بەس ميلليون حالقى بار فينليانديا ءبىلىم دەڭگەيى بويىنشا جاپونيا مەن كورەيانى باسىپ وزىپ، الەمدە №1 ورىندا تۇر. جەكەمەنشىك مەكتەپتەر جوق، بارلىق مەكتەپتەر مەملەكەتتىكى، ءۇي تاپسىرماسى جوق، تۇراقتى ەمتيحاندار جوق، بالالاردى باعامەن قورقىتپايدى، ەركىندىگى مول وقۋ-اعارتۋ جۇيەسىن قۇرا بىلگەندىكتەن بۇل ەل باسەكەلىك قابىلەتى بويىنشا الەمدى مويىنداتۋدا.

ءححى عاسىردا ءبىلىم بەرۋدى جالعىز فينليانديا جۇزەگە اسىرۋدا، ال باسقا ەلدەر حح عاسىرداعى ءبىلىم بەرۋ جۇيەسىن ءالى ۇستانۋدا دەيدى بىلەتىندەر.

6 جاسار بالانى جازۋعا ۇيرەتىپ، تاپسىرما بەرەتىن، باعامەن شانتاج جاساپ، سىنىپتار اراسىندا جارىستىرىپ، مۇعالىمدەر مەن مەكتەپتەن مەزى بولعىزاتىن ءبىلىم بەرۋ جۇيەسى كەڭەستىك ءداۋىردىڭ مۇراگەرى بولعان بىزدىكى ءتارىزدى بىرنەشە عانا ەلدە بار دەيدى.

ءبىزدىڭ ءبىلىمىمىز تەك جاقسى اتاق الۋ، بوس ۇران، شاكىرتتىك ورتالىق ت.س.س جاقسى ات بەرىلگەن بوس سوزدەر عانا سەكىلدى. بوس فورماليزم.

مەكتەپ 12 جىلدىق دەپ ايتىلعانىمەن، 6 جاسار بالالارىنا ارنالعان باعدارلاما بۇرىڭعى 8 جاستاعى بالالاردىكىنە ۇقساس.

بىزدە ءبىلىم بەرۋدىڭ قازىرگى زامانعى قازاق بالالارىنا سايكەس كەلەتىن باعدارلامالارى مەن مازمۇنى بولۋى كەرەك. ول ءۇشىن بالالارمەن بىرگە زەرتتەۋشىلەر، عالىمدار جانە ەڭ جاقسى مۇعالىمدەر ۇستەل اينالاسىندا جۇمىس جاساۋى كەرەك. سونىمەن قاتار، بۇگىنگى مىندەتتەلگەن وقۋلىقتارمەن الىسقا بارمايمىز!

6 جاستاعى بالالار جاي عانا ويناۋى كەرەك. ءبىر-بىرىنە كومەكتەسىپ، ءارىپ-تسيفرلارمەن ويناپ، بىرلەسىپ ءبىر نارسە جاساۋى كەرەك. سونداي-اق ەرتەگى وقىپ، ول ەرتەگىنى ايتىپ، الەمدى تانىپ -بىلۋگە، ءۇي تىگىپ ويناۋعا، اتا-انانى قۇرمەتتەۋگە، سالەم بەرۋ، سالەم الۋ ت.س.س ادامگەرشىلىك تاربيەسىن الۋعا ءتيىس.

ولار مۇراجايعا بارۋ كەرەك. اكە-شەشەسى، اتا-بابالارى تۋرالى اڭگىمەلەسىپ، وزدەرىنىڭ، كىم ەكەنىن ءبىلۋى قاجەت. جاقسى مەن جامان ارەكەتتى اجىراتا بىلۋگە ۇيرەتۋىمىز كەرەك. ادام بولۋعا ۇيرەتۋىمىز كەرەك.

ەڭ باستىسى، الدىمەن وقۋ دەگەن نە جانە ونى ۇيرەنۋدىڭ قانشالىقتى كەرەمەت ەكەنىن ەكەنىن ءتۇسىنۋى كەرەك. مۇنى تۇسىنگەن بالا ارىقاراي بارلىعىن وزدىگىنەن ۇيرەنە  بەرەدى.

ەڭ بولماعاندا، كۇن بويى ءبىر-ءبىرىنىڭ ارقاسىنا قاراپ وتىرا بەرمەي، ۇستەلدەرىن الشاقتاتىپ، ءبىر-بىرىنە قاراما-قارسى وتىرىپ سويلەسۋى كەرەك. وسىلايشا ادامدارمەن قاتىناسىپ ۇيرەنەدى جانە ءبىر-ءبىرىن قۇرمەتتەۋگە ۇيرەنەدى. بىرلەسىپ ەڭبەكتەنۋدى، بىرلەسىپ جاساۋدى ۇيرەنەدى.

سۋرەتتە: فينليانديادا ورتا مەكتەپ وقۋشىلارى سىنىپتا ساباق وقىپ ۇيرەنۋدە.

امانتاي تويشىبايۇلىنىڭ جازباسى

Abai.kz