قازاقستان حالقىنىڭ بىرلىگى كۇنى قاراعاندى وبلىسىنىڭ بارلىق وڭىرىندە كەڭ كولەمدە اتالىپ وتۋدە. وڭىردە جۇزدەن استام ەتنوس وكىلدەرى تاتۋ-ءتاتتى ءومىر ءسۇرىپ كەلەدى، سونداي-اق 60-قا جۋىق ەتنومادەني بىرلەستىك جۇمىس ىستەيدى. مەرەكەلىك باعدارلامانىڭ باستى وزەگى – ارالۋاندىققا قاراماستان بىرلىكتىڭ بەرىك بولۋىندا. ساحنالاردا ءتۇرلى حالىقتاردىڭ شىعارماشىلىعىنان قۇرالعان جارقىن كورىنىستەر ۇسىنىلىپ، بۇل قازاقستاندىق قوعامنىڭ بايلىعى مەن بىرەگەيلىگىن ايشىقتاي ءتۇستى.

قاراعاندى قالاسىنداعى نەگىزگى مەرەكەلىك ءىس-شارالار ورتالىق ساياباقتا وتۋدە. مەرەكە «بىرلىك — ەل تىرەگى» اتتى كونتسەرتتىك باعدارلامامەن اشىلدى. ساحنادا جەرگىلىكتى كوركەمونەرپازدار ۇجىمدارى مەن ارنايى شاقىرىلعان ونەرپازدار ونەر كورسەتتى.

كۇن رايى دا مەرەكەگە ەرەكشە جىلۋلىق سىيلادى. شۋاقتى كوڭىل كۇي ساحنادان دا سەزىلدى. «ناز» مەملەكەتتىك بي تەاترى «عاجايىپ الەم» بالالار انسامبلىمەن بىرگە «دوستىق» كومپوزيتسياسىن ورىندادى.

بۇل قويىلىم ءار كەزەڭدە جولعا جارىق سىيلاپ، جۇرەكتەرگە جىلۋ ۇيالاتاتىن كۇننىڭ نىشانىنا اينالدى.

اسەم كوستيۋمدەر، ۇلتتىق اۋەندەر مەن حورەوگرافيا حالىق ونەرىنىڭ جاندى موزايكاسىن قالىپتاستىردى.

— بۇل مەرەكەنىڭ ءمانى ەرەكشە ءارى كيەلى. سەبەبى ول حالقىمىزدىڭ ىرگەلى ءارى جاسامپاز قۇندىلىقتارىن دارىپتەيدى. وڭىرىمىزدە ونداعان ەتنوس وكىلدەرى دوستىق پەن كەلىسىمدە ءومىر ءسۇرىپ، ادىلەتتى قازاقستاننىڭ «ءبىز ءارتۇرلىمىز، بىراق ءبارىمىز تەڭبىز» قاعيداتىن جۇزەگە اسىرىپ كەلەدى. ءبىزدىڭ جەتىستىكتەرىمىز — ورتاق ەڭبەك، ءوزارا تۇسىنىستىك پەن ءبىر-بىرىمىزگە دەگەن قۇرمەتتىڭ ناتيجەسى. بۇگىندە مەرەكەلىك شارالار وبلىستىڭ بارلىق اۋماعىندا ءوتىپ جاتىر. ءوڭىر تۇرعىندارى چەللەندجدەرگە، قايىرىمدىلىق اكتسيالارىنا، «تازا قازاقستان» ۇلتتىق جوباسىنا قاتىسۋ ارقىلى وزدەرىنىڭ ۇيىمشىلدىعى مەن بىرلىگىن كورسەتۋدە، — دەپ قاراعاندى وبلىسىنىڭ اكىمى ەرماعانبەت بولەكپاەۆ تۇرعىنداردى مەرەكەمەن قۇتتىقتاپ، بارشاعا بەيبىتشىلىك، سۇيىسپەنشىلىك پەن ءوزارا تۇسىنىستىك تىلەدى.

مەرەكەلىك باعدارلامانىڭ جارقىن قورىتىندىسى رەتىندە ءتۇرلى حالىقتاردىڭ تىلىندە ورىندالعان «تۋعان جەر» كومپوزيتسياسى شىرقالدى. سوڭىندا ونەرپازدار قازاقستان حالقىنىڭ بىرلىگى، بەيبىتشىلىگى مەن دوستىعىن بىلدىرەتىن شاڭىراقتى كوتەردى.

ءىس-شارانىڭ ماڭىزدى بولىكتەرىنىڭ ءبىرى «تازا قازاقستان» فلەشموبى بولدى.

ساياباقتىڭ ورتالىق الاڭىندا حالىق شەبەرلەرى ءوز جۇمىستارىن كوپشىلىك نازارىنا ۇسىندى.

سونداي-اق كورمە اياسىندا شەبەرلىك ساباقتارى ۇيىمداستىرىلدى.

قاراعاندىلىق ساۋلە قاسەنوۆا بۇرىن سپورتپەن اينالىسقان، كەيىن كيىز باسۋ ونەرىن مەڭگەرگەن.

— وڭىرلىك كاسىپكەرلەر پالاتاسىنىڭ حابارلاندىرۋىن كوردىم. بۇعان دەيىن مۇنداي ىسپەن اينالىسىپ كورمەگەن ەدىم. نەمەرەلەرىمە پيما باسىپ كورۋ ءۇشىن تاۋەكەل ەتتىم. تەگىن وقىپ شىقتىم، كەيىن بۇل ءىس مەنى قاتتى قىزىقتىرىپ، ءوز كاسىبىمدى اشتىم. قازىر اسسورتيمەنتىمدى كەڭەيتىپ جاتىرمىن: شاركەي، تاقيا، كارتينالار، كەۋدەشەلەر، ويىنشىقتار جاسايمىن. ەندى ءوزىم دە شەبەرلىك ساباقتارىن وتكىزەمىن، — دەيدى شەبەر.

كونتسەرتتىك باعدارلامالار مەن حالىقتىق سەرۋەندەر وبلىستىڭ بارلىق قالالارى مەن اۋداندارىندا ۇيىمداستىرىلۋدا. قاراعاندى مەن تەمىرتاۋدا قازاقستان حالقىنىڭ بىرلىگى كۇنى اياسىندا بۇقارالىق جۇگىرۋ جارىستارى دا ءوتىپ، تۇرعىنداردىڭ ۇيىمشىلدىعى، توزىمدىلىگى جانە سالاۋاتتى ءومىر سالتىنا بەيىلدىگى ايقىن كورىنىس تاپتى.

Abai.kz