قازاننىڭ كورشى جاتقان قىرعىز جۇرتى بيلىك اۋىستىردى. 4 قازاندا وتكەن پارلامەنت سايلاۋىنان كەيىنگى جالپى حالىقتىق نارازىلىقتاردان سوڭ پرەزيدەنت جەەنبەكوۆ باستاپ، تۇگەل اپپاراتى، پرەمەر-مينيستر باستاپ، ۇكىمەت مۇشەلەرى، قولىندا قۇزىرەتى بار بيلىك ورگاندارىنىڭ ءبىراز باسشىلارى دوعارىسقا كەتتى. ءبىر بىشكەكتىڭ وزىندە ءبىر كۇندە ءۇش رەت اكىم اۋىسقانىن كوردىك. اۋىس-ءتۇيىس ءالى اياقتالعان جوق. قايتادان پارلامەنت جانە پرەزيدەنت سايلاۋلارى وتەتىن بولدى.

وسىلايشا، ايىر قالپاقتى اعايىن تاۋەلسىزدىك تاريحىنداعى ءۇشىنشى «توڭكەرىستى» جاسادى. بىراق، قىرعىز بيلىگى بۇل ساياسي پروتسەسسكە «توڭكەرىس» دەگەن باعا بەرمەيتىنىن اڭعارتتى. قازىر قىرعىز رەسپۋبليكاسىنىڭ پرەزيدەنتى جانە پرەمەر-ءمينيسترى مىندەتتەرىن اتقاراتىن سادىر جاپاروۆ: «توڭكەرىس بولمادى. بيلىك بەيبىت جانە زاڭدى تۇردە اۋىستى»، - دەپ مالىمدەگەن.

حوش. قىرعىزستانداعى بۇل قوعامدىق-ساياسي وقيعالار قازاق اقپاراتتىق كەڭىستىگىندە اجەپتاۋىر تالقى بولدى. ساياسي ساراپشىلار: «قىرعىزداعى نارازىلىقتار دەموكراتيالىق جولمەن باستالىپ، سوڭى وحلوكراتيامەن اياقتالدى. بيلىكتى كەتىرگەندەردىڭ ءوزى بيلىككە تالاسا باستادى. ساياسي تۇراقسىزدىق بولدى»، دەسىپ جاتتى.

شىنىندا قىرعىزداعى «قازان توڭكەرىسى» قالاي ءوتتى؟ ءۇش رەتكى توڭكەرىس قىرعىزستانعا، قىرعىز حالقىنا نە بەردى؟ نەگە ۇيرەتتى؟ جاقسىلىعى نە؟ كەمشىلىگى نە؟  سادىر جاپاروۆ كىم؟ قازاقستان مەن قىرعىزستاننىڭ بيلىك ساياساتى ەندى قاي باعىتتا ءوربيدى؟ قىرعىزدار قازاقستاننان نە ۇيرەنۋى كەرەك؟ قازاقتار قىرعىزستاننان نە ۇيرەنۋى كەرەك؟

ءبىز قىرعىز كونستيتۋتسياسىنىڭ اتاسى، جوگوركۋ كەنەش (پارلامەنت) دەپۋتاتى، «اتا مەكەن» پارتياسىنىڭ ليدەرى ومىربەك تەكەباەۆپەن از-كەم اڭگىمەلەسكەن ەدىك.

مالىمەت:

ومىربەك شەركەشۇلى تەكەباەۆ.

بيىل جەلتوقساندا 62 جاسقا تولادى. قىرعىز ساياساتكەرى. جوگوركۋ كەنەشتىڭ (پارلامەنت) 6 مارتە دەپۋتاتى. «اتا مەكەن» پارتياسىنىڭ ليدەرى.

اسقار اقاەۆ، قۇرمانبەك باكيەۆ پەن المازبەك اتامباەۆتاردىڭ پرەزيدەنتتىگى كەزىندە بيلىكتىڭ باستى وپپونەنتى بولعان. بىرنەشە مارتە قىرعىزستان پرەزيدەنتتىگىنە ۇمىتكەر بولعان. جوگوركۋ كەنەشتى باسقارعان.

اقاەۆتى بيلىكتەن كەتىرگەن «قىزعالداق رەۆوليۋتسياسى» كەزىندە دە، باكيەۆتى كەتىرگەن «ءساۋىر رەۆوليۋتسياسى» كەزىندە دە شەشۋشى مىندەتتەردى اتقارعان. 2016 جىلى ءوز جاقتاستارىمەن بىرگە اتامباەۆ رەجيمىنە قارسى شىعىپ، كونستيتۋتسيانى وزگەرتۋگە موراتوري جاريالاۋدى ۇسىنعان. 2016 جىلدىڭ اقپانىندا ونىڭ ۇستىنەن قىلمىستىق ءىس قوزعالىپ، تۇرمەگە قامالعان. ال قىرعىز ساياساتشىلارى مەن حالىقارالىق قاۋىمداستىق بۇل ءىستىڭ قولدان ۇيىمداستىرىلعانىن ايتىپ، ايىپتاعان.

- ومىربەك شەركەشۇلى، ءسىز قاماۋدا بولعان كەزدە قازاق اقىنى اۋىت مۇقيبەك سىزگە ارناپ «مانداتسىز پرەزيدەنت» دەگەن پوەما جازعانىن بىلەسىز... ول پوەما العاش بولىپ «Abai.kz» اقپاراتتىق پورتالىندا جاريالاندى. بۇگىن سىزبەن تىلدەسۋىمىزگە دە اۋكەڭنىڭ كومەگى تيگەنىن ايتا كەتۋىمىز كەرەك... اۋكەڭنەن وزگە قازاق ساياساتكەرلەرىمەن، قازاقستانمەن ءسىزدى نە بايلانىستىرادى؟

- مەن تۇرمەدە بولعاندا دوستارىم، پارتيالاستارىم مەنى قولداپ، تۇرمەدەن شىعارىپ الۋ ءۇشىن ءارتۇرلى ارەكەتتەر جاسادى. كۇشىمىز تەڭ ەمەس ەدى. ءبىر جاقتا – اتامباەۆتىڭ جەكە رەجيمى، ەكىنشى جاقتا – «اتامەكەنشىلەر». بىراق ءبىز ەلگە سەندىك. ۋاقىت ءبىز جاقتا ەكەنىنە سەندىك. وسىنداي تار كۇندەردىڭ بىرىندە قازاقستاندا ءبىر اقىن تەكەباەۆ تۋرالى «مانداتسىز پرەزيدەنت» دەگەن پوەما جازىپتى دەگەن اقپارات شىقتى. ول پوەمانىڭ ءماتىنىن ماعان تۇرمەگە جەتكىزىپ بەردى. اۋىت مۇقيبەكتىڭ بۇل پوەماسى ماعان ۇلكەن قولداۋ بولدى. ءبىزدىڭ پارتيالاستارعا ۇلكەن دەم بەردى.

قىرعىزدا: «باسمايىلدىڭ قىسقانىن جىگىت بىلمەيدى، ات بىلەدى. ەر جىگىتتىڭ مىقتىسىن جاقىن بىلمەيدى، جات بىلەدى» («توسكە ايىلدىڭ باتقانىن يەسى بىلمەس، ات بىلەر. ەر جىگىتتىڭ قادىرىن اعايىن بىلمەس، جات بىلەر» – قازاقشا نۇسقاسى), دەگەن ماقال بار. بۇل قىرعىزدىڭ مەنتاليتەتىن كورسەتەدى. قازاق اقىنىنىڭ بۇل پوەماسى قىرعىزدارعا وبەكتيۆتى، ماڭىزدى كورىندى. ءبىز ءوز ىشىمىزدە ءبىر-بىرىمىزبەن تالاسىپ-تارتىسساق تا، سىرتتان بەرىلگەن باعاعا اسا كوڭىل بولەمىز. سوندىقتان، بۇل پوەما اسەر ەتتى.

وسىدان كەيىن، ءبىزدىڭ پارتيالاستار اۋىت مۇقيبەكپەن بايلانىسىپ، حات-حابار الماسىپ تۇردى. مەن تۇرمەدە جاتقاندا مەنىڭ 60 جىلدىق مەرەيتويىمدى پارتيالاستار وتكىزدى. اۋىت سول تويعا كەلىپ، ەكس-پرەزيدەنت، ەكس-پرەمەرلەرمەن بىرگە قۇرمەتى قوناق بولىپ، قۇتتىقتاپ كەتتى. مەن تۇرمەدە وتىرعاندا دا، ءۇي-ىشىمەن كەلىپ، مەنىمەن جولىققان.

اۋىت مۇقيبەك قىرعىزستاندا بولىپ جاتقان جاڭالىقتاردىڭ بارلىعىن انشا-مىنشا قىرعىز پوليتولوگتارىنا قاراعاندا جاقسى بىلەدى. ءوز پىكىرىن، رەاكتسياسىن ءبىلدىرىپ تۇرادى. ول وسىلايشا قىرعىز ساياسي لاندشافىنداعى تۇراقتى فيگۋراعا اينالدى. قىرعىزستاندىق بولىپ قالدى دەسەك تە بولادى.

مەن 30 جىلعا جۋىق جوگوركۋ كەنەشتە دەپۋتاتپىن. ءارتۇرلى ەلارالىق، پارلامەنتارالىق ۇيىمداردا قازاقستاندىق كوللەگالارىممەن جولىعىپ، بايلىنىسىپ تۇرامىن. كوپ دەپۋتاتتارىن، ساياساتشىلارىن جاقسى تانيمىن. ۋاعىندا پرەزيدەنت نۇرسۇلتان نازارباەۆپەن دە جەكە جولىققان ەدىم.

قازاقتار ءبىزدىڭ ءبىر تۋعان ەل. قازاقستان ءبىزدىڭ كورشى مەملەكەت. قىرعىزدار ءاردايىم قازاقستانعا جاي عانا كورشى ەمەس، تۋعانىمىز دەپ قاراپ، مامىلە قىلىپ كەلدىك.  ءبىزدىڭ ءتىلىمىز، ءدىنىمىز، مادەنيەتىمىز، تاريحىمىز، ءبىر. دەمەك، ءبىزدىڭ بولاشاعىمىز دا ءبىر! ءبىزدىڭ مەملەكەتتىڭ سىرتقى ساياساتى دا وسىنى باسشىلىققا الىپ وتىرىپ جۇمىس جاسايدى. كىم بيلىككە كەلسە دە، سىرتقى ساياساتتاعى وسى ۆەكتور ساقتالادى!

- ەگەر 4 قازاندا باستالعان وقيعالاردى توڭكەرىس دەپ ايتۋعا بولاتىن بولسا، قىرعىز جۇرتى تاۋەلسىزدىك تاريحىندا ءۇشىنشى رەت توڭكەرىس جاسادى. بيلىك الماستىردى. قازىر قىرعىزستاندا بيلىك تۇراقتالدى ما؟ جەەنبەكوۆ ءوز ەركىمەن كەتتى مە؟ الدە كەتىردى مە؟

- 4 قازاندا قىرعىزستاندا رەۆوليۋتسيا بولدى. ونىڭ سەبەبى، پرەزيدەنت سوورونباي جەەنبەكوۆ سايلاۋدىڭ قورىتىندىسىن بۇرمالاپ، بيلىكتى ۋزۋرپاتسيالاۋعا ارەكەت ەتتى. بۇل سايلاۋدا بيلىك تاراپىنان، كريمينالدىق توپتار تاراپىنان داۋىس ساتىپ الۋلار، قىسىم-قورقىتۋلار بولدى.

ونىڭ ناتيجەسىندە بيلىكتىڭ ءۇش پارتياسى 120 ورىندىق پارلامەنتتىڭ 107-ءسىن ءوزارا ءبولىسىپ الدى.  قىرعىزستاننىڭ كونستيتۋتسياسىندا: «بىردە-ءبىر پارتيا 120 ورىننىڭ 65-تەن اسا مانداتىن الا المايدى»، - دەگەن انتيمونوپوليالىق شەكتەۋ بار. مىنە، وسى شەكتەۋدى اينالىپ ءوتۋ ءۇشىن بيلىك ءوز ادامدارىن 3-4 پارتياعا ءبولىپ، سايلاۋعا قاتىستى.

مۇنى ەل دە، ءبىز دە كوردىك. جەەنبەكوۆتەردىڭ بيلىكتى مونوپولياعا اينالدىرىپ العىسى كەلگەنىنە ەل قارسى شىقتى. اياعىندا سايلاۋدىڭ قورىتىندىلارى جويىلدى. ۇكىمەت تە، پرەزيدەنت تە وتستاۆكاعا كەتتى. قازىر ۋاقىتشا ۇكىمەت قۇرىلىپ، ونىڭ باسشىسى سادىر جاپاروۆ پرەزيدەنتتىڭ دە مىندەتتەرىن اتقارىپ جاتىر.

- ءۇش رەتكى توڭكەرىس قىرعىزستانعا، قىرعىز حالقىنا نە بەردى؟ نەگە ۇيرەتتى؟ جاقسىلىعى نە؟ كەمشىلىگى نە؟

- وسى ساۋالدى قىرعىزستاندىقتار دا ماعان كوپ قويىپ جاتىر. ويتكەنى، «بۇگىنگى ساياسي جۇيەنىڭ اۆتورى» دەپ، كەمشىلىككە مەنى كىنالاپ جاتىر. جاقسىسىن كورمەيدى.

ءبىز نەگە قول جەتكىزدىك؟ قىرعىزستاندا ناعىز سايلاۋ جولىمەن پرەزيدەنتتەر، ۇكىمەتتەر اۋىسادى. بۇل تالاسسىز فاكت!

سايلاۋ جولىمەن تۇراقتى تۇردە بيلىك اۋىستىرۋ – بۇل بيلىكتىڭ تابيعاتىن وزگەرتەدى. بيلىكتىڭ ءجۇزىن ەلگە بۇرىپ، حالىقتىڭ پىكىرىن ۇعۋعا ماجبۇرلەيدى. مەن بۇگىنگى قىرعىزستاندا بيلىكتىڭ تابيعاتى، مىنەزى وزگەردى دەپ ايتا الامىن.

ءبىزدىڭ نەگىزگى ماقساتىمىز – جاڭا ساياسي مادەنيەتتى قالىپتاستىرۋ. ول ءۇشىن جاڭا، جاس ادامداردى تابيەلەۋ كەرەك. جاڭا ازامات – ەركىن، نامىستى، ءبىلىمدى، جاۋاپكەرشىلىگى مول بولۋى شارت. ول ءوز تاعدىرىن عانا ەمەس، مەملەكەتتىڭ تاعدىرىن شەشۋگە قاۋقارلى، قابىلەتتى بولۋى كەرەك. مىنە، ءبىز قازىر وسىنداي ازاماتتاردى، جاڭا ۇرپاقتى تاربيەلەپ جاتىرمىز.

بۇل ۇزاققا سوزىلعان، كۇردەلى پروتسەسس. قازىر قىرعىزستاندىقتاردا جاڭا مىنەز پايدا بولدى. جاڭا ادامدار كەلىپ جاتىر. بۇگىنگى قىرعىزستاننىڭ بەت-بەينەسى ون جىل بۇرىنعى قىرعىزستاننان ايتارلىقتاي وزگەردى. ايىرما بار.

قىرعىزستان تاعى نەگە قول جەتكىزدى؟ بىزدە كوپ قازبا-بايلىق بار. مۇناي، گاز، التىن ت.ب. بىراق، ولاردان بەردە-ءبىر كەم تۇرمايتىن تاعى ءبىر بايلىق بار. ول – تاريحي تاجىربيە! قىرعىزستاننىڭ ءۇش جولعى رەۆوليۋتسيادان العان تاريحي تاجىربيەسى – ۇلتتىق بايلىق دەپ ايتار ەدىم. مۇنداي تاجىربيە كورشى ەلدەردىڭ ەشبىرىندە جوق! ارينە، ءاربىر مەملەكەتتىڭ ءوزىنىڭ تاعدىرى بار. ءوزىنىڭ جولىمەن جۇرەدى. ال ءبىزدىڭ جولىمىز وزگەشە. مىنەزىمىز وزگەشە، باسقالاردان بولەكتەنىپ تۇراتىن سيپاتتارىمىز بار.

- سادىر جاپاروۆ كىم؟ ول تۋرالى مالىمەت كوپ. باق جاپاروۆتى ءدىني توپتار بيلىككە الىپ كەلدى دەيدى. ەندى بىرەۋلەرى جاپاروۆتى «باندالىق كلان» بيلىككە الىپ كەلدى دەيدى. ءسىز وتكەندە، جاپاروۆپەن بىرگە ماسكەۋگە، اسقار اقاەۆتىڭ ارىزىن الۋعا بىرگە بارعانىڭىزدى ايتتىڭىز (2005 جىلى). ول كەزدە جاپاروۆ جاس دەپۋتات ەكەن... ەندى قازاق اۋديتورياسىنا ايتىپ بەرىڭىزشى، جاپاروۆ كىم؟

- ساياسي بيلىكتىڭ وزگەشە تابيعاتى بار. ول – ەلدىڭ قولداۋى، ادامنىڭ ليدەرىك سيپاتى. سادىر جاپاروۆتىڭ ىستەگەن قىزمەتى، تاجىربيەسى از بولعاندىعىنا قاراماستان، ونى بۇگىنگى ەل قولداپ تۇر. ونىڭ ءسوزى، ۇستانىمى مەن كوزقاراسى كۇشكە يە.

ءۇشىنشى رەۆوليۋتسيانىڭ قورىتىندىسى بويىنشا ول بۇگىن قىرعىز ۇكىمەتىنىڭ جانە رەسپۋبليكاسىنىڭ باسشىسى. ونى بارلىق ساياسي كۇشتەر، ونىڭ ىشىندە جاپاروۆتىڭ وپپونەنتتەرى دە مويىندادى.

جاپاروۆ قىرعىز ساياساتىنا 2005 جىلدارى جاس دەپۋتات قاتارىندا كەلىپ، بۇگىن مەملەكەت باسشىسى دەڭگەيىنە دەيىن جەتتى. وسىنىڭ بارلىعىنا ءوزىنىڭ مىنەزى، ەڭبەگى ارقىلى جەتتى. ال وعان بۇگىنگى ساياسي سيستەما مۇمكىندىك جاساپ بەردى.

- جاپاروۆتىڭ جاقىن دوسى قامچىبەك تاشيەۆ تۋرالى دا ءسىز قاتۋ ايتتىڭىز. «دوس سەكرەتاردان» قۇتىلا المايسىڭ دەدىڭىز... اقاەۆ، باكيەۆ، اتامباەۆ پەن جەەنبەكوۆتەردى جارعا جىققان سول تۋىسقانشىلدىق دەدىڭىز... بايقاساڭىز، بۇل تۋىسقانشىلدىق جالعىز قىرعىزعا عانا ءتان دەرت ەمەس. وا ەلدەرىنىڭ بارلىعىندا دەرلىك بار سيندروم... سىزگە دە، بىزگە دە، بۇدان قۇتىلۋدىڭ جولى بار ما؟

- قىرعىزستانداعى ساياسي سيستەما – ساياسي كونكۋرەنتسياعا نەگىزدەلگەن. ساياسي باسەكە قانشالىق كۇشتى، رەالدى بولسا، قوعامدىق پىكىر دە شەشۋشى فاكتورعا اينالادى. ەل نە دەيدى ەكەن دەپ، شەنەۋنىكتەر ەلەڭدەپ قالادى. ءبىزدىڭ ساياسي سيستەمانىڭ ماقساتى وسى بولعان.

ءبىز قىرعىز بەن قازاقتىڭ تۋعان-تۋىسقانعا، جاقىنعا تارتاتىن، تۋىسقانشىلدىق جامان قاسيەتىمىز بار. ونىڭ ەلدىك پىكىر عانا توقتاتا الادى. ەلدىك پىكىر، ەلدىك باقىلاۋ! مىنە، سول باقىلاۋ جاسالۋى كەرەك!

جانە بيلىكتەگى تۋىسقانشىلدىقتان قۇتىلۋدىڭ ەڭ ماڭىزدى تەتىگى – جاڭا ساياسي مادەنيەت قالىپتاستىرۋ، جاڭا ادامدار تاربيەلەۋ. ءبىز وسىلاي عانا قۇتىلا الامىز. بۇل ءبىزدىڭ العا قويعان ۇلكەن ماقساتتارىمىزدىڭ كىشكەنە ءبىر بولىگى عانا...

- سادىر جاپاروۆتىڭ بيلىككە كەلۋىمەن ەشبىر حالىقارالىق ۇيىمدار نەمەسە پرەزيدەنتتەر قۇتتىقتاعان جوق. جالعىز وزبەكستان عانا قۇتتىقتادى... بۇل نەنى بىلدىرەدى؟ حالىقارالىق ۇيىمدار مەن مەملەكەتتەر قىرعىزستاننىڭ بۇگىنگى بيلىگىن مويىندامايدى دەگەن ءسوز بە؟

- ءار ءتۇرلى سەبەپتەرمەن سادىر جاپاروۆتىڭ ۇكىمەتىن، بيلىگىن قۇتتىقتاۋ بىزگە وداقتاس مەملەكەتتەر تاراپىنان بولمادى. البەتتە، بۇل جاپاروۆ بيلىگىنىڭ لەگيتيمدىگىن كۇشەيتپەيدى. بىراق، مەن وداقتاس، كورشىلەس مەملەكەتتەر بۇگىنگى قىرعىزستانداعى جالعىز لەگيتيمدى بيلىكتى قولداپ بەرسە جاقى بولار ەدى دەپ ەسەپتەيمىن. ال تۇراقتى بيلىكتى جاقىندا بولاتىن سايلاۋدا ەل شەشەدى!

- قىرعىزستان مەن قازاقستان تاۋەلسىزدىكتى ءبىر ۋاقتا العان تۋىسقان ەكى ەل. بىراق، وسى 30 جىلدىڭ ىشىندە ءبىر تۋعان ەكى ەلدىڭ ساياسي باعىتى، ۇستانعان جولى مۇلدە بولەك بولدى. سىزدەر قازاقستاننان نە ۇيرەنۋلەرىڭىز كەرەك؟ قازاقستان سىزدەردەن نە ۇيرەنۋى كەرەك؟

- مەن جوعارىدا ايتقانداي، ادام سەكىلدى ءاربىر مەملەكەتتىڭ ءوز تاعدىرى بولادى. ولار ءبىر-ءبىرىن قايتالامايدى. ءبىر-بىرىنە ۇقسامايدى. سوندىقتان دا ءبىز ەكى ەل، ەكى مەملەكەتپىز. ۇقساس جاقتارىمىز دا، ايىرماشىلىعىمىز دا كوپ. بىراق، ءبىر-ءبىرىمىزدى تولىقتىرىپ تۇراتىن ەلدەرمىز.

قىرعىزستاندا تۇراقتى قالىپتاسقان ازاماتتىق قوعام بار. ساياسي باسەكەگە نەگىزدەلگەن ساياسي جۇيە بار. قىرعىزستاندا ءاربىر ادام ءوز ولكەسىنىڭ قوجايىنى سەزىنەدى. سوعان شىن سەنەدى. وسىعان ساي ارەكەت ەتەدى.

ال قازاقستاندا ساياسي جۇيە باسقاشا. ءبىز قازاقستاننان ۇلكەن تاجىربيە جينادىق. جامانىن دا، جاقسىسىن دا كوردىك. بيسمارك ايتقانداي: اقىلدى بىرەۋدىڭ تاجىربيەسىنەن ۇيرەنەدى. اقىماق ءوز تاجىربيەسىنەن ۇيرەنەدى. وسىعان وراي ايتار بولساق، قازاقستاننىڭ بىزدەن دە ۇيرەنەرى كوپ. ال ەندى قازاقستاننىڭ ەكونوميكالىق ءوسۋى – بۇل تالاسى جوق فاكت! ءبىز قازاقستان ەكونوميكاسىنىڭ جاقسى جاقتارىنان ۇيرەنەرىمىز كوپ.

- ومىربەك تەكەباەۆ ۇلكەن ساياساتقا قايتا ورالدى. سىزدەردە ەندى قايتادان پارلامەنت جانە پرەزيدەنت سايلاۋلارى وتەدى. ءسىز پرەزيدەنتتىك سايلاۋعا تۇسەسىز بە؟

- مەن 30 جىلدان بەرى قىرعىز ساياساتىندا ءجۇرمىن. قىرعىزستاننىڭ تاۋەلسىزدىگىن جاريالاعان ساياساتشىلاردىڭ پارلامەنتتەگىسىنىڭ ەڭ سوڭعىسىنانمىن. قوعام جاڭالانۋدى، ۇرپاق الماسۋدى تالاپ قىلىپ تۇر. پارتيانىڭ 17 تامىزدا وتكەن XXIII سەزىندە مەن اعا ۇرپاق رەتىندە جاڭا ۇرپاقتى ساياساتقا الىپ كەلىپ، ورنىمدى جاستارعا بەرەم دەپ مالىمدەدىم. قازىر وسى ۇستانىمدامىن. ەگەر قانداي دا ءبىر ساياسي جاعدايلار بولىپ كەتپەسە، مەن وسى پوزيتسيامدا قالامىن.

ەسكەرتۋ!

بۇل شاعىن سۇحبات قازاق جانە قىرعىز تىلدەرىندە جاسالدى. قازىرگى كوروناۆيرۋس پاندەمياسىن بولعان كارانتيندىك شەكتەۋلەرگە بايلانىستى سۇحبات ديستانتسيالىق فورماتتا الىندى. سپيكەر رەداكتسيانىڭ كەي ساۋالدارىنا بەلگىلى جانە بەلگىسىز سەبەپتەرمەن جاۋاپ بەرمەدى.

سۇحباتتاسقان نۇرگەلدى ابدىعانيۇلى

Abai.kz