كەزدەسۋ بارىسىندا قىرعىز تارابى مەملەكەتارالىق ىزدەۋدە جۇرگەن ەلىنىڭ بۇرىنعى پرەمەر-ءمينيسترى دانيار ۇسەنوۆتىڭ بەلارۋستە جاريا تۇردە ءجۇرۋىن ءتۇسىندىرۋدى تالاپ ەتكەن.
"بۇل ارەكەت قىرعىزستان مەن بەلارۋس قارىم-قاتىناسىنىڭ دامۋىنا قاۋىپ توندىرەدى. ءسىم ءتيىستى نوتا جولداپ، ەكس-پرەمەردى جانە باسقا دا ىزدەۋدەگى ادامداردى ۇستاپ، دەرەۋ قىرعىزستانعا ەكستراديتسيالاۋدى تالاپ ەتتى", - دەلىنگەن مالىمدەمەدە.
10 تامىزدا بەلارۋس ورتالىق سايلاۋ كوميسسياسى قازىرگى پرەزيدەنت الەكساندر لۋكاشەنكونىڭ جەڭىسكە جەتكەنىن مالىمدەدى. سول كۇنى ول "بەلارۋس ۇلتتىق بيوتەحنولوگيالىق كورپوراتسياسى" اگروكومپلەكسىنە بارعان. ول جاقتا لۋكاشەنكومەن سىرتقى كەلبەتى قىرعىزستاننىڭ بۇرىنعى پرەمەر-ءمينيسترى دانيار ۇسەنوۆكە ۇقسايتىن ادام ەرىپ جۇرگەن. ول 2010 جىلعى وقيعادان كەيىن ەلىنەن قاشىپ كەتكەن. وسىعان دەيىن دانيار ۇسەنوۆ اتى-ءجونىن دانيل ۋريتسكي دەپ وزگەرتىپ، بەلارۋس ازاماتتىعىن العانى جازىلعان.
Abai.kz
