ورتالىق سايلاۋ كوميسسياسى 12 تامىزدا وتەتىن سايلاۋعا سەنات دەپۋتاتتىعىنا كانديداتتاردىڭ قورىتىندى ءتىزىمىن بەكىتتى. 

اقپارات بويىنشا، 2020 جىلى 23 شىلدەدە ساعات 18-دەگى جاعداي بويىنشا وبلىستاردىڭ، نۇر-سۇلتان، الماتى جانە شىمكەنت قالالارىنىڭ سايلاۋ كوميسسيالارى قازاقستان رەسپۋبليكاسى پارلامەنتى سەناتى دەپۋتاتتارىنىڭ 17 مانداتىنا 94 ۇسىنىلعانداردان 58 كانديداتتى تىركەدى. ورتاشا ەسەپپەن ءبىر ورىنعا 3 ادام ۇمىتكەر. وڭىرلەر اراسىندا ەڭ كوپ كانديدات سانى نۇر-سۇلتان قالاسىندا جانە اقمولا وبلىسىندا – 5 ادام تىركەلگەن.

تىركەلگەن ۇمىتكەرلەردىڭ ىشىندە 48 (82,8 پايىز) ەر مەن 10 (17,2 پايىز) ايەل (سالىستىرۋ رەتىندە: 2017 جىلى 47 (90,7 پايىز) ەر مەن 5 (9,3 پايىز) ايەل، 2014 جىلى 51 (96,1 پايىز) ەر مەن 2 (3.9 پايىز) ايەل).

قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى بەرىك يماشەۆ ايەلدەردىڭ ساياسي بەلسەندىلىگى ساقتالىپ كەلە جاتقانىن اتاپ ءوتتى. تىركەلگەن كانديداتتار اراسىندا - 10 ايەل، بۇل 17,2 پايىز. وتكەن سايلاۋ ناۋقانىمەن سالىستىرعاندا بۇل كورسەتكىش 2 ەسەگە دەرلىك ءوستى.

ماماندىقتار بويىنشا: 19 – ينجەنەر، 13 – ەكونوميست، 8 – پەداگوگ، 7 – اگرارلىق سالا قىزمەتكەرلەرى، 5 – دارىگەر، 3 – زاڭگەر، 1 – ساياساتتانۋشى، 2 - باسقالار.

كانديداتتار اراسىندا 21 كوممەرتسيالىق قۇرىلىمداردىڭ قىزمەتكەرى; 16 مەملەكەتتىك ۇيىمداردىڭ، كاسىپورىندار مەن مەكەمەلەردىڭ قىزمەتكەرى; 12 مەملەكەتتىك قىزمەتشى، 5 قوعامدىق ۇيىمداردىڭ وكىلى، 4 سەنات دەپۋتاتى بار.

«23 شىلدەدە ساعات 18-دەن باستاپ سەنات دەپۋتاتتىعىنا تىركەلگەن بارلىق ۇمىتكەر سايلاۋ الدىنداعى ۇگىتتى باستاي الادى، ول بيىلعى 11 تامىزدا ساعات 00.00-گە دەيىن جالعاسادى.

سەنات دەپۋتاتتىعىنا كانديداتتارعا ۇگىت جۇمىسىن جۇرگىزۋ تەڭ جاعدايدا وتۋىنە زاڭناما كەپىلدىك بەرەدى», - دەلىنگەن حابارلامادا.

Abai.kz