بيىل قر پرەزيدەنتىنىڭ جولداۋىندا ايتىلعان تاپسىرمالاردى ورىنداۋعا بيۋدجەتتەن 300 ميلليارد تەڭگە قاجەت. ال، كەلەر جىلى 1,6 ترلن تەڭگە بولىنەدى. بۇل تۋرالى قر پرەمەر ءمينيسترىنىڭ ءبىرىنشى ورىنباسارى ءاليحان سمايىلوۆ ايتتى. 

«پرەزيدەنتتىڭ جولداۋدا ايتىلعان بىرقاتار تاپسىرمالارى قوسىمشا قارجىنى تالاپ ەتەدى. اعىمداعى جىلدىڭ رەسپۋبليكالىق بيۋدجەتىندە بەلگىلى ءبىر قاراجات قاراستىرىلعان. مىسالى، 13 جاڭا جۇقپالى اۋرۋلار اۋرۋحاناسىن قۇرۋعا 30 ملرد تەڭگە قاراستىرىلعان. ۇكىمەت رەزەرۆىنەن الەۋمەتتىك وسال وتباسىلاردان شىققان بالالارعا كومپيۋتەرلىك تەحنيكا ساتىپ الۋعا 70 ملرد تەڭگە ءبولىندى», — دەدى ءا. سمايىلوۆ.

قازىرگى ۋاقىتتا 2020 جىلعى بيۋدجەتتى ناقتىلاۋ شەڭبەرىندە كەلەر جىلى شىعىستاردى قوسىمشا قامتاماسىز ەتۋ بويىنشا جۇمىستار اتقارىلىپ جاتىر. اتاپ ايتقاندا، مەديتسينا قىزمەتكەرلەرىنە قوسىمشا ۇستەمەاقى، ءدارى-دارمەك ساتىپ الۋ جانە باسقا دا شىعىندار بويىنشا قامتاماسىز ەتۋ قاراستىرىلعان.

«الدىن الا باعالاۋ بويىنشا، اعىمداعى جىلى قوسىمشا قاجەتتىلىك شامامەن 300 ملرد تەڭگەنى قۇرايدى. ال 2021 جىلدىڭ بيۋدجەتىندە پرەزيدەنت تاپسىرمالارىن ورىنداۋعا جولداۋدان 1,6 ترلن تەڭگە قاراستىرىلعان. ءبىرىنشى كەزەكتە بۇل مەديتسينالىق قىزمەتكەرلەردىڭ، مۇعالىمدەردىڭ جالاقىسىن ارتتىرۋعا، شوب نەسيەلەرى بويىنشا پايىزدىق مولشەرلەمەلەردى سۋبسيديالاۋعا، رەسپۋبليكالىق ماڭىزى بار جولداردى سالۋ مەن قايتا جاڭارتۋعا، “اۋىل — ەل بەسىگى” باعدارلاماسىنا جۇمسالاتىن شىعىستار»، — دەدى سمايىلوۆ.

Abai.kz