قازاقستاندا پارلامەنت سايلاۋى قاشان وتەدى؟ ەشكىم بىلمەيدى!
بيلىك سايلاۋ وتەتىن مەرزىمدى رەسمي تۇردە حالىققا ءالى كۇنگە جاريا ەتكەن جوق. سوعان قاراماستان “نۇروتان” پارتياسى ىشكى سايلاۋ - پرايمەريز وتكىزىپ، الداعى سايلاۋالدى ناۋقانعا قىزۋ دايىندىقتارىن باستاپ كەتكەنىن كۇللى جۇرت كورىپ وتىر. ناقتىلاپ ايتساق، پرەزيدەنتتىڭ پارتياسى “پرايمەريز” دەگەندى جەلەۋ ەتىپ، رەسپۋبليكالىق دارەجەدە استىرتىن ۇگىت-ناسيحاتتى جۇرگىزىپ وتىر! 

دامىعان ەلدەردە قوعام مۇنداي ادىلەتسىز ارەكەتكە بىردەن توسقاۋىل قويىپ، “بيلىك پەن پارتيانىڭ اۋىز جالاسۋى” دەپ شۋ شىعارار ەدى. ال بىزدە ىقپالدى ساياسي ۇيىمنىڭ ەگويستىك ارەكەتىنە پارتيالار دا، قوعام دا اسا ءمان بەرمەدى. بيلىك ءوزى جەتەكشىلىك ەتەتىن پارتياعا نەگە باسىمدىق بەرەدى؟ وزگە پارتيالار باستى باسەكەلەستەرىنىڭ قۋلىق ارەكەتىن نەگە سىنامادى؟ قوعام نەگە دەر كەزىندە رەاكتسيا بىلدىرمەدى؟ ورتالىق سايلاۋ كوميسسياسى نەگە مۇنداي زاڭسىزدىققا جول بەرەدى؟ سايلاۋالدى ۇگىت-ناسيحات ستارتى بۇكىل پارتياعا تەڭ دارەجەدە جۇرگىزىلۋى كەرەك ەمەس پە دەگەن كوكەيتەستى ساۋالداردىڭ قوعامدا بولماۋى بىزدەگى ساياسي بويكۇيەزدىكتىڭ ءبىر كورىنىسى. جانە ەلدە رەسمي تۇردە تىركەلگەن 6 پارتيا دا بيلىككە باعىنىشتى ەكەنىن ايقىنداي تۇسەدى. 

شىنايى ساياسي باسەكەلەستىك جوق جەردە دامۋ بولا ما، ايتىڭىزدارشى؟ مىناداي كوزبوياۋشىلىقپەن الدا قانداي پارلامەنتتىك بيلىك قۇرىپ قارىق بولامىز؟ “نۇروتان” نەگە مۇنداي ارەكەتكە بارىپ وتىرعانىن ءتۇسىنۋ قيىن ەمەس. باتپاققا تىرەلىپ قۇردىمدا قالعان كەمەلەرىن “تاپ-تازا جاڭا تولقىن” شايىپ كەتىپ، ساياسات مۇحيتىنا تاعى ءبىر 30 جىلعا جورىققا اتتانساق دەيتىن ىشكى ارمانى بار. ءىشى ءشىرىپ كەتكەن كەمەگە كىمدى وتىرعىزساڭ دا، كوپ ۇزاماي ورتا جولدا باتىپ كەتەتىنىن قايدان ءبىلسىن...

دينا ەلگەزەكتىڭ جازباسى

Abai.kz