2021 جىلدىڭ 10 قاڭتارىندا پارلامەنت جانە ءماسليحات سايلاۋلارى وتەتىنى بەلگىلى. وعان بەس ساياسي پارتيا قاتىساتىن بولىپ، ورتالىق سايلاۋ كوميسسياسىنا تىركەلدى.

وسك وسى بەسەۋدىڭ ماجىلىسكە ۇمىتكەر رەتىندە ۇسىنعان ءتىزىمىن كەلىسىپ، بەكىتتى. بۇدان بولەك، ەكس-پرەزيدەنت نۇرسۇلتان نازارباەۆ توراعالىق ەتەتىن قازاقستان حالقى اسسامبلەياسى جالپىحالىقتىق سايلاۋعا قاتىسپاي-اق، ءوز ىشىندە ىرىكتەۋ وتكىزىپ (اسسامبلەيا ىشىندە سايلاۋ) 9 دەپۋتات كىرگىزەدى. ونى اسسامبلەيا كەڭەسى ءوزارا ماقۇلداسادى.

سول ەرەجە بويىنشا، الگىندە مەمحاتشى قىرىمبەك كوشەرباەۆتىڭ قاتىسۋىمەن قحا كەڭەسىنىڭ كەزەكتى وتىرىسى ءوتتى. وندا اسسامبلەيا اقىلداسا كەلە، ماجىلىسكە 9 ۇمىتكەر ۇسىنىپتى. ال قازاقستاننىڭ ورتالىق سايلاۋ كوميسسياسى 24 جەلتوقساندا ارنايى قاۋلى شىعارىپ، قحا ۇمىتكەرلەرىن تىركەگەن.

سونىمەن، اسسامبلەيا بۇل جولى كىمدەردى ۇسىنىپ وتىر؟ مىنە، قاراڭىز:

1. ساۋىتبەك ءابدىراحمانوۆ. ءماجىلىستىڭ ءVى شاقىرىلىمىنىڭ دەپۋتاتى، قحا-دان سايلانعان،

2. اۆەتيك اميرحانيان. باتىس قازاقستان وبلىستىق «ماسيس» ارميان ەتنومادەني قوعامدىق بىرلەستىگىنىڭ توراعاسى،

3. يلياس بۋلاروۆ. جامبىل وبلىسى قورداي اۋدانى سارتوبە اۋىلدىق وكرۋگىنىڭ اكىمى،

4. ناتاليا دەمەنتەۆا. «كوكشەتاۋ گۋمانيتارلىق-تەحنيكالىق ليتسەي-مەكتەبى» كمم ديرەكتورى،

5. يۋري لي. «قازاقستاننىڭ ۇلتتىق كوللەكتورلار پالاتاسى» زتب توراعاسى،

6. ۆاكيل نابيەۆ. «باربانگ» كۇردتەر قاۋىمداستىعى» رەسپۋبليكالىق قوعامدىق بىرلەستىگىنىڭ ۆيتسە-پرەزيدەنتى،

7. شاميل وسين. «قازاقستان تاتار جانە باشقۇرتتار كونگرەسى» رەسپۋبليكالىق قوعامدىق بىرلەستىگىنىڭ قاراعاندى وبلىسى بويىنشا فيليالىنىڭ ديرەكتورى، قاراعاندى وبلىستىق ءماسليحاتىنىڭ دەپۋتاتى،

8. ۆلاديمير توحتاسۋنوۆ. «جەتىسۋوبلگاز» جشس باس ديرەكتورى،

9. ابيلفاس حامەدوۆ. «ازەربايجاندىقتار قاۋىمداستىعى» رەسپۋبليكالىق قوعامدىق  بىرلەستىگىنىڭ توراعاسى.

قازىرگى، التىنشى شاقىرىلىمدا اسسامبلەيا اتىنان كىمدەر دەپۋتات بولدى؟

قازاقستان حالقى اسسامبلەياسى سايلايتىن ءماجىلىس دەپۋتاتتارىنىڭ سايلاۋى 2021 جىلدىڭ 11 قاڭتارىندا وتەدى. قازىرگى ۋاقتا اسسامبلەيا قۇرامىندا 500-دا جۋىق مۇشە بار. ءاربىر اسسامبلەيا مۇشەسى - جەكە داۋىس بەرەدى. داۋىس بەرۋگە قاتىسقان اسسامبلەيا مۇشەلەرىنىڭ 50 پايىزدان استام داۋسىن جيناعان كانديداتتار سايلاندى دەپ سانالادى.

ال جالپىحالىقتىق ءماجىلىس جانە ءماسليحات سايلاۋلارى 2021 جىلدىڭ 10 قاڭتارىندا وتەدى.

Abai.kz