قر اقپارات جانە قوعامدىق دامۋ مينيسترلىگى جانىنداعى «ازاماتتىق باستامالاردى قولداۋ ورتالىعى» «Birgemiz Qamqor» جوباسىن جۇزەگە اسىرۋدا. سەمەي قالاسىنداعى «ينتەللەكتۋالدى جاستار قاۋىمداستىعى» قوعامدىق قورىنىڭ توراعاسى، ۆولونتەر قۋانىش مولداقاشەۆ ورتالىقتىڭ 300 000 تەڭگە كولەمىندەگى گرانتىن ۇتىپ الدى. قوعام بەلسەندىسى وسى جانە باسقا دا جوبالاردىڭ اياسىندا اتقارىلعان قايىرىمدىلىق ىستەر جايىندا باياندايدى.

قۋانىش مولداقاشەۆ:

- بيىل «ازاماتتىق باستامالاردى قولداۋ قورى» ۆولونتەرلىكتىڭ نەگىزگى 7 باعىتى بويىنشا جوبالاردى جۇزەگە اسىردى. ءبىزدىڭ ۇيىم جەكە-جەكە تاقىرىپتار بويىنشا شاعىن گرانتتار ۇتىپ الدى. ول قاراجاتقا ۆولونتەرلىك جۇمىسقا قاجەتتى زاتتاردى ساتىپ الىپ، قايىرىمدىلىق ىستەردى اتقاردىق. تاريحي ەسكەرتكىشتەردى قورعاۋ مەن تاريحتى جاڭعىرتۋعا باعىتتالعان «اسىل مۇرا» جوباسى بار. سول بويىنشا ەكى باعىتتا جۇمىس اتقارىپ جاتىرمىز.

ءبىرىنشىسى، «تازا ەسكەرتكىش» دەپ اتالادى. سەمەيدەگى ەسكەرتكىشتەرگە بارىپ، تازالىق جۇمىستارىن ۇيىمداستىرىپ، بوياپ-سىلاپ قالپىنا كەلتىرەمىز. ماقساتى - ەسكەرتكىشتەردى ساقتاۋ، جۇرتتىڭ نازارىن سوعان اۋدارتۋ، جاستارعا ەسكەرتكىشتەردىڭ نە ءۇشىن قويىلعانىن، ونىڭ ماڭىزدىلىعىن ءتۇسىندىرۋ.

ەكىنشىسى، «امانات» دەگەن جوبا. ول ەسكەرتكىشتەرگە مونيتورينگ جۇرگىزۋگە باعىتتالعان. ءبىز ونىڭ اياسىندا ەسكەرتكىشتەرگە قاتىستى قالا تۇرعىندارىنىڭ اراسىندا ساۋالناما جۇرگىزدىك. جينالعان مالىمەتتىڭ بارلىعىن قالالىق مادەنيەت جانە تىلدەردى دامىتۋ بولىمىنە جولداپ وتىرامىز. مەملەكەتتىك ورگان ءبىزدىڭ زەرتتەۋگە قاتىستى ءوز قورىتىندىسىن جاسايدى. ەسكەرتكىشكە كوڭىل بولىنبەسە، ءتيىستى شەشىمدەر قابىلدايدى، قارجى بولەدى دەگەن سياقتى. قورشاعان ورتانى قورعاۋعا جانە ەكولوگيا ماسەلەسىن شەشۋگە باعىتتالعان «تازا الەم» دەگەن جوبامىز بار.

قازىر وكىنىشكە وراي، تۇرمىستىق قالدىقتار مەن كۇل-قوقىس سۇرىپتالماعاندىقتان قورشاعان ورتا لاستانىپ جاتىر. ەگەر دۇرىس سۇرىپتالاتىن بولسا، قوقىستى وڭدەۋگە بولادى. ءبىز ءتۇرلى-ءتۇستى قاپتار دايىنداپ ونى سەنبىلىكتەردە تۇرعىندارعا تاراتىپ، قوقىستى سۇرىپتاۋعا بولاتىنىن تۇسىندىرەمىز. ارينە، قالا جۇرتىنىڭ ءبارىن مۇنداي قاپتارمەن قامتاماسىز ەتۋ مۇمكىن ەمەس.

بۇل شارانىڭ ماقساتى - ءتۇسىندىرۋ، ناسيحات جۇمىسى. جالعىزباستى قارتتار مەن زەينەتكەرلەرگە كومەك كورسەتۋگە باعىتتالعان «قولداۋ» دەپ اتالاتىن جوبانى دا ىسكە اسىرىپ جاتىرمىز. پاندەميا كەزىندە مەملەكەتتىك قىزمەتتەردى ۇيدەن شىقپاي الۋ وزەكتى بولدى. قارتتار مەن زەينەتكەرلەر كومپيۋتەردىڭ ءتىلىن بىلمەگەندىكتەن وسى تۇرعىدا قينالدى. ءبىز جوبانىڭ اياسىندا ولارعا مەملەكەتتىك قىزمەتتى ونلاين الۋعا بولىستىق. «الەۋمەتتىك كەرۋەن» دەگەن جوبانىڭ اياسىندا اۋىل تۇرعىندارىنا بارىپ، مەملەكەتتىك باعدارلامالار بويىنشا ءتۇسىندىرۋ جۇمىستارى جۇرگىزىلدى. ال، «ەكىنشى دەم»، «1+1» جوبالارى كوروناۆيرۋس جانە ونكولوگيامەن اۋىرعان ناۋقاستاردى ساۋىقتىرۋعا باعىتتالعان. جالپى، مەملەكەتتىڭ ازاماتتىق باستامالاردى قولداۋى ءبىزدى ىنتالاندىرادى، ۆولونتەرلىك قوزعالىستىڭ دامۋىنا سەپتىگىن تيگىزەدى.

Abai.kz