تاۋەلسىزدىك كۇنىندە باستى يدەولوگەمالاردى دا ەستەن شىعارماعان ءجون. جاڭا جىل – بالالالار سىيلىق كۇتەتىن، ۇلكەندەر ءۇمىت ەتەتىن مەرەكە. دەمەك، جاڭا جىل – ءۇمىت پەن تىلەكتىڭ مەرەكەسى رەتىندە قالىپتاستى. ءۇمىت ەتەتىن، تىلەكتەر ورىندالاتىن، ەسكىنى ارتتا تاستاپ، جاڭانى باستايتىن مەرەكە.

ال تاۋەلسىزدىك كۇنى شە؟ قان توگىلىپ، اشارشىلىققا ۇرىنىپ، اتا-بابامىز تاۋەلسىزدىك جولىندا قىرىلىپ، ارەڭ جەتكەن مەرەكە رەتىندە قابىلدانىپ ءجۇر. كەيبىرىمىز جەلتوقسان وقيعاسىن ەسكە الىپ، مەرەكە ەمەس، قۇران باعىشتاپ، قارالى كۇنگە اينالدىرىپ جاتامىز.

ال شىنتۋايتىندا، قاي ۇلتتى الساڭىز دا، تاۋەلسىزدىككە وڭاي قول جەتكىزبەگەن. الەمدەگى 225 مەملەكەتتىڭ 163-ءى تاۋەلسىزدىك كۇنىن اتاپ وتەدى ەكەن. بودان بولماعان ەل از. ال سول ەگەمەندىك العان ەلدەرگە تاۋەلسىزدىك وڭاي كەلدى دەيسىز بە؟

اسىلى، كەز كەلگەن جەڭىس جۇزدەگەن جەڭىلىستىڭ سىرتقى قاباتى، كەز كەلگەن تريۋمف تالاي تراگەديانى تۇعىر ەتەدى. قوعام ەمەس، جەكە ادامنىڭ جەڭىسى مەن جەتىستىگىن الىپ قارايىق. جەڭىس وڭايلىقپەن كەلمەيدى. جەڭىلىستەردەن كەيىن عانا جەڭىس تۋى جەلبىرەيدى. ولاي بولماسا، جەڭىس بولماس ەدى.

وسىنى ەسكەرە وتىرىپ، تاۋەلسىزدىك كۇنىن اتا-بابامىزدىڭ اسىل ارمانى ورىندالعان كۇن، ياعني ارماندار ورىندالاتىن كۇن رەتىندە پوزيتسيالاۋ قاجەت سەكىلدى.

بەس تۇيسىككە اسەر ەتەتىن مەرەكەلىك نىشانداردىڭ ءون بويىنان ارماننىڭ اقيقاتقا اينالۋ يدەياسى وتسە. بالالارعا سىيلىق جاساعاندا دا ءبىر ارمانى ورىندالاتىنداي بولعانى ءجون.

تاعى ءبىر يدەولوگەما – ەلىمە نە بەردىم؟ وسى سۇراققا اركىم وزىنشە وي قورىتسا. جىلىنا ءبىر رەت.

كەز كەلگەن مەرەكە الۋدان تۇرادى. سىيلىق الادى، كەلەشەككە ماعان بولسىن دەپ ءۇمىت ارتادى. سوندىقتان، تاۋەلسىزدىك كۇنىن «نە الدىڭ (سىيلىق، ناگرادا، ماقتاۋ قاعاز، العىس حات) ەمەس، نە بەردىڭ؟» دەگەن ساۋالعا ءار ادام جەكە جاۋاپ بەرەتىن كۇنگە اينالدىرۋعا سۇرانىپ تۇر.

جەكە مۇددەگە ەمەس، قوعامدىق مۇددەگە قوسقان ۇلەسىن سارالايتىن كۇن ەتسەك. باتىستا جاڭا جىل قارساڭىندا ادامدار New Year Resolution جازادى. كەلەر جىلى كوزدەگەن ماقساتتارىن تىزبەكتەپ شىعادى. ال تاۋەلسىزدىك كۇنىندە «مەن مەملەكەت ءۇشىن نە ىستەدىمدى» ەسكە تۇسىرسەك، اباي اتامىزدىڭ «قارا سوزىندە» ايتىلعان وزىڭە ەسەپ بەرۋگە قاتىستى اماناتتى ورىندار ەدىك.

كەلەر جىلى تاۋەلسىزدىككە 30 جىل. قالاي اتاپ وتەمىز؟ قالاي ءداستۇر قالىپتاستىرامىز. وي قوسۋعا، ۇسىنىس ايتۋعا شاقىرامىن.

P.S. ەكىنشى ويدى كەشە جازام دەپ ۋادە ەتكەم. بۇگىن رەتى كەلىپ تۇر. ءۇشىنشىسى، بۇيىرسا، ەرتەڭ بولادى.

شىڭعىس مۇقاننىڭ جازباسى

Abai.kz