قازىر الەمدە ۆيرۋسقا قارسى 100-دەن استام ۆاكتسينا ازىرلەنىپ جاتىر. كەمىندە ولاردىڭ ۇشەۋى سوڭعى كەزەڭدە، ياعني ەرىكتى ادامداردى سىناقتان وتكىزىپ جاتىر. دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) مالىمەتى بويىنشا، سىناققا مىڭداعان ادام قاتىسىپ جاتىر. بۇل زەرتتەۋلەر بىرنەشە ايعا سوزىلادى.

رەسەي – كوروناۆيرۋسقا قارسى ەكپەنى رەسمي تىركەگەن ءبىرىنشى مەملەكەت. بىراق رەسەيلىك جانە شەتەلدەگى بىرقاتار عالىمدار بۇعان كۇمانمەن قارايدى. ولار ەكپەنى سىناۋداعى ءۇشىنشى كەزەڭنىڭ تولىق اياقتالعانىنا سەنبەيدى. ددسۇ وتكەن اپتادا رەسەيدى ەكپە قاۋىپسىز بولۋى ءۇشىن بارلىق كەزەڭنەن تولىق وتۋگە شاقىرعان.

بىراق پۋتين رەسەيلىك ۆاكتسينا بارلىق كەزەڭنەن ءساتتى ءوتتى دەيدى. ول تىپتەن ءوزى جانە قىزى دا ەكپە سالدىرعانىن جەتكىزدى. "جاقىندا ەكپەنى جاپپاي حالىققا قولدانامىز دەگەن ۇمىتتەمىز" دەگەن پۋتين ول ادامدارعا تەك ءوز قالاۋىمەن عانا سالىنعانى ءجون دەدى.

ۆاكتسينا گامالەي اتىنداعى ورتالىقتا جانە زەلەنوگرادتاعى "بيننوفارم" كومپانياسىندا شىعارىلادى. مۇنى رەسەيدىڭ ينۆەستيتسيالىق قورى قارجىلاندىرادى.

ەكپەنى 2021 جىلدىڭ 1 قاڭتارىنان باستاپ اينالىمعا شىعارماق. ونى اينالىمعا شىعارۋ مەن ءۇشىنشى كەزەڭ قاتار وتەدى دەدى گامالەي اتىنداعى ورتالىق ديرەكتورى الەكساندر گينتسبۋرگ.

رەسەي ۇكىمەتى ۆاكتسينانى الدىمەن مەديتسينالىق قىزمەتكەرلەر مەن مۇعالىمدەرگە، سونىمەن بىرگە دەنساۋلىعى قاۋىپ-قاتەردە تۇرعان ازاماتتارعا سالىناتىنىن مالىمدەگەن.

بۇگىنگى كۇنگە دەيىن رەسەيدە COVID-19 ۆيرۋسىن جۇقتىرعاندار سانى 860 مىڭعا جەتتى. 14 300 ناۋقاس قايتىس بولعان.

Abai.kz