قانشاما جىلدان بەرى «اقىرزامان تاياپ قالدى» دەپ، كۇللى الەمنىڭ ۇرەيىن ۇشىرۋمەن اينالىسىپ كەلگەن اتىشۋلى امەريكاندىق ءدىن قىزمەتكەرى گارول كەمپينگ اقىر-اياعى اقىرزاماننىڭ قاشان بولاتىنىن بىلمەيتىندىگىن مويىندادى.

ول بۇل مالىمدەمەسىن ءوز ۋاعىزدارىن تاراتاتىن Family Network راديوستانساسىنا بەرگەن سۇحباتىندا جاريا ەتكەن. سونىمەن قاتار، ول ەندىگارى «ولاي بال اشپايمىن» دەپ ۋادە بەرگەن.

«ءبىز اقىرزاماننىڭ ءدال ۋاقىتىن انىقتايمىز دەپ، قاتتى قاتەلەسكەنىمىزدى وكىنە وتىرىپ مويىندايمىز. ءبىز سول ءبىر كۇناعا تولى تۇجىرىمىمىز ءۇشىن قۇدايدىڭ الدىندا باسىمىزدى ءيىپ، كەشىرىم سۇرايمىز»، ­- دەيدى ول تىڭدارمان قاۋىمعا.

مالىمدەمەدە، سونداي-اق، اتالمىش راديونىڭ اقىرزامان تاقىرىبىنا ەندىگارى ورالمايتىندىعى تۋرالى دا ايتىلعان. كەمپينگ پەن ونىڭ جاقتاستارى: «ءبىز ۇلكەن ساباق الدىق جانە بارلىعى قۇدايدىڭ قولىندا ەكەنىن، اقىرزاماننىڭ ناقتى مەرزىمىن ءبىز ەمەس، تەك ول عانا بىلەتىنىن تۇسىندىك»، ­- دەپ اعىنان جارىلادى.

قانشاما جىلدان بەرى «اقىرزامان تاياپ قالدى» دەپ، كۇللى الەمنىڭ ۇرەيىن ۇشىرۋمەن اينالىسىپ كەلگەن اتىشۋلى امەريكاندىق ءدىن قىزمەتكەرى گارول كەمپينگ اقىر-اياعى اقىرزاماننىڭ قاشان بولاتىنىن بىلمەيتىندىگىن مويىندادى.

ول بۇل مالىمدەمەسىن ءوز ۋاعىزدارىن تاراتاتىن Family Network راديوستانساسىنا بەرگەن سۇحباتىندا جاريا ەتكەن. سونىمەن قاتار، ول ەندىگارى «ولاي بال اشپايمىن» دەپ ۋادە بەرگەن.

«ءبىز اقىرزاماننىڭ ءدال ۋاقىتىن انىقتايمىز دەپ، قاتتى قاتەلەسكەنىمىزدى وكىنە وتىرىپ مويىندايمىز. ءبىز سول ءبىر كۇناعا تولى تۇجىرىمىمىز ءۇشىن قۇدايدىڭ الدىندا باسىمىزدى ءيىپ، كەشىرىم سۇرايمىز»، ­- دەيدى ول تىڭدارمان قاۋىمعا.

مالىمدەمەدە، سونداي-اق، اتالمىش راديونىڭ اقىرزامان تاقىرىبىنا ەندىگارى ورالمايتىندىعى تۋرالى دا ايتىلعان. كەمپينگ پەن ونىڭ جاقتاستارى: «ءبىز ۇلكەن ساباق الدىق جانە بارلىعى قۇدايدىڭ قولىندا ەكەنىن، اقىرزاماننىڭ ناقتى مەرزىمىن ءبىز ەمەس، تەك ول عانا بىلەتىنىن تۇسىندىك»، ­- دەپ اعىنان جارىلادى.

بۇرىندارى كەمپينگ ۇنەمى اقىرزاماننىڭ تاياپ قالعانىن ايتىپ، ناقتى داتالارمەن «دالەلدەپ»، ەلدىڭ ۇرەيىن ۇشىرىپ كەلگەن بولاتىن. وسىدان 17 جىل بۇرىن اتالمىش ءدىن قىزمەتكەرى اقىرزامان 1994 جىلدىڭ 15 قىركۇيەگىندە بولادى دەپ مالىمدەگەن ەدى. سول كۇنى ەشتەڭە بولماعان سوڭ، ول «ازداپ قاتەلەسىپ» كەتكەنىن جەتكىزگەن. كەمپينگتىڭ سوزىنە سەنسەك، ول ىنجىلدە جاسىرىلعان ساۋەگەيلىك سوزدەردىڭ ماعىناسىن اشاتىن ماتەماتيكالىق جۇيە ويلاپ تاۋىپتى. بارلىق «جاڭالىعىن» سول جۇيەنىڭ كومەگىمەن اشادى ەكەن.

الايدا ونىڭ جۇيەسى ءبىر دە ءبىر رەت دۇرىس كورىپكەلدىك جاساماعان. كەمپينگ 2011 جىلى كەلەسى بولجامىمەن شىعىپ، سوڭعى جىلدارداعى جەر سىلكىنىستەرى اقىرەت كۇنىنىڭ بەلگىلەرى بولىپ تابىلادى دەگەن مالىمدەمە جاساعان بولاتىن. ءتىپتى، ول كۇن 21 مامىردا بولادى دەپ ناقتى اي-كۇنىن جاريا ەتكەن.

21 مامىر كەلىپ، ول دا وتكەن سوڭ، كەمپينگ «نەگىزىنەن ەكى اقىرزامان بولادى، ءبىرى - رۋحاني، ەكىنشىسى - تاندىك» دەپ اقتالعان-دى. ونىڭ ايتۋىنشا، 21 مامىر كۇنى «كۇللى الەم قورقىنىشتان ءدۇر سىلكىندى»، سونىڭ سالدارىنان «رۋحاني ءولدى». قۇداي وسىلايشا «ءوزىنىڭ ويلاعان ويىن تۋرا ىسكە اسىردى». ءسويتىپ، ساۋەگەي زاماناقىردىڭ ەكىنشى كەزەڭىن بەلگىلەپ، 21 قازان دەپ اتاعان.

ونىڭ سوزىنشە، بۇل ەندى «تاندىك» زاماناقىر بولادى ەكەن. ونىمەن قويماي، «مەن وتە كوپ ويلاندىم، اقىرى «اقىرزامان وتە-موتە تىنىش، ەشكىمگە بىلدىرمەي كەلەدى» دەگەن توقتامعا كەلدىم دەگەن.

21 قازان دا ىڭ-شىڭسىز تاريح قويناۋىنا ەنگەن سوڭ، كەمپينگ كوپكە دەيىن جىم-جىلاس جاتىپ الىپتى. نەگە دەسەڭىز، ايدىڭ-كۇننىڭ امانىندا ابىرويى ايرانداي توگىلگەن ءدىن قىزمەتكەرى قاتەسىن ابدەن مويىنداعان سوڭ، ءوزىن قالاي اقتاۋدىڭ جولدارىن ويلاستىرعان. كەمپينگتىڭ ايتۋىنشا، ول قانشا جەردەن قاتەلەسسە دە، ونىڭ ۋاعىزدارى ارقاسىندا كوپتەگەن ادامداردىڭ ءىنجىلدى ءوز بەتتەرىمەن وقىپ-بىلۋگە دەگەن قۇشتارلىقتارى ارتقان كورىنەدى.

kaz.gazeta.kz