قازاقستاندىق اتا-انالار قر پرەزيدەنتى قاسىم-جومارت توقاەۆ پەن ءبىلىم جانە عىلىم ءمينيسترى اسحات ايماعامبەتوۆكە پەتيتسيا جازىپ، قول جيناپ جاتىر. مەملەكەت باسشىسى مەن ەلدىڭ باس پەداگوگىنا جولدانعان حاتتا ولار قاشىقتىقتان وقىتۋعا قارسى ەكەندىكتەرىن ءبىلدىردى.

اتا-انالار قر كونستيتۋتسياسىنىڭ 30 بابىنا سايكەس، وقىتۋدىڭ تولىق كولەمدە بولعانىن تالاپ ەتۋدە. «ورتا مەكتەپتەگى ءبىلىم تسيفرلى سۋرروگاتپەن الماستىرىلماي، كۇندىزگى فورماتتا شىنايى تۇردە بەرىلۋى ءتيىس. تسيفرلى تەحنولوگيالار تەك قوسىمشا ءادىس رەتىندە عانا قولدانىلۋى كەرەك»، – دەلىنگەن پەتيتسيادا. اتا-انالار قاشىقتىقتان وقۋدىڭ بالا دەنساۋلىعىنا، پسيحيكاسىنا زيان ەكەنىن ايتىپ مىنانداي تالاپتار قويعان:

1. قازاقستاندىق بالالارعا مەكتەپكە بارىپ، سىنىپتا وتىرىپ ءبىلىم الۋعا مۇمكىندىك بەرۋ.
2. اتا-انالاردىڭ كەلىسىمىنسىز ءبىلىم بەرۋ ۇردىسىنە سىناق-تاجىريبەلەر جاساماۋ.
3. ءبىلىم بەرۋدەگى تسيفرلى تەحنولوگيالاردىڭ قاۋىپسىزدىگىن شۇعىل تۇردە تاۋەلسىز عىلىمي ساراپتاۋدان وتكىزۋ.
4. ەلەكتروندى فورماتتا وقىتۋدى تەك كەلىسىممەن جۇزەگە اسىرۋ.
5. قاشىقتىقتان وقىتۋدىڭ كەڭەيتىلگەن سانيتارلىق نورمالارىن ازىرلەۋ.
6. ەلەكتروندى فورماتتا وقىتۋدى قوعامدىق باقىلاۋعا الۋ.
7. تسيفرلى فورماتتا ءبىلىم الاتىن وقۋشىلار دەنساۋلىعىن ساقتاۋدىڭ ستراتەگياسىن ازىرلەۋ.
8. قاشىقتىقتان وقىتۋدى زاڭداستىرۋ ءۇشىن «دوڭگەلەك ۇستەل» جيىندارى مەن قوعامدىق تىڭداۋلار وتكىزۋ.

دەرەككوز: arasha.kz

Abai.kz