قازاقستاندا 2006 جىلعى ۇلگىدەگى نومينالى 2 000, 5 000 جانە 10 000 تەڭگەلىك بانكنوتتاردى اۋىستىرۋ مەرزىمى اياقتالدى.

بۇعان دەيىن 2006 جىلعى ۇلگىدەگى بانكنوتتاردى ايىرباستاۋ 2020 جىلدىڭ 21 جەلتوقسانىنان 2021 جىلدىڭ 1 اقپانىنا دەيىن ۇزارتىلعان بولاتىن.

«وسى نومينالدارداعى بانكنوتتاردى اۋىستىرۋ مەرزىمىن ۇزارتۋ تۋرالى شەشىمدى ۇلتتىق بانك ازاماتتاردىڭ وتىنىشتەرىنە بايلانىستى قابىلداعان بولاتىن. ايىرباستاۋ تەك جەكە تۇلعالار ءۇشىن ۇلتتىق بانكتىڭ فيليالدارىندا 2020 جىلدىڭ 21 جەلتوقسانىنان باستاپ 2021 جىلدىڭ 1 اقپانىنا دەيىن جۇرگىزىلدى. وسى كەزەڭدە بانكنوتتاردى اۋىستىرۋعا قاتىستى وتىنىشتەردىڭ كوپ بولىگى الماتى قالاسىنىڭ (28,2%), نۇر-سۇلتان قالاسىنىڭ (9,5%) جانە قاراعاندى وبلىسىنىڭ (7,5%) تۇرعىندارىنان ءتۇستى. ايىرباستاۋعا قابىلدانعان كۋپيۋرالاردىڭ نەگىزگى ۇلەسى نومينالى 2 000 تەڭگەلىك (44,1% ) بانكنوتاعا تيەسىلى بولدى، ودان كەيىن 5 000 (30,9%) جانە 10 000 تەڭگەلىك (25,0%) بانكنوتتار»,-دەلىنگەن ۇلتتىق بانك حابارلاماسىندا.

ۇلتتىق ۆاليۋتانىڭ قولدانىستاعى اقشا بەلگىلەرىنە اۋىستىرۋ مەرزىمىنىڭ اياقتالۋىنا بايلانىستى 2006 جىلعى ۇلگىدەگى اتالعان نومينالداعى بانكنوتتار قازاقستان رەسپۋبليكاسىنىڭ بۇكىل اۋماعىندا قابىلداۋعا جانە ايىرباستاۋعا جاتپايدى جانە تولەم قۇرالى بولىپ سانالمايدى.

Abai.kz