قۇربان ايت مەرەكەسىن تويلاۋ قارساڭىندا الماتى قالاسىنىڭ باس مەملەكەتتىك سانيتار دارىگەرى جانداربەك بەكشين «الماتى قالاسىنىڭ اۋماعىندا قۇربان ايت مەرەكەسى كۇندەرى كوروناۆيرۋس ينفەكتسياسىنىڭ تارالۋىنا ىقپال ەتەتىن كوپشىلىك شارالاردى وتكىزۋگە تىيىم سالۋ تۋرالى» قاۋلىسىنا قول قويدى.

اتالعان قاۋلىعا سايكەس، الماتى قالاسىنىڭ اۋماعىندا قۇربان ايتتى مەرەكەلەۋ كۇندەرى تومەندەگى جايلارعا تىيىم سالىناتىنى حابارلاندى:

1) جەكەمەنشىك فورماسىنا قاراماستان، بارلىق ۇيىمداردا، سونىمەن بىرگە، جەكەمەنشىك ءۇي-جايلار جانە مەدرەسەلەردە كوپشىلىك شارالاردى وتكىزۋگە;

2) مال سويىسىن ۇيىمداستىرۋعا جانە وتكىزۋگە، الماتى قالاسىنىڭ اۋماعىندا اۆتوكولىكتەرمەن اكەلىنگەن مالداردى ساتۋعا جانە جەكە يەلىكتەگى ءۇي-جايلارىندا مال ساتۋ ;

3) 31 شىلدە مەن 2 تامىز ارالىعىندا الماتى قالاسىنىڭ ورتالىق مەشىتىمەن بەكىتىلگەن ونلاين رەجيمدە قۇربان شالۋدى جۇزەگە اسىراتىنداردان باسقا، مال ساتاتىن تسەحتار مەن بازارلاردىڭ جۇمىسى توقتاتىلادى.

سونىمەن بىرگە، الماتى قالاسىنىڭ پوليتسەيلەرى قر اشم ۆەتەرينارلىق باقىلاۋ جانە قاداعالاۋ كوميتەتىنىڭ اۋماقتىق ينسپەكتسياسىمەن بىرلەسىپ، 27.07.2020 ج باستاپ، 02.08.2020 ج ارالىعىندا الماتى قالاسىنا كىرەبەرىستەردە ونلاين رەجيمدە قۇرباندىق شالۋعا ارنالعانداردى قوسپاعاندا، قالا اۋماعىنا مالداردىڭ اكەلىنۋىن بولدىرماۋ جانە جولىن كەسۋ بويىنشا پوستتار ۇيىمداستىرىلادى.

سونىمەن بىرگە، قر اشم ۆەتەرينارلىق باقىلاۋ جانە قاداعالاۋ كوميتەتىنىڭ اۋماقتىق ينسپەكتسياسىمەن 27.07.2020 ج- 02.08.2020 ج ارالىعىندا الماتى قالاسىنىڭ اۋماعىندا مەملەكەتتىك ۆەتەرينارلىق-سانيتارلىق باقىلاۋ جانە قاداعالاۋ كۇشەيتىلەدى.

ج.بەكشين ايتۋىنشا، اتالعان شارالاردىڭ كوروناۆيرۋس ينفەكتسياسىنىڭ تارالۋىنىڭ الدىن الۋ ماقساتىندا قابىلدانىپ وتىر. وسى شارالار ارقىلى ادامدار ءبىر جەرگە كوپ جينالماۋىن قاداعالاماق.

جەكە ۇيدە قۇرباندىق شالۋعا بولماي ما؟

اتالعان قاۋلى جاريالانا سالا، كوپشىلىك اراسىندا «الماتىدا جەكە ادامدار قۇرباندىق شالۋعا بولماي ما» سۇراق تۋىنداعان. بىراق بەلگىلى ءدىنتانۋشى عالىم قايرات جولدىبايۇلى جەكە ۇيدە قۇرباندىق شالۋعا بولاتىنىن ايتتى.

«كەيبىر جۋرناليستەر بەكشيننىڭ ءسوزىن بۇرمالاپ، “جەكە ۇيدە قۇرباندىق شالۋعا بولمايدى” دەپ بەرىپ جاتىر. جەكە ۇيدە ەلدى جيناپ كوپشىلىك بولىپ قۇرباندىق شالۋعا بولمايدى. ال وتباسى مۇشەلەرى وزدەرى عانا شالا بەرسە، وعان رۇقسات»، - دەپ جازدى جولدىبايۇلى الەۋمەتتىك جەلىدەگى پاراقشاسىندا.

قۇربان شالۋعا ونلاين تاپسىرىس بەرۋگە بولادى

ال كارانتينگە بايلانىستى قالاي قۇرباندىق شالىپ، مۇقتاج ادامدارعا قالاي تاراتۋ كەرەك ەكەنىن قازاقستان مۇسىلماندارى ءدىني باسقارماسى ءتۇسىندىرىپ بەردى.

قمدب-نىڭ حابارلاۋىنشا، قۇربان ايت مەرەكەسىنە وراي Qurban2020.kz سايتىن ىسكە قوسىلعان. وسى سايت ارقىلى قۇربان شالۋعا ونلاين تۇردە تاپسىرىس بەرۋگە بولادى.

اتالعان سايتتىڭ كومەگىمەن ەل تۇرعىندارى ونلاين تۇردە قۇرباندىق مالىن تاڭداپ، تولەم جاساپ، كەيىن قالاسا فوتو جانە بەينە ەسەبىن سۇراتا الادى. سونداي-اق سايتتا قۇربان شالۋعا قاتىستى شاريعات جانە ءپاتۋا ءبولىمى ماماندارى دايىنداعان سۇراق-جاۋاپ تا بار كورىنەدى.

قۇرباندىققا شالىناتىن مالدىڭ ءبىرتۇتاس باعاسى دا بەلگىلەنگەن ەكەن. Qurban2020.kz سايتىندا ساق مالدىڭ باعاسى 50 مىڭ، ءىرى قارانىڭ باعاسى 350 مىڭ دەپ كورسەتىلگەن. ۇساق مالدى ءبىر ادام، ءىرى قارانى جەتى ادامعا دەيىن بىرىگىپ شالۋعا بولادى.

1 جاسقا تولماعان، 35-40 مىڭ تەڭگەنىڭ قويلارى شاريعات تالابىنا ساي كەلمەي قالۋى مۇمكىن

ال نۇر-سۇلتان قالاسىنىڭ باس يمامى ەربولات ءجۇسىپوۆتىڭ ايتۋىنشا، قۇربانعا شالىناتىن مالعا قويىلاتىن تالاپتار بار.

«نۇر-سۇلتان قالاسى بويىنشا قويدىڭ باعاسى 50 مىڭ، ءىرى قارانى 350 مىڭ دەپ بەردىك. بۇل جەردە قويدىڭ جاسىنا نازار اۋدارۋ كەرەك. 6 ايعا جەتپەگەن، ارىقتاۋ توقتىلاردىڭ ءوزىن 35-40 مىڭعا الۋلارىڭىز مۇمكىن. بىراق قوي مەن ەشكى 1 جاسار بولۋى كەرەك. ال 1 جاسار قويدىڭ باعاسى ءۇشىن 50 مىڭ وتە جاقسى باعا», - دەدى باس يمام.

ءبىر جاسقا تولماعان قويلار قۇرباندىقتىڭ ورنىنا جۇرمەي قالۋى مۇمكىن. 50 مىڭ تەڭگە - ەلورداداعى بازارلارداعى مالدىڭ ورتاشا باعاسى وسىنداي», - دەيدى ەلوردالىق باس يمام.

Abai.kz