تاۋەلسىزدىكتىڭ 29 جىلىندا مەملەكەت دامۋى ءۇشىن قابىلدانعان اۋقىمدى جوبالار از بولعان جوق. سونىڭ ىشىندە قازاقستاننىڭ تىلدىك، رۋحاني، مادەني، الەۋمەتتىك جانە گەوگرافيالىق اسپەكتىلەرىن تولىق قامتىعان باعدارلاما – ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلاماسى ەكەنى داۋسىز.

اتالعان باعدارلاما اياسىندا كۇنى بۇگىنگە دەيىن اتقارىلعان جۇمىستاردىڭ دا اۋقىمى اۋىز تولتىرىپ ايتارلىقتاي. بيىل تامىز ايىنىڭ ورتا تۇسىنا قاراي قر اقپارات جانە قوعامدىق دامۋ مينيسترلىگى اتالمىش مەملەكەتتىك باعدارلامانى جۇزەگە اسىرۋ تەتىكتەرى جاڭارتىلىپ، بۇگىنگى ۋاقىت تالابىنا ساي رەفورمالاناتىنىن مالىمدەگەن ەدى. ۆيتسە-مينيستر بولات تىلەپوۆ: «رۋحاني جاڭعىرۋ بويىنشا قولعا الىنعان جوبالار ەلگە قىزىقتى ءارى پايدالى بولۋى كەرەك»، دەپ سويلەگەن ەدى.

تاۋەلسىز قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ ءوزىنىڭ باعدارلامالىق ماقالاسىندا: «رۋحاني جاڭعىرۋ بۇل – ۇلتتىق سانانىڭ ءارتۇرلى پۇلىستەرىن ۇيلەستىرىپ، جاراستىراتىن ماڭىزدى تەتىك. جاڭعىرۋدىڭ باستى شارتى – ۇلتتىق كودتى ساقتاي ءبىلۋ. ونسىز جاڭعىرۋ – جاڭعىرۋ بولمايدى. قۇرى جاڭعىرىق بولادى»، - دەگەن.

ال سول ۇلتتىق كود دەگەننىڭ ءوزى – قازاقتىڭ مىڭ جىلدىقتاردان جالعاسىپ كەلە جاتقان ءومىر تۇرمىسى، سالت-ساناسى، ادەت-عۇرپى، ءتىلى مەن ءدىلى، ءدىنى مەن ءداستۇرى، عىلىمى مەن ءبىلىمى، وزىنە عانا ءتان ۇلتتىق بولمىس-سيپاتى. ال ونى جاڭعىرتۋ دەگەنىڭىز – قازاقتىڭ ۇلتتىق بولمىسىن بۇگىنگى ۋاقىت تالابىنا ساي يكەمدەۋ.

وسىعان بايلانىستى،  ەلىمىزدە اتقارىلىپ جاتقان ءارتۇرلى اۋقىمدى شارۋالار ءالى كۇنگە جالعاسۋدا. سونىڭ ءبىرى – پاۆلودار وبلىسىنىڭ ەرتىس اۋدانىنداعى سالت-ءداستۇردى ۇلىقتاۋعا ارنالعان جوبا بولىپ وتىر.

تامىز ايىندا پاۆلودار وبلىسىنىڭ ەرتىس اۋدانىندا، يسا بايزاقوۆ اۋىلىندا «وتباسىلىق سالت-ءداستۇر» اتتى شارا ۇيىمداستىرىلىپتى. «رۋحاني جاڭعىرۋ» باعدارلاماسى اياسىندا ۇيىمداستىرىلعان اتالمىش شارا ونلاين فورماتتا وتكەن. بۇل تۋرالى وبلىستىق «رۋحاني جاڭعىرۋ» جوبالىق كەڭەسى حابارلادى.

شار ۇيىمداستىرۋشىلارىنىڭ ايتۋىنشا، مۇنداي جوبا ەل-جۇرتتىڭ، اسىرەسە وسكەلەڭ ۇرپاقتىڭ سالت-داستۇرگە دەگەن سۇيىسپەنشىلىگى مەن قىزىعۋشىلىعىن وياتادى. شارانىڭ ءتۇپ ماقساتى - حالقىمىزدىڭ بايىرعىدان بەرى ۇزىلمەي جالعاسىپ كەلە جاتقان ءداستۇر-عۇرپى ارقىلى جاستاردى بىلىمگە، شىعارماشىلىققا ءھام ادامگەرشىلىككە باۋلۋ.

ەرەجە بويىنشا، ەكى وتباسى قازاقتىڭ سالت-داستۇرىنە، نانىم-سەنىم، ادەت-عۇرپىنا قاتىستى اقپاراتتىق جانە تانىمدىق سيپاتتاعى بەينە روليكتەر ءتۇسىرۋى ءتيىس بولعان. اتالعان روليكتە وزدەرى كورسەتىپ وتىرعان سالتقا قاتىستى كەڭ-مولىنان اقپارات ايتۋى كەرەك.

ءسويتىپ، ونلاين جارىسقا قاتىسۋشى ءبىر وتباسى قازاقتىق «تۇساۋكەسەر» ءراسىمىن كورسەتسە، ەكىنشى وتباسى «قۇراق كورپە تىگۋ» ءراسىمىن كورسەتكەن. بارلىق بەينە روليكتەر الەۋمەتتىك جەلىلەردەگى رەسمي اككاۋنتتاردا جاريالانىپ وتىرعان.

شارا ۇيىمداستىرۋشىلارىنىڭ ءبىرى، بايزاقوۆ اۋىلدىق مادەنيەت ءۇيىنىڭ قىزمەتكەرى ايكۇمىس كۇلاحمەتوۆا: «ءار ەلدىڭ، ءار ۇلتتىق وزىنە عانا ءتان سالت-ءداستۇرى، ىرىم-تيىمدارى، نانىم-سەنىمدەرى بولادى. ول – سول ۇلتتىڭ ايناسى ىسپەتتى. ءبىزدىڭ قازاقتا دا وزىنە ساي ەرەكشەلىكتەر از ەمەس. ءوزىمىزدىڭ اتا-بابالارىمىزدان جالعاسىپ كەلە جاتقان ءداستۇرىمىز بار. ولاردىڭ وسكەلەڭ ۇرپاققا بەرەر تاربيەسى دە مول. سوندىقتان، وسىنداي شارالاردىڭ ءجيى ۇيىمداستىرىلىپ تۇرعانى ۇرپاق تاربيەسى ءۇشىن بەرەرى مول قازىنا بولماق»، - دەيدى.

Abai.kz