كەڭەس داۋىرىندە تۋعاندار جاقسى بىلەدى، "حالىقتار دوستىعى" دەگەن يدەولوگيانىڭ ۇلكەن قۇرالىنىڭ ءبىرى بولاتىن. 15 وداقتاس رەسپۋبليكانىڭ استاناسىن، جاعراپياسىن، حالقىن، ءداستۇرىن ساناعا سىڭدىرمەسەك تە كوكەيگە توقيتىنبىز.

"اقپىز، قارا، سارىمىز،
اعايىنبىز ءبارىمىز!" - دەگەندى ول كەزدە حالىقتار دوستىعىنىڭ ۇرانى ەكەنىن جاتتاپ العامىز. (قازىر عوي مەن بۇل سوزدەردى البان اعايىننىڭ ۇرانى دەيمىن. الباننىڭ رۋلارىن بىلەتىندەر تۇسىنەدى)

1-ماي مەرەكەسى بولعان سايىن تەك قازاقتار تۇراتىن اۋىل وسى 15 رەسپۋبليكانىڭ ۇلتتىق كيىمىن تاۋىپ، تىككىزىپ كيەتىن داستۇرگە اينالعان. "قارلىعىشتىڭ ۇياسىن، قۇمىرسقانىڭ يلەۋىن بۇزبا!" - دەگەن تيىمدارمەن بىرگە "حالىقتار دوستىعىن بەرىك ۇستا!" - دەيتىن وسيەت جادىمىزعا سىڭەتىن. "اسسابملەيا" دەگەن ول كەزدە جوق ەدى. "ارقاشان كۇن سونبەسىندى" ءبىزدىڭ قاينار اۋىلىنىڭ بالالارى قازاق، ورىس، فرانتسۋز، نەمىس تىلىندە شىرقاپ، ارتقى جاعىندا وداقتاس ەلدەردىڭ كوستيۋمىن كيگەن حور قوسىلاتىن. ساياساتتان حابارى جوق بالا كوڭىل سول "مىزعىماس وداقتىڭ دوستىعىنا" سەندىك. "قازاقستان پيونەرى" گازەتى ارقىلى بارلىق ەلدىڭ وقۋشىلارىمەن حات الىسىپ، دوستاسىپ تۇردىق. "حالىقتار دوستىعى" دەگەن ۇعىم بالا كەزدەگى ويىنشىقتاردان باستالاتىن. تومەندەگى كەڭەس ۇكىمەتىنىڭ كەزىندە شىققان قۋىرشاقتار دالەل سوعان.

ول دوستىق تەاتر مەن كينو رەپەرتۋارىندا دا بولدى. ادەبيەتتە دە، سۋرەت پەن ساۋلەت ونەرىندە دە. قىسقاسى كۇندىز-ءتۇنى سۇڭقىلدادى دا تۇردى. تەك قازاق ءۇشىن ەمەس، بارلىق ۇلت ءۇشىن. "ارتەك" لاگەرى بۇكىلوداقتىق ەدى. وندا بارعان كۇننەن وسى دوستىق، تاتۋلىق ايتىلاتىن. سول جەردە قانشاما ەلدىڭ ۇل-قىزىمەن دوستاستىق. كەتەرىمىزدە قيماي قوشتاستىق...

ال ەندى مىنا "اسسامبلەيا" دەگەنىڭ ناۋرىزدا عانا الاڭعا شىعاتىن، ۇلتتىق كيىم مەن ۇلتتىق داستارحان كورسەتەتىن دەكوراتسيا عانا، سوسىن "قازاق تىلىنە جاقسى سويلەيتىن وزگە ۇلت وكىلىن ماقتاپ، توبەگە كوتەرەتىن" جالعان سىپايىگەرشىلىك مەن ءۇشىن.

ءبىزدىڭ ەلدە كەڭەس ۇكىمەتىنەن قالعان "وزگە ۇلتتىڭ سالت-ءداستۇرىن قۇرمەتتە، وكىلىن وزىڭدەي كور" - دەگەن تەك قازاقتارعا عانا ايتىلاتىن، تەك قازاقتان عانا تالاپ ەتىلەتىن بۇيرىق بولىپ تۇر. وزگەلەرگە قازاقتى قادىرلەۋدەن كورى اياققا تاپتاۋ باستى ماقسات سياقتى.
بەكجان دوسىمنىڭ ۇندەۋىنە ءۇن قوسام سوندىقتان!

قازاقستان حالىقتارى اسسامبلەياسى تاراتىلسىن!

ۋوت تاك!

اسقار نايمانتاەۆتىڭ جازباسى

Abai.kz