ماگيستراتۋرا مەن دوكتورانتۋراعا تۇسۋشىلەر ءۇشىن قۇجاتتاردى قابىلداۋ مەرزىمى ۇزارتىلادى. بۇل تۋرالى ءبىلىم جانە عىلىم مينيسترلىگى حابارلادى. 

ەلىمىزدە كارانتين رەجيمىنىڭ ۇزارتىلۋىنا بايلانىستى ماگيستراتۋراعا ءتۇسۋ ءۇشىن كەشەندى تەستىلەۋ بۇرىن-سوڭدى مالىمدەلگەندەي 3 تامىز كۇنى ەمەس، 17 تامىزدا باستالادى. سونداي-اق دوكتورانتۋراعا ءتۇسۋ ءۇشىن قۇجاتتاردى قابىلداۋ مەرزىمى 10 تامىزعا دەيىن ۇزارتىلدى.

وقۋعا تۇسۋشىلەردىڭ جەكە كابينەتتەرىنە (ۇتو سايتىندا) كەشەندى تەستىلەۋدىڭ وتكىزىلۋ كۇنى، ۋاقىتى جانە ورنى كورسەتىلگەن جاڭا رۇقساتتامالار جىبەرىلەدى. كەشەندى تەستىلەۋدىڭ قورىتىندىسى بويىنشا كۋالىك تەستىلەنۋشىنىڭ جەكە كابينەتى ارقىلى ەلەكتروندىق نىساندا بەرىلەتىن بولادى.

كت وتكىزۋ ەرەجەلەرىنە قانداي وزگەرىستەر ەنگىزىلدى؟

2020 جىلى ماگيستراتۋراعا ءتۇسۋ ءۇشىن كت العاش رەت 18 وڭىرلىك تەستىلەۋ ورتالىعىنىڭ بازاسىندا ءاربىر تەستىلەنۋشى ءۇشىن دەربەس كومپيۋتەردى پايدالانۋ ارقىلى كومپيۋتەرلىك فورماتتا وتەدى. ءار كومپيۋتەر بەينەكامەرامەن قامتاماسىز ەتىلەدى. وسىلايشا، كت جۇرگىزىلۋىن باقىلاۋ جونىندەگى كوميسسيا اكادەميالىق ادالدىق قاعيدالارىنىڭ ساقتالۋىن قاداعالاي الادى.

كت قاتىسۋشىلارى سانيتارلىق-ەپيدەميولوگيالىق نورمالارعا سايكەس دەزينفەكتسيانىڭ بارلىق كەزەڭدەرىنەن وتەدى، سانيتارلىق قاۋىپسىزدىك شارالارى ساقتالادى. تەستىلەنۋشىلەردى كىرگىزۋ جانە وتىرعىزۋ كەزىندە ولاردىڭ اراسىندا كەمىندە 2 مەتر اراقاشىقتىق ساقتالادى.

ايتا كەتكەن ءجون، قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى ايماقتىق تەستىلەۋ ورتالىقتارىنىڭ دايىندىعىن تەكسەرگەن بولاتىن.

ءار قاتىسۋشى ءۇشىن تەستىلەۋ دەربەس باستالادى، ياعني تەستىلەنۋشى لەگتىڭ تولتىرىلۋىن كۇتپەيدى. كت بارىسىندا تەستىلەنۋشىلەر سۇراقتاردى وتكىزىپ جىبەرە الادى، كەلەسىسىنە اۋىسىپ، الدىڭعى سۇراقتارعا قايتا ورالا الادى جانە جاۋاپ نۇسقالارىن وزگەرتە الادى. كت اياقتالعاننان كەيىن تەستىلەنۋشىلەر جاۋاپتاردى دۇرىس جاۋاپتار حاتتاماسىمەن سالىستىرا الادى. سونىمەن قاتار تەستىلەۋ اياقتالعاننان كەيىن 30 مينۋتتىڭ ىشىندە ماگيستراتۋراعا ءتۇسۋشى ۇمىتكەرلەر اپەللياتسياعا بەرە الادى.

تەست تاپسىرمالارىنىڭ سانى مەن تەستىلەۋدى وتكىزۋ ۋاقىتىنا كەلەتىن بولساق، مۇندا وزگەرىستەر جوق: 3 ساعات 55 مينۋتتا 130 تەست تاپسىرماسىنا جاۋاپ بەرۋ قاجەت.

كوميسسيا وقۋعا ءتۇسۋشىنى تىيىم سالىنعان زاتتاردى الىپ وتۋگە تىرىسقانى ءۇشىن نەمەسە بوگدە ادام ارقىلى تەستىلەۋدى تاپسىرۋعا تىرىسقانى ءۇشىن كەشەندى تەستىلەۋگە جىبەرمەۋى مۇمكىن.

مەملەكەتتىك گرانتتاردىڭ سانى:

بيىل 38 مىڭنان استام ادام كەشەندى تەستىلەۋ تاپسىرۋعا نيەت ءبىلدىردى. 2019 جىلى ماگيستراتۋراعا تۇسۋگە تىلەك بىلدىرۋشىلەر سانى 30 579 ادامدى قۇرادى.

وسى جىلى قازاقستاندىق جوعارى وقۋ ورىندارىنىڭ 13 300 تۇلەگى ەڭبەك نارىعىندا سۇرانىسقا يە كادرلاردى دايارلاۋعا بولىنەتىن مەملەكەت قاراجاتى ەسەبىنەن جوعارى وقۋ ورنىنان كەيىنگى ءبىلىمدى تەگىن الا الادى.

دوكتورانتۋراعا ءتۇسۋ ءۇشىن قۇجاتتاردى تاپسىرۋ مەرزىمى:

كارانتين رەجيمىنىڭ ۇزارتىلۋىنا بايلانىستى دوكتورانتۋراعا قۇجاتتاردى قابىلداۋ 10 تامىزعا دەيىن جۇزەگە اسىرىلادى. دوكتورانتۋراعا ءتۇسۋ ەمتيحاندارىن 17-22 تامىز ارالىعىندا جوعارى وقۋ ورىندارى وزدەرى وتكىزەدى. دوكتورانتۋراعا قابىلداۋ 28 تامىزدا اياقتالادى. PhD ماماندارىن دايارلاۋعا ارنالعان مەملەكەتتىك گرانتتاردىڭ سانى 1 815 قۇرايدى.

ەمتيحانداردى وتكىزۋ كەزىندە مەديتسينالىق قىزمەتكەرلەردىڭ جۇمىسى ۇيىمداستىرىلادى، وقۋعا تۇسۋشىلەردى اۋديتوريالاردا وتىرعىزۋ بارىسىندا الەۋمەتتىك قاشىقتىق قامتاماسىز ەتىلەدى، سونداي-اق قاتاڭ ماسكا رەجيمى ساقتالادى.

ەستەرىڭىزگە سالا كەتسەك، COVID-19 پاندەمياسى جاعدايىندا اعىلشىن ءتىلىن ءبىلۋ IELTS حالىقارالىق تەستىن ءداستۇرلى فورماتتا تاپسىرۋ مۇمكىن بولماۋىنا بايلانىستى قر ءبىلىم جانە عىلىم مينيسترلىگىندە جوو تۇلەكتەرىنە ماگيستراتۋرا مەن دوكتورانتۋراعا ءتۇسۋ ءۇشىن Duolingo English تest جانە IELTS INDICATOR تاپسىرۋعا رۇقسات بەرەتىن بۇيرىققا قول قويىلدى.

Abai.kz