اقپاراتقا قول جەتكىزۋ ماسەلەلەرى جونىندەگى كوميسسيانىڭ وتىرىسىندا اقپارات جانە قوعامدىق دامۋ ءمينيسترى ايدا بالاەۆا بايانداماشىلارعا قازاق تىلىندە سويلەۋ كەرەگىن ەسكەرتتى. بۇل تۋرالى aikyn.kz حابارلايدى.

«بارلىق بايانداماشىلارعا ايتارىم، سلايدتىڭ ءبارى ورىسشا بولعاننان كەيىن وزدەرىڭىزدىڭ باياندامالارىڭىزدى قازاقشا جاساۋعا بولادى عوي. سەبەبى، جينالىسىمىز Facebook-تە ونلاين فورماتتا ءوتىپ، حالىققا تىكەلەي كورسەتىلىپ جاتىر. بۇعان قوسا، ءبىز حالىقتى اقپاراتتاندىرۋ پروبلەماسىن ايتىپ وتىرمىز. ال مەملەكەتتىك تىلدە اقپارات جەتكىلىكتى دەڭگەيدە ەمەس. جۇمىسىمىز ورىس تىلىندە جۇرگىزىلگەننەن كەيىن حالىق تۇسىنبەي وتىر»، - دەدى مينيستر.

ءمينيستردىڭ ايتۋىنشا، بايانداماشىنىڭ سلايدى ورىس تىلىندە بولسا، بايانداماسى قازاق تىلىندە بولۋى ءتيىس.

«سلايدتار ورىس تىلىندە بولسا، باياندامانى قازاقشا جاساۋعا بولادى. نە بولماسا سلايدتاردى قازاقشا، باياندامانى ورىسشا جاساساق. كوميسسيا مۇشەلەرى جانە بايانداماشىلار وسى ماسەلەنى قاپەردە ۇستاۋى مىندەتتى»، -دەدى ايدا بالاەۆا.

جيىندا اقپاراتقا قول جەتكىزۋ ماسەلەلەرى جونىندەگى كوميسسيانىڭ وتىرىسىندا مۇمكىندىگى شەكتەۋلى ادامداردىڭ اقپاراتقا قولجەتىمدىلىك، مەملەكەتتىك ورگانداردىڭ اشىقتىعى، وتكەن جىلدىڭ قورىتىندىسى، مەملەكەتتىك ورگانداردىڭ ينتەرنەت-رەسۋرستارىنىڭ بىرىڭعاي تۇعىرناماسىنىڭ جۇمىسى تالقىلاندى.

Abai.kz