بۇگىن ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ وتىرىسى ءوتىپ، وندا قازاقستان رەسپۋبليكاسى توتەنشە جاعدايلار ءمينيسترى قىزمەتىنە تاعايىنداۋ ءۇشىن يۋري ءيليننىڭ كانديداتۋراسى كەلىسىلدى.

جۋىردا عانا مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا توتەنشە جاعدايلار مينيسترلىگىن قايتا قۇرۋدى تاپسىرعان بولاتىن.

وسىعان وراي، «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭنىڭ 22-1 بابىنا سايكەس، يۋري ءيليننىڭ كانديداتۋراسى ءماجىلىستىڭ بەيىندى كوميتەتىنە ۇسىنىلدى.

اعىمداعى سەسسيادا ماجىلىستە ەنگىزىلگەن مينيسترلەردى كەلىسۋدىڭ جاڭا نىسانىنا سايكەس، يۋري يلين دەپۋتاتتاردىڭ سۇراقتارىنا جاۋاپ بەرىپ،  وزىنىڭ جۇمىسىن ۇيىمداستىرۋ تۋرالى وي-پىكىرىن جەتكىزدى.

اتاپ ايتقاندا، دەپۋتاتتار «كازاۆياسپاس» قىزمەتى، توتەنشە جاعدايلار تۋرالى ەسكەرتۋدىڭ دايەكتىلىگىن ارتتىرۋ، بەلسەندى شارالاردى ازىرلەۋ، وندىرىستىك، مۇناي، جارىلۋ قاۋپى جوعارى كاسىپورىنداردا ءورت قاۋىپسىزدىگىن قامتاماسىز ەتۋ بويىنشا جۇمىستاردىڭ تيىمدىلىگىن ارتتىرۋ ماسەلەلەرىن كوتەردى. سونىمەن بىرگە ءماجىلىس دەپۋتاتتارى پالاتانىڭ قاراۋىندا جاتقان زاڭ جوبالارى بويىنشا دەپۋتاتتىق كورپۋسپەن جەدەل ءوزارا جۇمىس ىستەۋدىڭ قاجەتتىلىگىنە نازار اۋداردى.

كوميتەت وتىرىسىنىڭ ناتيجەسى بويىنشا ءتيىستى قورىتىندى قابىلداندى. قۇجاتتا ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتى يلين يۋري ۆيكتوروۆيچتىڭ كانديداتۋراسىن قاراي وتىرىپ، ونى قازاقستان رەسپۋبليكاسىنىڭ توتەنشە جاعدايلار ءمينيسترى قىزمەتىنە تاعايىنداۋعا ۇسىنۋعا بولادى دەپ سانايدى.

Abai.kz