قولدارىنا «ەندى قايدا وينايمىز؟»، «مىناداي جاعدايدا قالاي ساباق وقىتامىز؟»، «پرەزيدەنت ءبىزدى ەستيدى دەپ ۇمىتتەنەمىز» دەگەن جازۋى بار پلاكات ۇستاپ شىققان تۇرعىندار «قارسىمىز!»، «توقاەۆ، ءبىزدى تىڭدا» دەپ ايقايلادى. بىرنەشە پوليتسيا قىزمەتكەرى جينالعان تۇرعىنداردى سىرتتاي باقىلاپ تۇردى. كەيبىر تۇرعىندار بالكوندارىنا « توقاەۆ، ءبىزدى تىڭدا»، «قۇرىلىسقا قارسىمىز» دەگەن جازۋى بار پلاكات ءىلىپ قويدى.

«نوماد» كوپقاباتتى ءۇيىنىڭ تۇرعىنى مۇحتار تۇگەلوۆ تۇرعىنداردىڭ باستاماشىل توبى اتىنان سويلەپ، مامىر ايىنان بەرى 700 ادام قول جيناپ، اكىمدىك پەن پرەزيدەنتكە تاپسىرعانىمەن ءالى كۇنگە ەشكىمنىڭ نازار اۋدارماعانىنا قىنجىلدى.

- ءۇش مارتە اكىمدىكپەن كەزدەستىك. بىزگە ءوزارا كەلىسىم بولماي، ەشقانداي قۇرىلىس بولمايتىنى ايتىلعان. بىراق ءبىز جاۋاپ الا الماعان ماڭىزدى ءبىر سۇراق بار. ول - وسى قۇرىلىستىڭ زاڭدىلىعى. پروكۋراتۋراعا دا، سىبايلاس جەمقورلىقپەن كۇرەس اگەنتتىگىنە دە، قالالىق ساۋلەت قۇرىلىس باسقارماسىنا دا جازدىق. ازىرگە تۇششىمدى جاۋاپ جوق، - دەيدى ول.

جينالعانداردىڭ بارلىعى ونى قولداپ، بىرنەشە تۇرعىن ءۇي جيناقتالعان اۋدانداعى №59 مەكتەپ ماڭىنان قوسىمشا قۇرىلىس سالعانىمەن ونىڭ اسەرى جوق ەكەنىن، بالا سانىنىڭ بار بولعانى 3 پايىزعا ازايعانىن ايتتى. ارالارىندا قۇرىلىس كومپانياسىن قولداعاندار دا بولدى.

BI Group كومپانياسى قۇرىلىس سالاتىن الاڭقايدى قورشاپ، سىرتىنا «مەملەكەتتىك مەكتەپ» دەگەن جارناما ءىلىپ قويعان. بىراق تۇرعىندار وعان سەنبەيتىندەرىن جانە قۇرىلىس كومپانياسى كوپقاباتتى ۇيمەن قوسا جوسپارلاعان 900 ورىندىق مەكتەپ اۋدان پروبلەماسىن شەشپەيتىنىن ايتتى. تۇرعىنداردىڭ ايتۋىنشا بۇل جەرگە 2000-نان كەم ەمەس ورىندىق مەكتەپ قاجەت

- ءبىز تۇرعىن ءۇي قۇرىلىسىنا قارسىمىز. ونىڭ ورنىنا بۇل جەرگە سايا باق پەن وقۋشىلار سارايىن سالسىن. ءبىزدىڭ تالابىمىز وسى. ەگەر ءبىز بۇعان دەيىن جينالىپ، قۇرىلىس جۇمىسىنا كەدەرگى كەلتىرە الساق ەندى ونى توقتاتۋعا دا كۇشىمىز جەتەدى، - دەيدى ولجاس ءبىلالوۆ.

«نوماد» كەشەنىنىڭ تۇرعىنى انار بەكباۋوۆا ۋچاسكەلىك پوليتسيانىڭ ۇيىنە بارىپ، بالاسىنان بالكونىنا ءىلىپ قويعان پلاكاتتى الىپ تاستاۋدى تالاپ ەتكەنىن ايتىپ، قۇقىق قورعاۋ ورگانى وكىلى ارەكەتىنە نارازىلىق ءبىلدىردى.

- ءبىزدىڭ بالالارىمىز ەشقاشان بۇل ەلدە كوشباسشى بولا المايدى. سەبەبى، ولار وقيتىن مەكتەپتە ءبىلىم دەڭگەيى وتە تومەن. وقۋشىلار سارايى بولماعاندىقتان بوس ۋاقىتتارىن قالاي وتكىزەتىندەرىن بىلمەيدى. كوپ ايەلدەر بالالارى ءۇشىن جۇمىسسىز ۇيدە وتىرۋعا ءماجبۇر. ويتكەنى، ولار بالالارىن قالانىڭ ەكىنشى شەتىندەگى ۇيىرمەلەرگە اپارادى، - دەيدى ول.

ازاتتىق ءتىلشىسى قالا بيلىگىمەن دە، BI Group كومپانياسى وكىلدەرىمەن دە سويلەسە المادى.

نۇر-سۇلتان قالاسىنىڭ سول جاق جاعالاۋىنداعى ءبىر بىرىمەن ءيىن تەرەسە ورنالاسقان «نوماد»، «سارمات»، «ينفينيتي» كوپقاباتتى ءۇي تۇرعىندارى بيىلعى مامىردا دا ءدال وسى تالاپپەن جينالعان ەدى. ول جولى دا نۇر-سۇلتان قالاسى اكىمدىگى ازاتتىقتىڭ تۇرعىن ءۇي قۇرىلىسىن سالۋعا بەرىلگەن رۇقسات تۋرالى ساۋابىنا جاۋاپ بەرمەگەن بولاتىن. ال ۆI Group كومپانياسىنىڭ وكىلى قۇرىلىس كومپانياسىنىڭ تۇرعىن ءۇي سالۋ تۋرالى جوسپارى قالانى دامىتۋدىڭ باس جوسپارىندا قاراستىرىلعانىن ايتقان ەدى.

ينتەرنەتتەگى اشىق اقپارات كوزدەرىندەگى دەرەككە سۇيەنسەك، BI Group كومپانياسى حالىق قارسى بولعان قابانباي باتىر - سىعاناق كوشەسى قيىلىسىنداعى بوس تۇرعان الاڭداعى سالىنۋى ءتيىس تۇرعىن ءۇي قۇرىلىسىنىڭ ۇلەسىن ساتۋدى باستاپ تا جىبەرگەن.

Abai.kz