پرەزيدەنت جارلىعىمەن بۇگىن، 10-تامىز – «اباي كۇنى» بولىپ بەلگىلەندى!

«قازاعىم، قالىڭ ەلىم قايران جۇرتىم؟..»
(اباي)

اباي الدىنداعى پارىز

ءار ءارپى - نۇرلى، شۋاقتى،
ءبىر كورىپ جۇرەك ۇناتتى.
ابايدى قايتا وقىسام،
قازاقتىڭ ءوزى سياقتى.

سەزىمدى، كوزدى اربايدى-اۋ،
قانشا وقى - ءشولىڭ قانبايدى-اۋ.
بولمىسى، ويى، مىنەزى،
قازاقتان تيتتەي اۋمايدى-اۋ.

اۋمايدى-اۋ، ءتىپتى، اۋمايدى-اۋ،
وقىعان بەي-جاي قالمايدى-اۋ.
سان عاسىر بۇرىن بولسا دا
بۇگىنگى ساعان ارنايدى-اۋ.

ميىڭدى جۋىپ توت باسقان،
جوعىڭدى بىرگە جوقتاسقان.
بۇگىنگى بارشا قازاقتىڭ
ءار جۇرەك قىلىن ءدوپ باسقان.

ءبىر ساۋلە كوكتەن سەبەلەپ،
تاستايدى-اۋ تۇساپ، ورەلەپ…
قازاقتان قۇيىپ، سوققانداي
قازاقى بايلام كەرەمەت!

قازاق بوپ سىناپ، مىنەيمىن…
قازاق بوپ كۇلىپ، جۇدەيمىن…
ابايدى وقي بەرگەن سوڭ،
قازاق بوپ قايتا تۇلەيمىن!

ايتقانى - اتقان تاڭ با ەكەن؟
شەكەر مە ەكەن، بال ما ەكەن؟..
قازاقتا بولسىن قانشا اقىن،
ابايداي ءبىرى بار ما ەكەن؟..

ءار جولى - ناپ-ناق، ەپتى عوي،
كۇيدىرە ءسۇيىپ كەتتى عوي…
ابايعا تىلەك ارناۋعا
باتىلىم دا ازەر جەتتى عوي…

بۇلىقسىپ تۇر-اۋ بۇلا ءتۇن،
تاۋسىلدى كۇشىم، قۋاتىم…
وزىڭە ارناپ ءسوز ايتقان
كەشە گور، مەنى ۇلى اقىن؟..

"بولدىم، - دەي كورمە، - ەرمەگى…",
قينالىپ، ۇلىڭ تەرلەدى…
وزىڭە جازعان حۇسني-حات
كەشە گور، مەندەي پەندەنى؟

بۇگىننەن جولدار ارىزىم،
قايتارا دا الماس قارىزىم،
بۇل مەنىڭ ءسىزدىڭ الدىندا
ءتۇبى ءبىر وتەر پارىزىم!..

جۇماش كەنەباي كوكبورى

Abai.kz