«كۇت مەنى!» دەيتىن تەلەۆيزيالىق باعدارلاما بار بىلەسىزدەر. سوعان ۇقساس قازاقستان تۇگىلى بۇكىل الەمدىك دەڭگەيدە ەڭ قىمباتتىمىزدى ىزدەيتىن جاعداي بولىپ تۇر. قازاق حالقىنىڭ عاسىرلار بويى اڭساعان قاسيەتتى پەرزەنتىن ۇرلاتىپ الىپ، ونى ءالى كۇنگە اڭداماي ءجۇرىپپىز.

ول 1991 جىلى 16 جەلتوقساندا دۇنيەگە كەلگەن. بۇگىن 29 جاسقا تولاتىن. 1995 جىلى 30 تامىزدا ءتورت جاسىندا الاياق وليگارحتار ۇرلاپ كەتتى. سودان بەرى ول ەڭ اتاقتى ۇرىبايدىڭ رەزيدەنتسياسىندا بۇعاۋدا دەپ ەستيمىز. انا ءتىلىن ۇمىتتىرعىسى كەلىپ اينالاسىنىڭ ءبارى جات ءتىلدى تىقپالاسا دا ول اندا-ساندا «مەنىڭ ەلىم، مەنىڭ جەرىم!» دەپ ءسابي جادىندا ساقتالعان قازاقشاسىن قايتالايتىن كورىنەدى.

بۇگىندە جىگىت بولعان، بۇدان شيرەك عاسىر بۇرىن ۇرلاتقان ءسابيىمىزدى ىزدەيمىز. ءبىزدىڭ بۇگىندە كوك تۋىمىز بار، جەرىمىز بار، ءانۇرانىمىز بەن ەلتاڭبامىز بار. بىراق ول جوق! حالىق تا اتار تاڭداي، شىعار كۇندەي سول پەرزەنتىن ساعىندى، شولدەدى، ءبىر كورۋگە زار، سابىرى تۇگەسىلىپ بارادى. ول دا ءالسىن-ءالسىن تەمىر شىنجىرلارىن سالدىرلاتىپ بوستاندىققا ۇمتىلادى، حالقىنا «كۇت مەنى!» دەپ ايعاي سالادى دەيدى. سول پەرزەنتىمىزدى بىرگە ىزدەۋگە، تابۋعا كومەكتەسىڭىزەرشى؟! ونى ءبارىڭىز بىلەسىزدەر، بارشاڭىز تانيسىزدار. ول قازاققا اۋاداي قاجەت.

ونىڭ اتى – تاۋەلسىزدىك!

ۇرلانعان سول پەرزەنتىمىزدىڭ بۇگىنگى تۋعان كۇنى قۇتتى بولسىن!

كەلەسى جىلعى تۋعان كۇنىن حالقىمىز سول شىنايى تاۋەلسىزدىكتىڭ وزىمەن بىرگە اتاپ وتۋىمىزگە ءناسىپ ەتسىن!

مارات ءبايدىلداۇلىنىڭ جازباسى

Abai.kz