، بۇگىندە ەكىنشى پرەزيدەنتتەن ءپىر جاساعىسى كەلەتىندەردىڭ ارمياسى پايدا بولىپ جاتىر. وعان كەيبىر ينتەلليگەنتسيا وكىلدەرى مۇرىندىق بولىپ جاتقان سىڭايلى.

مەنىڭ پوزيتسيام و باستان بەلگىلى: جاقسىنىڭ جاقسىلىعىن ايت، جاماننىڭ جاماندىعىن ايت!

نازارباەۆ قۇرعان جۇيەگە قاتىستى اششى شىندىقتى بۇگىنگى كەيبىر "باتىرلار" ۇندەمەي جۇرگەن كەزدە ايتقانبىز. رەجيمنىڭ اعىن اق، قاراسىن قارا دەۋگە تىرىستىق. سول ءۇشىن ۇرىلدىق، سوعىلدىق، قۋدالاندىق، سوتتالدىق، اباقتىعا جابىلدىق. وعان ەش وكىنبەيمىز. ەڭ باستىسى - ءبىزدىڭ سىن ساياسي سالماقتى بولدى، جەكە باسقا ءجونسىز تيىسكەن جوقپىز، جۇيەلىك سىن ايتتىق.

توقاەۆقا دا كوزقاراسىم حالىقتىق، دەموكراتيالىق، مەملەكەتتىك، ۇلتتىق تالاپتار تۇرعىسىنان بولادى، وسى كريتەريلەرگە ساي بولسا، قولدايمىن. الايدا وسى جولدان تايىپ كەتسە، سىناۋعا قاقىم بار.

جاڭاشا جاعىمپازدىقتى جويۋدىڭ جولىن ۇسىنامىن.

ونىڭ ءمانىسى مىنادا: وسى كۇنگە دەيىن تۇڭعىش پرەزيدەنتكە قۇدايداي تابىنعان، ونى ءپىر تۇتىپ كەلگەندەر، ەندى ەكىنشى پرەزيدەنتكە ونداي ديفيرامبتار ايتپاسىن.

سول كەزدە جاعىمپازداردىڭ سانى كۇرت ازايادى.

بالكىم، سوندا توقاەۆتى قولداۋشىلار قاتارى دا كوبەيە تۇسەر.

ءامىرجان قوساننىڭ جازباسى

Abai.kz