قازاقستان رەسپۋبليكاسىنىڭ مەملەكەت باسشىسى قاسىم-جومارت توقاەۆ 2020 جىلدى ەرىكتىلەر جىلى (ۆولونتەرلەر جىلى) دەپ جاريالادى. پرەزيدەنت اتالعان جارلىققا 2019 جىلدىڭ تامىز ايىندا قول قويعان بولاتىن.

سودان بەرى تۋرا ءبىر جىل ءوتتى. مەملەكەت باسشىسى ءوزى باسا نازار اۋدارىپ وتىرعاندىقتان 2020 جىلدى ۆولونتەرلەر جىلى رەتىندە اتاپ وتۋگە دايىندىق جۇمىستارى تىڭعىلىقتى جۇرگىزىلدى. پرەزيدەنت قول قويعان جارلىق جاريالانا سالا، ءار سالاداعى جاۋاپتى قىزمەتكەرلەر جاۋاپكەرشىلىكپەن جۇمىس ىستەپ، ۆولونتەرلەر جىلىن ءوز دەڭگەيىندە وتكىزۋدى ماقسات تۇتتى.

ۆولونتەر بولۋ استە ەرىككەننىڭ نەمەسە ىستەرگە ءىس تاپپاعاننان كەيىن ىستەيتىن ارەكەت ەمەس. ەرىكتى بولىپ ءوز ەلىنىڭ، ءوز مەملەكەتىنىڭ وركەندەۋىنە ۇلەس قوسۋ ءارىبىر سانالى ازاماتتىڭ ازاماتتىق بورىشى رەتىندە اتاۋعا بولادى. قازىرگى عاسىردا ىستەگەن جاقسى ارەكەتىنە اقى تالاپ ەتپەي، قايتا جانىن سالىپ وزگەلەرگە كومەكتەسۋ ەكىنىڭ ءبىرىنىڭ قولىنان كەلە بەرمەيتىن ۇلگىلى ءىس. شىنىن ايتۋ كەرەك، بۇگىنگى قوعامدا وزگەگە تۇگىل ءوزى ءۇشىن جۇمىس ىستەمەي الماي، بەكەر جۇرگەن جاندار از ەمەس. وسىنداي كەزەڭدە ءوز ەركىمەن ەرىكتى بولىپ، مەملەكەت باسشىسىنىڭ ۇندەۋىنە ءۇن قوسىپ، ەلگە ءبىر پايدامدى تيگىزسەم دەپ جۇرگەن ەرىكتىلەردىڭ ارەكەتى ەرلىكپەن بىردەي.

ءبارىمىز بىلەتىندەي، ەل بيلىگى كوپتەن بەرى ەلدەگى از قامتىلعان وتباسىلار مەن كوپبالالى جانۇيالارعا كومەك قولىن سوزىپ كەلەدى. كومەككە مۇقتاج وتباسىلارعا مەملەكەت تاراپىنان جاسالىپ جاتقان قولداۋ از ەمەس. مۇنى اقپارات قۇرالدارى مۇمكىندىكتىڭ جەتىكەنىنشە ءناسيحاتتاپ كەلەدى.

بيىل قازاقستان حالقى ءۇشىن عانا ەمەس، تۇتاس الەم جۇرتشىلىعى ءۇشىن اۋىر جىل بولدى. جىل باسىنان بەرى تۇتاس دۇنيەنى تابانىنان تىك تۇرعىزعان كوروناۆيرۋس پاندەمياسى ءبىراز ادامدى ابىگەرگە سالعانى شىندىق. وسىنداي قيىن-قىستاۋ كۇندە ەڭ الدىمەن زارداپ شەگەتىن تاعى دا سول الەۋمەتتىك جاعدايى تومەن تۇرعىندار ەكەنى ءسوزسىز. اسىرەسە كوپ بالالى وتباسىلار مەن تۇرمىستىق ءال-اۋحاتى تومەن تۇرعىندار پاندەميا تۇسىندا ءبىراز قينالىپ قالدى.

جۇمىسىنان ايىرىلىپ، تابىسىنان قاعىلعان قاۋىمعا قول ءۇشىن سوزۋ ءۇشىن مەملكەت قولدان كەلگەننىڭ ءبارىن جاسادى. ۇكىمەت ميلليونداعان قارجى ءبولىپ، ەل حالقىنىڭ قيىن كۇندەردەن قينالماي شىعۋىنا جاعداي جاسادى. ءبىزدىڭ بۇگىنگى ءسوز ەتەرىمىز بۇل ەمەس. ءبىز وسىنداي كۇندە ەرىكتىلەردىڭ ەرلىككە پارا-پار يزگى ىستەرى جايلى ءسوز ەتكەلى وتىرمىز.

ەل بيلىگىمەن، ۇكىمەتپەن قاتار ەرىكتىلەر قاۋىمى دا قىسىلعان حالىققا قول ءۇشىن سوزىپ كەلەدى. اتاپ ايتقاندا، اتاقتى «سامۇرىق-قازىنا» كومپانيالار توبىنىڭ ەرىكتىلەرى ەلىمىزدەگى كومەككە مۇقتاج وتباسىلارعا ءوز ەرىكتەرىمەن ازىق-تۇلىك جەتكىزىپ بەردى. اتاپ ايتقاندا، ۆولونتەرلەر كوپبالالى وتباسىلارعا، مۇگەدەك بالا اسىراپ وتىرعان وتباسىلارعا جانە جالعىز باستى قارت ادامداردى نازارعا الدى.

اتاپ ايتقاندا، ەل استاناسى نۇر-سۇلتان قالسى مەن باستىس ايماقتاعى اقتاۋ قالالارىندا تۇراتىن سەكسەن بەس وتباسى «قايىرىمدىلىق مارافونى» قايىرىمدىلىق اكتسياسى بويىنشا، گۋمانيتارلىق كومەك الدى. بۇل گۋمانيتارلىق كومەك ازىق-تۇلىك سەبەتتەرى تۇرىندە بەرىلدى.

ەرىكتىلەر جوعاردا اتالعان ەكى وڭىردە عانا ەمەس، تۇتاس ەل كولەمىندە كومەككە مۇقتاج جاندارعا جان اياماي كومەكتەسىپ جاتىر. مۇنىڭ بۇقارالىق اقپارات قۇرالدارىندا جاريالانعان ناقتىلى اقپاراتتار. ءبىز بۇگىن سول اقپاراتتاردىڭ ءبىر پاراسىن عانا نازارلارىڭىزعا ۇسىنىپ وتىرمىز.

ءبىز جوعارىدا ايتقانداي، 2020 جىل «سامۇرىق-قازىنا» ۇلتتىق ءال-اۋحات قورىندا دا ۆولونتەرلىك جىل رەتىندە بەكىتىلگەن بولاتىن.

اجار ابديەۆا،

الەۋمەتتىك ءوزارا ءىس-قيمىل جانە كوممۋنيكاتسيا ورتالىعىنىڭ جوبالىق مەنەدجەرى:

«ءبىزدىڭ مىندەتىمىز-مۇقتاج ادامدارعا كومەك جانە قولداۋ كورسەتۋ. ءىس - شارانىڭ ماقساتى - قوعامنىڭ، اسىرەسە جاستاردىڭ سانالى ويلاۋىن قالىپتاستىرۋعا ۇلەس قوسۋ جانە ۆولونتەرلىك قىزمەتتى جەتىلدىرۋگە جاردەمدەسۋ».

مەملەكەت باسشىسى ءوزى باستاما بوىلپ، جارايالاعان ەرىكتىلەر جىلىندا ەلىمىزدىڭ جاس بۋىن وكىلدىرى ايانىپ قالعان جوق. تۇتاس ەل كولەمىندە كوپتەگەن ۆولونتەرلىك بىرلەستىكتەر، كومپانيالار قۇرىلىپ، جۇمىس جاساپ كەلەدى. SK Volunteer كومپانيالار توبىنىڭ ەرىكتىلەر ليگاسى «ەرىكتىلەر جىلىندا» قۇرىلدى. ولار بارشا ەل ازاماتتارى مەن «سامۇرىق-قازىنا» كومپانيالار توبىنىڭ بارلىق قامقور قىزمەتكەرلەرىن ءوزارا بىرىكتىرىپ وتىر. قازاقستان رەسپۋبليكاسىنىڭ كەز-كەلگەن ازاماتى بەلگىلەنگەن سايتقا كىرىپ، ارنايى ءوتىنىش جازىپ ەرىكتى بولىپ تىركەلە الادى.

«سامۇرىق-قازىنا» كومپانيالار توبىنىڭ قور توبىندا «ەرىكتىلەر جىلىنا» ۆولونتەرلىك ءتورت نەگىزگى باعىت بويىنشا ۇيىمداستىرىلادى. اتاپ ايتقاندا، Qamqor باعىتى ەلدەگى كومەككە مۇقتاج ادامدارعا قامقورلىق جاساۋدى ماقسات تۇتادى. ال Umit توبى قوعامدىق ۆولونتەرلىك سانالادى. سونداي-اق، Asylmura باعىتى بويىنشا قازاقستان تاريحىن ساقتاۋعا قولعابىس جاسالادى. ال Taza Kazakhstan باعىتى بويىنشا، تابيعاتتى ايالاۋ باعىتىندا جۇمىس جاسالدى.

ءسوز سوڭىندا ايتارىمىز، مەملەكەت باسشىسى قاسىم-جومارت توقاەۆ 2020 جىلدى ەرىكتىلەر جىلى (ۆولونتەرلەر جىلى) رەتىندە بەكەر اتاعان جوق. بيىلدى ۆولونتەرلەر جىلى دەپ جاريالاۋىنىڭ استارىندا، تۇتاس قوعامدى بىرىكتىرۋ، ەلدىڭ ەرتەڭى بولعان جاستاردى وتانسۇيگىشتىككە تاربيەلەۋ، جاقسىلىققا جەتەلەۋ، ۇيىمشىلدىققا، ەڭبەكقورلىققا تاربيەلەۋ سەكىلدى يگى ماقساتتاردىڭ جاتقانى ءسوزسىز.

ەل جاستارى دا ەل اعالارىنىڭ ءۇمىتىن جەردە قالدىرعان جوق. مەملەكەت باسشىسىنىڭ ۇندەۋىنە ءۇن قوسىپ، ەرىكتىلەر جىلىنىڭ كوركىن قىزدىردى. تۇتاس ەل اۋماعىندا ەرىكتىلەردىڭ يگى ءىسى جولعا قويىلدى. ۆولونتەرلەردىڭ بىلەك سىبانا كىرىسۋىنىڭ ارقاسىندا كوپتەگەن ماسەلە وڭ باعىتتا شەشىلدى. جۇمىلا كوتەرگەن جۇك جەڭىل دەگەندەي، ەرىكتىلەردىڭ ەڭبەگى ەشقاشان ەلەۋسىز قالمايتىنى ءسوزسىز. ەل ءۇشىن ەرىنبەي ەڭبەك ەتكەن ەرىكتىلەر قاشاندا ماقتاۋعا لايىق.

Abai.kz