قازاقتىڭ ەل ساناسىنان دا، تۇرمىسىنان دا ۇمىتىلى باستاعان قولونەرىمىزدى قايتا جاڭعىرتۋعا ۇلەس قوسىپ، سول ارقىلى ءتول مادەنيەتىمىزدىڭ ساقتالۋىنا دا سەپتىگىن تيگىزىپ جۇرگەن ازاماتتار از ەمەس. ولاردىڭ قولىنان شىققان بۇيىمدار ەلىمىزدى ايتپاعاندا، شەتەلدىك كورمەلەر مەن بايقاۋلاردا دا جوعارى باعالانىپ ءجۇر. سونداي ساۋساعىنان ونەر تامعان جانداردىڭ ءبىرى شايحى-يسلام ماعاۋياۇلى.
شايحى-يسلام ماعاۋياۇلى 1992 جىلى ارال قالاسىندا دۇنيەگە كەلگەن. 2000 جىلى ارال قالاسىنداعى №71 مەكتەپتىڭ تابالدىرىعىن اتتادىم. 2007 جىلى دەنساۋلىعىنا بايلانىستى ارال قالالىق №2 كاسىپتىك ليتسەيىنە «فەرمەر» ماماندىعى بويىنشا وقۋعا قابىلداندى.
– ءۇشىنشى سىنىپتا وقىپ جۇرگەن كەزىمنەن ساز بالشىقتان جاساعان ءتورت تۇلىك مالدىڭ، اڭ-قۇستاردىڭ بەينەسىن جاساي باستادىم. سول تالانتىمدى بايقاعان اكەم ارال قالاسىندا تۇراتىن قازاقستان سۋرەتشىلەر وداعىنىڭ مۇشەسى قۇلمانبەتوۆ قۇدايبەرگەنگە شاكىرت ەتىپ اپاردى. سودان بەرى سول كىسىنىڭ قاسىندا ءجۇرىپ، زەرگەرلىك اعاش ۇستالىعى، تەرى وڭدەۋ، تەرىگە سۋرەت سالۋ، ءمۇيىز سۇيەكتەن ءارتۇرلى بۇيىمدار، ادەمى كادەسىيلار جاساۋدى ۇيرەندىم، – دەيدى.
تۇراقتى جۇمىستان بولەك، قوسىمشا ونەرىن ورىستەتۋ ءۇشىن 2014 جىلى جەكە كاسىپكەرلىك اشىپ، ەلگە شاماسى كەلگەنشە ونەرىمەن قىزمەت كورسەتۋدە. سونداي-اق قىزىلورداداعى «اقمەشىت» كوپسالالى گۋمانيتارلىق-تەحنيكالىق كوللەدجىندە «ديزاين» ماماندىعى بويىنشا ءبىلىم الدى.
بيىل "لوگوس-قاراعاندى مۇگەدەكتەردى وڭالتۋ ورتالىعى" قوعامدىق بىرلەستىگىمەن "شىعارماشىل جاستاردى قولداۋ بويىنشا ءىس-شارالاردى ۇيىمداستىرۋ" الەۋمەتتىك جوباسى جۇزەگە اسىرىلۋدا. جوبا دارىندى جاستارعا، ونىڭ ىشىندە حالىقتىڭ الەۋمەتتىك وسال توپتارىنا قولداۋ كورسەتۋ ءۇشىن جاعداي جاساۋ ماقساتىندا گرانتتار بەرۋگە باعىتتالعان. الەۋمەتتىك جوبا قر اقپارات جانە قوعامدىق دامۋ مينيسترلىگىنىڭ قولداۋىمەن "ازاماتتىق باستامالاردى قولداۋ ورتالىعى" كەاق مەملەكەتتىك گرانتى شەڭبەرىندە ىسكە اسىرىلۋدا. شايحى-يسلام ماعاۋياۇلى وسى جوبا اياسىندا گرانتقا ۇمىتكەر بولىپ وتىر.
جوبا اياسىندا 14-29 جاس ارالىعىنداعى دارىندى قازاقستاندىقتارعا رەسپۋبليكالىق بايقاۋلار مەن فەستيۆالدارعا قاتىسۋعا 200 مىڭ تەڭگە كولەمىندە 30 گرانت جانە حالىقارالىق بايقاۋلار مەن فەستيۆالدارعا 700 مىڭ تەڭگە كولەمىندە 20 گرانت ۇتىپ الۋعا مۇمكىندىك بەرىلەدى. بۇل جوباعا ءتۇرلى ونەر سالاسىنىڭ ماماندارى قاتىسا الادى، مىسالى، تسيرك ونەرى سياقتى باعىتتارى دا نازاردان تىس قالماعان. ءبىزدىڭ كەيىپكەرىمىز دە وسى گرانتتار جوباسىنا قاتىسۋعا بەل بۋدى.
شايحى-يسلامنىڭ وسىعان دەيىن جەتكەن جەتىستىكتەرى از ەمەس. 2012 جىلى ‹‹قىزىلوردا وبلىسىندا تۋريزم سالاسىن دامىتۋ پەرسپەكتيۆالارى›› تاقىرىبىنداعى رەسپۋبليكالىق سەمينار-كەڭەس اياسىندا وتكىزىلگەن قولونەر شەبەرلەرى كورمەسىنە بەلسەنە قاتىسقانى ءۇشىن قىزىلوردا وبلىسىنىڭ تۋريزم، دەنە شىنىقتىرۋ جانە سپورت باسقارماسىنىڭ العىس حاتىمەن ماراپاتتالدى. 2013 جىلى قىركۇيەكتە وبلىستىق ء‹‹بارىمىز بىردەيمىز – كەمسىتۋدى بىلمەيمىز›› وبلىستىق كونكۋرسىنا قاتىسىپ، ‹‹ۇزدىك جاسامپاز›› نوميناتسياسى بويىنشا 2-ورىن يەگەرى بولدى. سول جىلى تاۋەلسىزدىك كۇنىنە وراي، «بيزنەستىڭ جول كارتاسى – 2020» باعدارلاماسىنىڭ اياسىندا ۇيىمداستىرىلعان «ۇزدىك جاس كاسىپكەر» بايقاۋىندا I-ءشى دارەجەلى ديپلومىمەن ماراپاتتالدى. 2014 جىلدىڭ 12-ءشى تامىزىندا وبلىس اكىمىنىڭ قولىنان وبلىستىق "سىر ءۇمىتى" جاستار سىيلىعى سەرتيفيكاتىن الدى.
2017 جىلى «ەكسپو-2017» حالىقارالىق كورمەسى اياسىندا استانا قالاسىندا وتكىزىلگەن قىزىلوردا وبلىسىنىڭ مادەنيەت قۇندەرىنىڭ جوعارى دەڭگەيدا ۇيىمداستىرىلۋىنا قوسقان ەرەكشە ۇلەسى ءۇشىن وبلىس اكىمىنىڭ العىس حاتىمەن ماراپاتتالدى. «قازاقستاننىڭ ۇزدىك تاۋارى - 2018» وڭىرلىك-كورمە بايقاۋىنا بەلسەنە قاتىسقانى دا نازاردان تىس قالماي، تيىسىنشە ماراپاتپەن باعالاندى.
2018 جىلى ەلباسىنىڭ «بولاشاققا باعدار – رۋحاني جاڭعىرۋ» باعدارلاماسى اياسىندا وتكەن ەرەكشە جانداردىڭ شىعارماشىلىعىنا ارنالعان ءۇىىى وبلىستىق «جۇرەك جىلۋى» ونەر فەستيۆالىندە «قولونەر» ناميناتسياسى بويىنشا باس جۇلدەگەر اتاندى.
بىلتىر شىعىستىڭ جارىق جۇلدىزى، جاستاردىڭ جالىندى جەتەكشىسى عاني مۇراتباەۆتىڭ 117 جىلدىعى اياسىندا مەملەكەتتىك جاستار ساياساتى مەن قوعامدىق جۇمىستاردا بەلسەندىلىك تانىتىپ، رۋحاني-الەۋمەتتىك ۇردىستەردىڭ دامۋىنا قوسقان سۇبەلى ۇلەسى ءۇشىن رەسپۋبليكالىق «عاني سىيلىعى» ديپلومى جانە مەدالىمەن ماراپاتتالدى.
شايحى-يسلام ونەرىن ورىستەتۋمەن قاتار، قولونەرگە قۇشتار ءارى قولىنىڭ ەبى بار جاستاردىڭ باسىن بىرىكتىرىپ، ولاردى باۋلۋدى جوسپارلاپ ءجۇر.
– بىلگەنىمنەن بىلمەگەنىم كوپ دەپ ويلايمىن، سوندىقتان ۇنەمى ىزدەنىس ۇستىندە جۇرەمىن. الداعى ۋاقىتتا ءوزىمنىڭ ونەرىمدى دامىتىپ، ءارتۇرلى بۇيىمدارىممەن حالقىمدى قۋانتاتىنىما سەنەمىن!– دەيدى ول.