ۇلتتىق مەرەكەمىز ناۋرىز – جاڭا فورماتتا
مەملەكەت باسشىسى ق-ج.توقاەۆ: «حالقىمىزدى بىرىكتىرەتىن ورتاق قۇندىلىقتاردى بارىنشا دارىپتەپ، وي-ساناعا بەرىك ورنىقتىرۋىمىز كەرەك. ناۋرىز مەيرامىن اتاپ ءوتۋ تۇجىرىمداماسىن جاساپ، كوكتەم مەرەكەسىنىڭ مازمۇنىن بايىتا تۇسكەن ءجون. بۇكىل قوعامدى ۇيىستىراتىن قۇندىلىقتار نەعۇرلىم كوپ بولسا، بىرلىگىمىز دە سوعۇرلىم بەكەم بولادى» دەپ، ناۋرىز مەرەكەسىن جاڭا فورماتتا اتاپ ءوتۋدىڭ باسىمدىعىن كورسەتىپ بەردى.
ناۋرىز – ەجەلدەن كەلە جاتقان ۇلى دالانىڭ ۇلى مەرەكەسى!
بۇل جونىندە ەجەلگى گرەك تاريحشىسى سترابون: «ەجەلدەن جانە بۇگىنگى كۇنگە دەيىن سىرداريا مەن ءامۋداريا اراسىنداعى حالىق وسى كۇنى جينالادى. ەڭ قۇرمەتتى بۇل مەرەكەدە ساۋداگەرلەر دۇكەندەرىن جابادى، قولونەرشىلەر جۇمىسىن توقتاتادى، بارلىعى كوڭىل كوتەرىپ، ءبىرىن-ءبىرى سۋسىندارمەن، تاعامدارمەن قوناق قىلادى» دەيدى.
قازىردىڭ وزىندە ماڭعىستاۋدا ناۋرىزدىڭ تويلانۋى (امال مەرەكەسىنەن), تەگىن بولماسا كەرەك-ءتى.
2009 جىلعى قاراشادا ناۋرىز يۋنەسكو-نىڭ ادامزاتتىڭ رۋحاني مادەني مۇرالار تىزىمىنە ەنسە، بۇۇ باس اسسەمبلەياسىنىڭ 2010 جىلعى اقپانداعى 64-ءشى سەسسياسىندا 21-ءشى ناۋرىز – حالىقارالىق ناۋرىز كۇنى دەپ جاريالاندى.
ەندەشە زامان تالابىنا ساي ناۋرىزدىڭ فورماتىن تۇبەگەيلى وزگەرتۋ قاجەت. ناۋرىزدىڭ ايرىقشا ءتالىم-تاربيە، قادىر-قاسيەت بەرەتىن تۇرلەرى وتە ەرەكشە.
سوندىقتان، ناۋرىز مەيرامىنا جاڭا رەڭك بەرۋ ءۇشىن, ادامنىڭ ۇلتىنا، ءدىني باعىنىستىلىعىنا قاراماستان، ادامگەرشىلىك قۇندىلىقتارعا ءمان بەرە وتىرىپ، قازاقستان حالقى تۇگەل قامتىلاتىنداي مازمۇنىن جاساۋ كەرەك.
ەل اراسىندا «ناۋرىز مەرەكەسى بۇقارالىق سيپاتتان اجىراپ، ساحنالىق كەيىپكە ەنىپ، ازداعان جۇرتشىلىقتىڭ قىزىقتاۋىنا عانا اينالعان فولكلورلىق قويىلىم كورىنىسىنەن اسپاۋدا» دەگەن پىكىر قالىپتاستى. سوندىقتان مەرەكەنىڭ وزىنە سايكەس اتريبۋتتارىن قالپىنا كەلتىرىپ، فولكلورلىق-ەتنوگرافيالىق اۋقىمنان جالپى قازاقستاندىق مەرەكە دارەجەسىنە جەتكىزگەن ءجون.
مەرەكەدە باقىلاۋشىلار بولمايدى، ءبارى دە قاتىسۋشى.
ناۋرىز مەرەكەسىنىڭ نەگىزگى ماعىناسى:
ۇلتتىق نامىس پەن رۋحاني بولمىسىمىزدى جاڭعىرتۋ
سوندىقتان دا ناۋرىزعا ىرگەلى ىزدەنىستەر مەن تاريحي، ءارى زاماناۋي شارالار كەرەك. مۇنىڭ بىرنەشە جولى بار. اتاپ ايتقاندا:
اعايىنمەن كورىسۋ
ناۋرىز مەرەكەسى 14 ناۋرىزدان باستاپ اتاپ ءوتىلۋى ءتيىس!
بۇل بۇرىننان بار ءداستۇر. ءماشھۇر ءجۇسىپ كوپەيۇلى، شاكارىم قۇدايبەردىۇلى، شوقان ۋاليحانوۆتىڭ جانە ت.ب. ەڭبەكتەرىندە كەزدەسەدى. ياعني، جىل باسى ەسكىشە 1-8 ناۋرىز، قازىرگى كۇنتىزبەدە 14-21 ناۋرىز ارالىعى» ەكەنى بەلگىلى.
وسى رەتتە، 1 ناۋرىز – «العىس ايتۋ كۇنىن» 14 ناۋرىزعا اۋىستىرىپ، ەكى مەرەكە بىرىكتىرىلسە بۇل كۇننىڭ ءمان-مازمۇنى ارتا تۇسەر ەدى.
14 ناۋرىز كونەدەن كەلە جاتقان ءداستۇر. مۇنداي مەرەكە دۇنيە جۇزىندە سيرەك كەزدەسەدى. بۇگىندە باتىس وڭىرىندە عانا اتاپ وتىلەتىن كەرەمەت كۇندى قازاقستان حالقىنىڭ تۇتاس مەرەكەسىنە اينالدىرۋىمىز كەرەك.
ال، «العىس ايتۋ كۇنى» قازاقستان حالقى اسسامبلەياسىنىڭ قۇرىلۋىمەن بايلانىستى بەلگىلەنگەن جانە تاۋەلسىز مەملەكەتتى قۇرۋ جولىندا ەڭبەك ەتكەن بارشا حالىقتىڭ ءبىر-بىرىنە قۇرمەت بىلدىرەتىن كۇنى بولىپ تابىلادى.
بۇل كۇن – قايىرىمدىلىقتى، الەۋمەتتىك ىنتىماقتى جانە ءوزارا كومەك كورسەتۋدى قولداۋ سەكىلدى رۋحاني داستۇرلەر كۇنى.
وسى تۇرعىدان العاندا، «العىس ايتۋ كۇنىنىڭ» ءمان-مازمۇنى ەل بىرلىگىنە، ىنتىماققا باستايتىن كورىسۋ مەيرامىمەن مازمۇنداس ەكەنىنە نازار اۋدارعان ءجون.
سونىمەن قاتار، ەلىمىزدەگى ءتۇرلى ۇلت پەن ءدىن وكىلدەرىنىڭ ءبىر-بىرىنە دەگەن سىي-قۇرمەتىن ارتتىرىپ، تاتۋلىقتى، بىرلىكتى، ورتاق قۇندىلىقتاردى ناسيحاتتاۋعا ارنالعان – «1 مامىر – قازاقستان حالىقتارىنىڭ بىرلىگى كۇنى» دە تويلاناتىنىن ەسكەرگەنىمىز ابزال.
باستى قۇندىلىق – بۇلدىرشىندەر
ناۋرىز – ەڭ ۇلكەن وتباسىلىق مەرەكە. بۇل كۇنى بارلىق وتباسى مۇشەلەرى جينالىپ، بار جاقسىلىعىمىزدى، شاراپاتىمىزدى بۇلدىرشىندەرگە ارناۋىمىز كەرەك.
قازىرگى زامانعا لايىقتاپ، شوكولادپەن كومكەرىپ، كورنەكى قاپتاماسىن جاساپ، كوز تارتار قوراپقا سالىپ، ۇلتتىق تاعام اياسىندا ازىرلەنەتىن جەنت، تالقان، بالقايماق، كىلەگەي، قۇرت، سۇزبە، ۋىز، ىرىمشىك جانە تاعى باسقالارىن ادەمى دە شاعىن ەتىپ ازىرلەۋ پروتسەسىن جولعا قوياتىن مەزگىل جەتتى.
جاڭا جىلدا اياز اتانىڭ، روجدەستۆودا سانتا-كلاۋستىڭ سابيلەرگە سىيلىق بەرۋى, وتباسى مۇشەلەرىنىڭ ءبىر-بىرىنە تارتۋ-تارالعى جاساۋى سياقتى ءداستۇردىڭ بەرىك ورنىعۋى بۇل مەرەكەلەردى حالىققا بارىنشا جاقىنداتقانى ءمالىم. جاڭا جىلدان ءاربىر بالا توسىن جاڭالىقتار كۇتەدى. ناۋرىزدا دا بالالاردىڭ ەسىندە قالاتىنداي مەرەكە سىيلاعانىمىز ءجون.
سوندا عانا ناۋرىز ۇلى مەرەكەگە اينالماق.
ناۋرىز كانيكۋلى
مىسالى، كۇنتىزبەلىك جاڭا جىل – 1 قاڭتار ءوزىنىڭ مىقتى يدەولوگياسىمەن، سان الۋان بەلگىلەرىمەن وتباسىلىق مەرەكەگە اينالعانى ءمالىم. بۇل ورايدا، ستۋدەنتتەر مەن وقۋشىلاردىڭ ۇلتتىق مەيرامدى وتباسىندا، جاقىندارىنىڭ جانىندا قارسى الۋعا مۇمكىندىك تۋعىزۋ ماقساتىندا 14-23 ناۋرىز ارالىعىندا (10 كۇن) ناۋرىز كانيكۋلى بەلگىلەنۋى ءتيىس.
باسىمدىعى:
- مەكتەپ وقۋشىلارىنىڭ 24 ناۋرىز بەن 1 ءساۋىر ارالىعىنداعى ءىىى-توقسان كانيكۋلى ون كۇنگە جىلجيدى;
- بالالار ناۋرىز مەيرامىن وتباسىمەن، اعايىن-تۋمالارىمەن قارسى الادى;
- توقسان ارالىق كانيكۋلداردىڭ اراسىندا جيىلىك تەپە-تەڭدىگىنىڭ ساقتالۋىنا مۇمكىندىك تۋادى.
كانيكۋلدار اراسىنداعى جيىلىك
| قازىرگى كەستە | ||
| ءىىى توقسان | ءىV توقسان | |
| 10 قاڭتار مەن 24 ناۋرىز | 1 ءساۋىر مەن 24 مامىر | |
| 2 اي 14 كۇن | 1 اي 24 كۇن | |
| 74 كۇن | 54 كۇن | |
| جاڭا نۇسقا | ||
| ءىىى توقسان | ءىV توقسان | |
| 10 قاڭتار مەن 14 ناۋرىز | 24 ناۋرىز بەن 24 مامىر | |
| 2 اي 4 كۇن | 2 اي 1 كۇن | |
| 64 كۇن | 61 كۇن | |
قورىتا ايتقاندا، بۇلدىرشىندەرىمىزدىڭ كورىسۋ مەرەكەسىن كىشكەنتايىنان تۋعاندارىمەن بىرگە تويلاپ، كورىپ ءوسۋىنىڭ تاربيەلىك ءمانى زور. ەنەرگيا الماسۋ پروتسەسى كەزىندە اعزا جاڭا كۇش-قۋاتقا يە بولادى.
ناۋرىز نىشانى
قىزعالداق ناۋرىزدىڭ اتريبۋتتىق بەلگىسى، ەمبلەماسى رەتىندە بەكىتۋدى قاجەت ەتەدى.
جىلىنا تەك 15 كۇن عانا گۇلدەيتىن قىزعالداق قازاقتىڭ كەڭ بايتاق دالاسىن قىزىل كىلەمگە كومكەرىپ، جازيرالى القاپتى اسقان سۇلۋلىق پەن اسەمدىككە بولەيتىن كوكتەم ماۋسىمىنىڭ ءسانى. ءتول مەرەكەمىزدىڭ سيمۆولى. سۇيىسپەنشىلىكتىڭ، اسىل سەزىم مەن تازا كوڭىلدىڭ بەلگىسى.
مەرەكە كۇنى انالارعا، قىز-كەلىنشەكتەرگە گۇل سىيلاۋ كوڭىلدەرگە قۇشتارلىق، شىنايى شاتتىق سىيلايدى. بۇعان قوسا مەكەمەلەر، كوشەلەر، ساياباقتار قىزعالداق گۇلىمەن كومكەرىلىپ، اباتتاندىرىلسا نۇر ۇستىنە نۇر. سول ارقىلى ءبىز ەۋروپاعا ەرەكشە قاستەرلەنەتىن قىزعالداقتىڭ تۇپكى وتانى قازاق دالاسى ەكەنىن دە ۇرپاق ساناسىنا سىڭىرە تۇسەر ەدىك.
قىزعالداقتىڭ ەڭ الدىمەن قازاقتىڭ دارحان دالاسىندا ءوسىپ، كەيىننەن جەر جۇزىنە تارالعاندىعىن عالىمدار بۇل كۇندە ناقتى دالەلدەپ وتىر.
جەتىسۋ قورعاندارىنان تابىلعان ب.ز.د. ءىىى-ءىى عع. ساق پاتشالارى مەن كوسەمدەرىنىڭ كيىمدەرىندە كەزدەسەتىن قىزعالداق ءتارىزدى ويۋمەن اشەكەيلەنگەن التىن تىلىكتەر وسىنىڭ ايعاعى.
نيدەرلاندى پاتشايىمى بەاتريكس حانىم قازاقستانعا جاساعان ساپارى كەزىندە: «ۇلى جىبەك جولى عاسىرلار بويى ەۋروپانى ازيامەن بايلانىستىردى. وسى ارقىلى ءبىزدىڭ ەلگە قىزعالداق گۇلى كەلدى... قازاقستاننىڭ دالاسى مەن تاۋلارىندا جايقالىپ وسەتىن بۇل گۇل بۇگىندە بىزدەگى ساۋدادا ەڭ ءوتىمدى ونىمگە اينالدى... سول ءۇشىن ءبىز ءسىزدىڭ ەلگە قارىزدارمىز»، – دەگەن بولاتىن.
قىزعالداق گۇلىن ناۋرىزدىڭ نىشانىنا اينالدىرۋدىڭ تاعى ءبىر باسىم تۇسى – ەكونوميكالىق تارتىمدىلىعىندا.
ماسەلەن، گوللاندىقتاردىڭ قىزعالداقتى ەرەكشە قادىرلەپ، كوبەيتۋىنىڭ نەگىزگى سەبەبى – ولاردىڭ قىزعالداق بيزنەسىن وركەندەتۋىندە ەكەنى بەلگىلى. مەملەكەت ەكونوميكاداعى ىشكى كىرىستىڭ باسىم بولىگىن جىلىنا قىزعالداق ساتۋدان تۇسكەن 500 ميلليون اقش دوللار پايدادان الادى.
وسى ورايدا ناۋرىز مەرەكەسى قارساڭىندا:
- جاڭا جىلدا شىرشانى بەزەندىرىپ قويۋ داستۇرىنەن الشاقتاپ، ونىڭ ورنىنا ۇلىستىڭ ۇلى كۇنى قارساڭىندا ناۋرىز نىشانى رەتىندە قىزعالداقتىڭ كوشىرمەسىن ەلىمىزدىڭ وبلىس، اۋدان ورتالىقتارىندا جانە قالالارىندا ورناتۋدى قولعا الۋ;
- قالا، اۋىل كوشەلەرىن قىزعالداققا نەمەسە قىزعالداق بەينەلەنگەن بانەرلەرگە/سۋرەتتەرگە تولتىرۋ;
- قىزعالداق گۇلىنەن بەزەندىرىلگەن ءتۇرلى كادەسىيلار جاساۋ، ءتىپتى قولىمىزداعى سىيلىق سىيلايتىن پاكەتتەرگە قىزعالداقتىڭ سۋرەتىن بەينەلەۋ;
- كوپشىلىك مەكەمە-كاسىپورىنداردى بەزەندىرۋگە كەڭىنەن قولدانىلىپ جۇرگەن جاساندى گۇل، وسىمدىكتەر ساناتىنا قىزعالداقتى باتىل قوسۋ قاجەت.
ناۋرىز سيمۆوليكاسى
كۇن مەن ءتۇننىڭ تەڭەلۋى - استرونوميالىق كوكتەمنىڭ تۋى. استرونومداردىڭ تىلىمەن ايتار بولساق، بۇل كەزدە كۇننىڭ ورتالىعى ءوز قوزعالىسى بارىسىندا جەر ەكۆاتورىن كەسىپ وتەدى.
عىلىمدا كوكتەم تۋاتىن مەزگىلدى تۇرلىشە شامالاۋ ءادىسى قالىپتاسقان. كۇن قوزعالىسىنا نەگىزدەلگەن ەسەپ بويىنشا ناعىز كوكتەم وسى - كۇن مەن ءتۇننىڭ (21-نەن 22-نە قاراعان ءتۇنى) تەڭەلۋ ءساتى. ءتۇن ورتاسى اۋعاندا جاپپاي جاڭا كۇندى قارسى الۋ ءداستۇرىن تۇلەتكەنىمىز ابزال.
ەلباسى ءوز سوزىندە «حالقىمىز قاشاندا جاڭا جىلدان جاقسىلىق كۇتىپ، كەلەر كۇننەن ءۇمىتىن ۇزبەگەن. بۇگىنىن بولاشاعىمەن بايلانىستىراتىن بار ىزگىلىكتىڭ باستاۋىن يگى نيەتتەن ىزدەگەن. سوندىقتان تىرشىلىك جاڭاراتىن ناۋرىزدا ءار ادام جاقسىلىققا نيەت ەتۋى ءتيىس» دەگەن بولاتىن.
ەندەشە جارىقتىڭ ۇزاراتىن، كۇن نۇرىنىڭ مولىعاتىن جاڭا كۇننەن ۇلكەن دە، كىشى دە جاقسىلىق تىلەيدى.
باسقا حالىقتارعا قاراعاندا، قازاقستان حالقىنىڭ جاڭا جىل – ناۋرىزدى قارسى الۋى وسى قاسيەتىمەن باسىم.
تال ەگۋ
ناۋرىز مەيرامى تەك توي تويلاۋ عانا ەمەس، سونىمەن قاتار جاپپاي تازالىق شارالارىن وتكىزۋ كەرەك. «ءبىر تال كەسسەڭ، ون تال ەك!» دەگەندەي، كوشەت وتىرعىزۋ ناۋقانشىلدىق ەمەس، داستۇرگە اينالعانى ابزال جانە سول ەگىلگەن تالدارعا ايىرىقشا كۇتىم بولسا.
الەۋمەتتىك شارالار
ءدال وسى «ناۋرىز مەيرامى» كۇندەرى اياسىندا ەلىمىزدىڭ ىسكەر ازاماتتارى، مەتسەناتتار، قوعامدىق ۇيىمدار مەن مەكەمەلەر بالالار ۇيلەرىنە، تۇرمىسى تومەن وتباسىلارعا جانە قوعامنىڭ الەۋمەتتىك قورعالماعان توپتارىنا جاردەم جاساپ، قايىرىمدىلىق شارالارىنا كوڭىل بولگەنى ءجون. بۇل يگى ىستە قازاقستاننىڭ بەلسەندى جاستارىنىڭ باسىن بىرىكتىرىپ، ۆولونتەرلار كورپۋسىن ناۋرىزدىڭ جاڭا تۇرپاتتا تويلانۋىنا جۇمىلدىرۋ كەرەك.
ناۋرىزدىڭ رۋحاني مارتەبەسى ارتا ءتۇسۋى ءۇشىن، جىل سايىن قىس ايلارىندا ءداستۇرلى بەرىلەتىن ادەبيەت پەن ونەر سالاسى قايراتكەرلەرىنە ارنالعان ستيپەنديالاردى، «شاپاعات» مەدالiن، «التىن القا»، «كۇمiس القا» ناگرادالارىن تابىس ەتۋ مەرزىمىن ناۋرىز مەيرامىنا اۋىستىرعان ابزال.
ۇلتتىق كيىم
سونداي-اق، ناۋرىزعا ابدەن جاتتاندى بولعان شاپان مەن كامزولدىڭ ورنىنا، وسىنداي قاسيەتتى دە ەرەكشە كۇندەرى اركىم وزىنە جاراساتىنداي، ءسان-سالتاناتىمەن، ماقتانىشپەن كيەتىندەي قازىرگى زامانعى ۇلتتىق كيىم ۇلگىلەرىن تىكتىرگەنى ابزال جانە ناۋرىز مەرەكەسىن بارشا قازاقستاندىق سول ۇلتتىق كيىممەن قارسى السا، نۇر ۇستىنە نۇر بولار ەدى!
سونىمەن، گۇل سىيلاۋ ءۇردىسى، ۇلتتىق تاعامنىڭ ىقشامدالعان ۇلگىسىن ازىرلەۋ، كرەاتيۆتى كيىم ۇلگىلەرىنە سۇرانىس تۋعىزۋ، ناۋرىز بەلگىلەرىن ايشىقتايتىن كادەسىيلار، سۋۆەنيرلەر جاساۋ – ءبارى اينالىپ كەلگەندە، ىسىراپقا ەمەس، كەرىسىنشە ەكونوميكامىزدىڭ دا قوزعاۋشى كۇشتەرىنىڭ بىرىنە اينالادى.
قىرىقتىڭ ءبىرى – قىدىر
قىدىر بابا (قىزىر) بار جاقسىلىقتىڭ، مولشىلىق پەن بەرەكەنىڭ يەسى، ءۇمىتتىڭ شىراعىن جاعاتىن كيە. “قىرىقتىڭ ءبىرى - قىدىر” ءسوزىنىڭ استارىنان وسىنداي تۇسىنىكتەن تۋىنداعان مورالدىق فاكتوردى كورەمىز.
ادەتتە، ءبىز قىدىر بابانى كوبىنەسە كوپشىلىكتىڭ الدىنا شىعارىپ، اق تىلەك ايتقىزىپ، اق باتا بەرگىزەمىز دە، ودان ءارى ونىڭ قيالدى ۇشتاي تۇسەتىن مۇمكىندىگىن ەسكەرمەيمىز.
ەندەشە، قىدىر بابانى ناۋرىز مەيرامىن وتكىزۋ بارىسىندا ۇتىمدى پايدالانعان ابزال. ايتالىق، ول جۇرتقا باتا بەرۋمەن عانا شەكتەلمەي، سىيلىقتار دا ۇلەستىرەتىن بولسا. اسىرەسە، قىدىر اتانىڭ مەيىرىمى بۇلدىرشىندەر كوڭىلىمەن ۇشتاسسا، مەرەكەنىڭ ءمانى مەن ءسانى ارتا تۇسەدى.
ءماشھۇر-ءجۇسىپ كوپەەۆ ناۋرىز مەرەكەسى جايلى: «قازاقتا ناۋرىز دەگەن كىسى اتى بولعان. كەلىندەر ونىڭ ەسىمىن اتاي الماي «ۇلى كۇن»، «ۇلىستىڭ ۇلى كۇنى» دەپ اتاپ كەتكەن دەيدى.
وسى رەتتە، قىدىر بابانى بۇلدىرشىندەر اياز اتانى كۇتكەندەي كۇتىپ، ول كەلگەندە «ۇلى كۇن»، قىدىر بابا كەلدى دەپ قۋاناتىنداي دارەجەدە بولۋى ءتيىس.
ءوز كەزەگىندە قىدىر بابا باتاسى مەن سىيلىعىن بەرىپ، بالالاردى ويلاندىراتىن وسيەت، اڭىز-اڭگىمەلەر ايتقانى ابزال.
ەلىمىزدىڭ باتىس وڭىرلەرىندە ناۋرىز مەيرامىنا الدىن الا ۇلكەن دايىندىقتار جاسالادى. 14 ناۋرىز كۇنى تاڭعى ساعات 6-دان باستاپ جۇرتتىڭ ءبارى ءۇي-ءۇيدى جاعالاپ كورىسەدى.
«كىم ەرتە تۇرىپ، 40 ۇيگە كىرىپ، كورىسەتىن بولسا، سوعان قىدىر بابا نەسىبەسىن بەرەدى»دەگەن دە ءسوز بار. سول نەسىبەنى الىپ قالۋ ءۇشىن كىشكەنتاي بۇلدىرشىندەر تاڭ اتپاي ەرتە تۇرىپ، ءۇي-ۇيگە جۇگىرىپ، اتا-اجەلەرگە بارىپ كورىسەتىن. ۇلكەن ادامدار «بۇگىن كورىسۋگە ادامدار كەلەدى» دەپ، ءۇيىنىڭ اينالاسىن، ءىشىن تازالاپ، ادەمى كيىمدەر كيىپ، كۇتىپ وتىرادى.
سپورتتىق شارالار
ناۋرىز مەيرامى اياسىندا مەملەكەتتىك دەڭگەيدەگى ءداستۇرلى مادەني جانە سپورتتىق ءىس-شارالار ۇيىمداستىرۋدى جانداندىرۋ كەرەك. سونداي-اق، بۇقارالىق سپورتتى جانە حالىقتىق داستۇرلەردى ناسيحاتتاۋ ماقساتىندا، ۆەلوشەرۋ، مارافون سەكىلدى بۇكىل حالىقتىق سيپاتى بار سپورت سايىستارىمەن قاتار ۇلتتىق ويىنداردان جىل سايىنعى رەسپۋبليكالىق «ناۋرىز» سپارتاكياداسىن ۇيىمداستىرۋدى ۇسىنامىز.
ناۋرىزدى ناسيحاتتاۋ
باق پەن الەۋمەتتىك جەلى مۇمكىندىكتەرىن پايدالانۋعا ايرىقشا نازار اۋدارعانىمىز ابزال. بارلىق بۇقارالىق اقپارات قۇرالدارى ناۋرىز مەيرامىن تويلاۋ بارىسىندا وتكىزىلىپ جاتقان شارالاردىڭ تانىمدىق جانە مازمۇندىق جاعىنا ءمان بەرسە.
ناۋرىز يدەياسىن ناسيحاتتاۋ بارىسىندا ايماقتار اراسىندا تەلەكوپىرلەر وتكىزۋ، تەلەمارافوندار مەن تاقىرىپتىق باعدارلامالار، اقپاراتتىڭ باسقا دا فورمالارىن ۇيىمداستىرۋدىڭ ماڭىزى زور.
جوعارىدا ايتىلعانداردى قورىتىندىلاساق، ەجەلگى ناۋرىز مەيرامى قازىرگى زامانعا بەيىمدەلىپ، قوعامدا ساياسي تۇراقتىلىقتى، دوستىق پەن كەلىسىمدى نىعايتۋدىڭ، جالپى قازاقستاندىق، وتباسىلىق مەرەكەنىڭ تەتىگىنە اينالىپ، ەلىمىزدى تۇتاس قامتيدى.
ارىستانبەك مۇحامەديۇلى،
قازاقستاننىڭ ەڭبەك سىڭىرگەن قايراتكەرى،
پروفەسسور، ونەرتانۋ دوكتورى
Abai.kz
