مەنىڭ اكەم ومىرىندە كسرو قۇلايدى دەپ ويلاماعان بولار. قازىر كسرو-نىڭ قۇلاعانى جايلى دەرەكتى ءفيلمدى كورىپ جاتىر. مەنىڭ شەشەم "سويۋز نەرۋشيمىي رەسپۋبليك سۆوبودنىح، سپلوتيلا ناۆەكي ۆەليكايا رۋس" دەپ ءانۇران ايتقان. قازىر تاۋەلسىز قازاقستاندا كۇن كەشۋدە. عاسىرلارعا كەتەتىن سويۋزى جوق، ءتىپتى ءۇش شيرەك ۋاقىت ءومىر سۇرمەي، ءولىپ كەتتى. كسرو-دا كوپ جىلى وتكەن ادامداردان سۇراساڭىز، ولاردىڭ بارلىعى دا "كسرو قۇلايدى دەگەن ءۇش ۇيىقتاساق تا تۇسىمىزگە ەنبەپتى" دەيدى. ال قازىر ءۇش ۇيىقتاسا دا سول كسرو-نى تۇستەرىندە دە كورمەيدى. ارينە، كسرو-نىڭ قۇلاۋى شەتكى ايماقتان ەمەس، قوردالانعان ءتۇرلى ماسەلەدەن باستالدى. دەي-تۇرا جارتى الەمدى ۋىسىندا ۇستاعان دەرجاۆا جالپ ەتە قالدى. بۇل فاكت.

بۇگىن مىنە رەسەيدىڭ قيىر شىعىسى تۋلاپ جاتىر. حاباروۆسك، ۆلاديۆوستوك جانە ت.ب. ورتالىق پەن بۇل ايماقتىڭ اراسى 5 مىڭ شاقىرىم شىعار كەمى. كرەملدە ايتىلعان ءار ءسوز بۇل ايماققا جەتەم دەگەنشە ءار شاقىرىمدا ادۋىنى ازايىپ، قارقىنى باسەڭدەپ كەلەدى. حاريزماتيكالىق تۇرعىدان. ونىڭ ۇستىنە ەدىلدىڭ ار جاعى مەن بەر جاعىنداعى ورىس الەمى ەكى ءتۇرلى ىسپەتتەس. ماسكەۋ مەن پيتەر ءبىر الەم، قالعانى مۇلدە باسقا پلانەتا. قيىر شىعىس ءتىپتى جات عالام ىسپەتتەس. ورتالىققا وكپە-رەنىشى كوپ ەكەنى كورىنىپ تۇر. ىشتەگى قارسىلىق جىلدار بويى جينالىپتى. ەكونوميكالىق ماسەلەلەر، جەمقورلىق، ۇمىت بولعان تاعدىرلار مەن ۇزىلگەن ءۇمىت جيناقتالىپتى. ونى كوكشىرەيگەن كوزدەردەگى اشۋدان كورۋگە بولادى. ارينە، بۇل بۇگىن-ەرتەڭ رەسەي ءبولىنىپ، پۋتين تاقتان كەسكەن تەرەكشە سۇلاپ تۇسەدى دەگەندى بىلدىرمەيدى. ءتىپتى بۇل العىشارتى دا ەمەس شىعار. بىراق وزگە ەلدىڭ ايماقتارىنا سەپاراتيستىك ءدان سەۋىپ جۇرگەن پۇتەكەڭ، ءوز ايماعىندا دا وندايدىڭ مۇمكىن ەكەنىن بايقاعان شىعار.
رەسەي يمپەرياسى تاس-تالقان بولدى. كسرو قۇلادى. رەسەي فەدەراتسياسى شە؟ ۋاقىت كورسەتەدى.