وت ىشىندە بوتاڭ جانىپ جاتسا دا،
وت ىشىندە وتان جانىپ جاتسا دا
ەشكىم كەلىپ سوندىرمەيدى ءورتىڭدى!
(ەسكى ولەڭنەن)

وتىز جىل وتتاعانىڭ – «عاجاپ ەرتەك»،
«ەرتەكشى»، قاراڭ باتسىن!
مازا بەر!
كەت!
جاساعان، «ەرتەكشىگە» جازا بەر تەك!
...قىس بولسا-اق قازاقستان جىلىنادى،
بەس-بەستەن ءسابي ورتەپ!
قازاق ورتەپ!

ۇنىنەن بەس ءسابيدىڭ كوك تەڭسەلىپ،
بارادى شىڭدار ءشوجىپ، كەنتتەر شوگىپ...
جاتقاندا پەش تۇبىندە «ەرتەك» تىڭداپ،
قۇداي-اۋ، قانشا ءسابي كەتتى ورتەنىپ؟!.

سول جالىن تەڭىزدى «ارلەپ»، ءتۇزدى «كوركەپ»،
بارادى ءجۇزدى شارپىپ، ءىزدى دە ورتەپ.
كۇللى ەرتەك جاقسىلىقپەن اياقتالاد،
تەك قانا ولاي ەمەس – ءبىزدىڭ «ەرتەك»!..

ۋلەيدى اۋزىمدى اشسام زارىق كالام،
ورتەيدى تاعى كىمدى تابىت-قالاڭ؟
وزگە جۇرت السا ازاتتىق – بەيىشكە ەنەد،
مەن نەگە قادام باسسام – تامۇقتانام؟..

لاۋلايدى قارا تابىت جالىنى ۇشقان،
ۇشقىنى مۇز كوزدەرگە شاعىلىسقان.
شايتاننىڭ شالاسىنان وت شاشادى،
تىعىلعان تاق-تابىتقا كارى مىستان!

كورەرمىن كىمدى جاقىن، كىمدى دۇشپان،
مەن نەگە قۇر قالامىن كۇللى ىرىستان؟..
كوز سالسام تۇنگى اسپانعا،
قول سوزادى
سابيلەر ءورت ىشىندە شىڭعىرىسقان!

قول سوزار، ال ولارعا وتانى جوق،
وتانى كەتتى اركىمنىڭ توقالى بوپ!
...ءبورى ءجۇر بوزجىرادا، بىلەمىسىڭ،
بوزداعان اي استىندا، بوتا-جۇرەك؟..

قۇزىندا اي موليگەن تۇل دالادان،
شىعادى ءسابي ءۇنى ىڭگالاعان.
قاراشى –
بەس ءسابيدى كورەمىسىڭ،
شىنىسىن ءورتتى اسپاننىڭ تىرنالاعان!

سول ۇننەن بەتىن باسىپ قاشتى كەرەڭ،
سوقىردىڭ كىرپىگىندە جاس تۇتەگەن!
جىلاعان قازاق ءۇنىن ەستىمەسكە،
قۇلاعىن توقال وتىر – تاس بىتەگەن!

انەكي، جۇلدىز بىقسىپ، كەش كىرۋدە،
شاپشيدى ءورت! –
ءۇنىن، قارعام، ەستىدىڭ بە؟
...ەي، ءسابي-قازاقستان، جاتىرمىسىڭ،
تاعى دا «ەرتەك» تىڭداپ پەش تۇبىندە؟...

سۆەتقالي نۇرجان

Abai.kz