...توبەدەگى كىسى تومەندەگىلەردى سىلكىپ، سىلكىپ الدى. تومەندەگىلەر تىرىلگەندەي بولعان. بىراق، ءبارى جاساندى.

وبلىستىڭ اكىمى ءبىر-ەكى دارىحاناعا باس سۇقتى. ول كەلەدى دەپ سورەلەردى ءدارى-دارمەككە تولتىرىپ قويعان. جالعىز جۇرگەن جوق، جاعىمپاز بلوگەر، جالتاق جۋرناليست، ءلابباي ورىنباسارلار ىلەسە كەلىپتى. قالعان ءدارىحانالاردا ءدارى جوق. جاساندىلىق جانە كوزبوياۋشىلىق!

...قالانىڭ اكىمى كوشەدە ءبىر دانادان ماسكا تاراتىپ ءجۇر. ونىڭ جانىندا دا جاعىمپاز توپ. ماسكا العان ادامعا "ماسكانى اكىم بەردى دەپ ايتىڭىز" دەۋدى دە ۇمىتپايدى. قايىرىمدىلىق ەمەس قاراپايىم ادامدى قورلاۋ! جاساندىلىق جانە كوزبوياۋشىلىق!

...اۋداننىڭ اكىمى اۋىلداعى اپتەكالار بوس قالعاندا قارا كورسەتپەگەن. جاناشىر ازاماتتار جيناعان قارجىعا الىنعان اپپاراتتار اۋرۋحاناعا جەتكەندە القىنىپ ول دا جەتتى. قاسىندا ءبىر قورا جاندايشابى، جارق-جۇرق سۋرەتكە ءتۇسىرىپ جۇرگەن تىلشىلەرى بار. شەكارانىڭ ار جاعىنان ءوزى كوتەرىپ كەلگەندەي دارىگەرلەرگە الگى اپپاراتتاردى ماڭعازدانا تاپسىرىپ جاتىر. جاساندىلىق جانە كوزبوياۋشىلىق!

...جاساندى شارىننىڭ الدىندا وتىرىپ، جاساندىلىق جايلى كەلگەن ويلار عوي. توبەدەگى كىسى تومەندەگى اكىم قارالاردى كەشە قاتتىراق سىلكىدى. ولار ەندى جاساندىلىق پەن كوزبوياۋشىلىقتىڭ كوكەسىن كورسەتپەسە ماعان كەلىڭىزدەر!..