اتىراۋ وبلىستىق سوتىنىڭ اپەللياتسيا القاسى بەلسەندى ماكس بوقاەۆ پەن ادۆوكاتى جانار سءۇندەتقاليەۆانىڭ ءاكىمشىلىك قاداعالاۋدى الىپ تاستاۋ تۋرالى ءوءتىنىشىن قاناعاتتاندىرمادى،- دەپ حابارلايدى Centralasian.

بۇعان دەيىن سوت بەلسەندى ماكس بوقاەۆتى بوستاندىققا شىققاننان كەيىن 3 جىل اكىمشىلىك قاداعالاۋدا ۇستاۋ تۋرالى شەشىم شىعارعان.

10 اقپاندا اپەللياتسيالىق شاعىمدى قاراعان سۋديا دينا تۋحفاتوۆا "ادۆوكات كەلتىرگەن دايەكتەردىڭ بوقاەۆقا قاتىستى جاعدايدا ماڭىزى جوق" ەكەنىن ايتتى.

سوت ونلاين رەجيمدە ءوتىپ، وعان بىرنەشە باقىلاۋشى ونلاين رەجيمدە قاتىستى. سوت پروتسەسى ونلاين وتكەن بولمەدە ادۆوكات جانار سۇندەتقاليەۆا، ماكس بوقاەۆتىڭ ءوزى، ازاماتتىق بەلسەندى الىبەك مۇساۇلى مەن ازاتتىق ءتىلشىسى دە قاتىسىپ وتىردى.

- مەن ءوزىمنىڭ بۇرىنعى پىكىرىمدە قالامىن. بۇعان دەيىنگى سوت پروتسەستەرىندە جانە وسى كۇنگە دەيىن ءوزىمنىڭ كىناسىز ەكەنىمدى، ساياسي موتيۆپەن سوتتالعانىمدى ايتىپ كەلەمىن. سوندىقتان 2016 جىلعى سوت ۇكىمىن دە، اكىمشىلىك باقىلاۋ تۋرالى سوت قاۋلىسىن مويىندامايمىن، - دەدى ماكس بوقاەۆ سوتتا.

ادۆوكات جانار سۇندەتقاليەۆا سوتتان اكىمشىلىك قاداعالاۋ تۋرالى الدىڭعى سوت شەشىمىن جويۋدى، بوقاەۆتىڭ تۇرمەدەگى مىنەزدەمەسىن ەسكەرۋدى سۇرادى. ادۆوكاتتىڭ ايتۋىنشا، بوقاەۆتى اباقتىدان بوساتار الدىندا وندا ەشقانداي تارتىپبۇزۋشىلىق بولماعان، كولونيا باستىعى تاجىقۇلوۆتىڭ ءوزى وعان جاعىمدى مىنەزدەمە بەرگەن.

- بوقاەۆتىڭ بۇرىنعى 8 ءتارتىپ بۇزۋشىلىعىنىڭ ەكەۋىن سولتۇستىك قازاقستان وبلىستىق پروكۋراتۋراسى جويعان. وعان ء"تارتىپ بۇزدى" دەپ تاعىلعان كەيىنگى ايىپتار مەكەمە قىزمەتىنە كەدەرگى كەلتىرەتىندەي اسا اۋىر ەمەس. وعان اكىمشىلىك قاداعالاۋ تاعايىنداۋعا مۇلدەم نەگىز جوق،- دەدى ادۆوكات سۇندەتقاليەۆا.

ىسكە قاتىسقان پروكۋرور ءادىلۇلىنىڭ نە ايتقانى مۇلدەم ەستىلمەدى. ادۆوكات پەن بوقاەۆ پروكۋرور ءسوزىنىڭ ەستىلمەيتىندىگى تۋرالى قايتا-قايتا ەسكەرتكەنمەن سۋديا شەشىم قابىلداۋ بولمەسىنە شىعىپ كەتتى.

شامامەن 20 مينۋتتان سوڭ سۋديا دينا تۋحفاتوۆا الدىڭعى سوت شەشىمىنىڭ وزگەرىسسىز قالاتىنىن، №2 اتىراۋ قالالىق سوتىنىڭ 22 قاڭتار كۇنگى ماكس بوقاەۆقا ءۇش جىلعا اكىمشىلىك قاداعالاۋ تاعايىنداۋ تۋرالى قاۋلىسىنىڭ كۇشىن جويۋدى سۇراعان ءوتىنىشتىڭ قاناعاتتاندىرىلماعانىن ايتتى.

- بوقاەۆ سوتتالعان باپتاردىڭ ءبىرى ەكسترەميستىك قىلمىسقا قاتىستى. سوندىقتان اكىمشىلىك قاداعالاۋ تۋرالى قاۋلى شىعارۋ - سوتتىڭ مىندەتى. ادۆوكاتتىڭ ءتارتىپ بۇزۋشىلىق بولماعانى تۋرالى كەلتىرگەن دايەكتەرىنىڭ بوقاەۆ جاعدايىندا ماڭىزى جوق، - دەدى سۋديا دينا تۋحفاتوۆا.

سوت شەشىمى بىردەن كۇشىنە ەنەدى جانە ول قايتا شاعىمدانۋعا جاتپايدى.

بۇعان دەيىن بەلسەندى جازاسىن وتەگەن ۋگ-157\9 مەكەمەسىنىڭ سوتتان بوقاەۆقا 2016 جىلى شىققان سوت ۇكىمىندەگى ء"ۇش جىلعا دەيىن قوعامدىق جۇمىستارمەن اينالىسۋعا تىيىم سالۋ" تۋرالى تارماقتى ءتۇسىندىرىپ بەرۋدى سۇراعانى بەلگىلى بولعان. سوت بەس جىل بۇرىنعى سوت ۇكىمىنە جاساعان قوسىمشا تۇسىندىرمەدە ماكس بوقاەۆتىڭ جيىندارعا، ميتينگىلەرگە، دەباتقا قاتىسۋىنا، باق وكىلدەرىنە سۇحبات بەرۋىنە تىيىم سالىناتىنىن ناقتىلاعان.

2016 جىلعى جەر ميتينگىلەرىنەن كەيىن 5 جىلعا سوتتالعان ماكس بوقاەۆ جاقىندا 4 اقپاندا اتىراۋداعى تۇرمەدەن بوساپ شىقتى. تۇرمەدەن شىعۋىنا ساناۋلى كۇندەر قالعاندا ول جازاسىن وتەپ جاتقان اتىراۋداعى ۋگ157\9 مەكەمەسىنىڭ باستىعى سوتقا بوقاەۆ بوساپ شىققان سوڭ دا وعان ءۇش جىلعا دەيىن اكىمشىلىك قاداعالاۋ تاعايىنداۋ تۋرالى ءوتىنىش تۇسىرگەن.

№2 اتىراۋ قالاسىنىڭ قىلمىستىق سوتى 22 قاڭتاردا تۇرمە باستىعىنىڭ ارىزىن قاناعاتتاندىرعان.

4 اقپاندا بوستاندىققا شىققان ازاماتتىق بەلسەندى ماكس بوقاەۆ بىردەن اتىراۋ قالاسىنداعى يساتاي - ماحامبەت اتىنداعى ورتالىق الاڭعا بارىپ، ءوزىنىڭ 28 اقپان - 28 ناۋرىز ارالىعىندا قازاقستان كونستيتۋتسياسىن وزگەرتۋدى، بيلىكتى "ۇلتتىق ديالوگ" قۇرۋعا شاقىراتىن ميتينگىگە شىعاتىنىن مالىمدەگەن.

Abai.kz