اياق كيىمنىڭ جۇبى تەڭ بولعانىمەن بىردەي ەمەس. وڭىن سول اياعىڭا، سولىن وڭ اياعىڭا تەتىر كيە الاسىڭ با؟ كيە المايسىڭ. كۇشتەپ كيسەڭ اياعىندى اۋىرتىپ، ەكى باسى ەكى باعىتقا قاراپ تۇرادى. بۇلاي ۇزاق ۋاقىت جۇرە دە المايسىڭ. ايەلدەن ەركەك جاساۋ دا سولاي.

ايەل مەن ەركەك تەڭ بە؟ تەڭ! بىراق بىردەي ەمەس.

ارقايسىسىنىڭ ءوز تابيعاتى مەن بولمىسىنا ساي مىنەزى مەن مىندەتى بولۋعا ءتيىس. ايەل بالاسى بالا تاپسا، تابيعاتىنا ساي انالىق مىندەتىن اتقارعانى ەمەس پە؟ ايەل كۇيەۋىنە ءدامدى تاماعىن ۇسىنىپ، كيىمىن جۋىپ، جاعدايىن جاساپ جاتسا، مۇنى كەم بولعانى ءۇشىن ەمەس، ەرىن، بالالارىنىڭ اكەسىن قۇرمەت تۇتقانى ءۇشىن جاسايدى. وتباسى جىلۋىن ارتتىرۋ ءۇشىن ىستەيدى.

ەركەك پەن ايەل ەش ايىرماشىلىقسىز بىردەي بولعاندا، اللا ەركەك-ايەل دەپ ءبولىپ جاتپاي ءبىر عانا جاراتىلىس جاسار ەدى.

ءبىزدىڭ قوعامىمىزدا ايەل بالاسى ءدال بۇگىنگىدەي ەركىن بولعان ەمەس. وقۋىن وقىپ، قالاعانىن كيىپ، باراتىن جەرىنە ەمىن-ەركىن بارىپ ءجۇر. جۇمىس ىستەيمىن دەگەنى جۇمىسىن، جەكە كاسىپپەن اينالىسامىن دەگەنى كاسىبىن دوڭگەلەتۋدە.

تۇرمىستىق زورلىق-زومبىلىقتىڭ الدىن الۋ ءۇشىن ارنايى زاڭ بار. زورلىق كورگەن ايەل كىسىلەر تەلەفون شالىپ، دابىل قاقسىن. سوتقا بەرسىن. زاڭ جۇمىس ىستەمەسە، سونى كوتەرسىن. ال تۇرمىستىق زورلىق-زومبىلىقتى سىلتاۋراتىپ، “جاتىرىم وزىمدىكى”، “انا بولۋ مىندەت ەمەس” سەكىلدى تەكسىزدىك پەن ارسىزدىقتى ناسيحاتتاۋ، عاسىرلار بويى جالعاسىپ كەلە جاتقان وتباسى قۇندىلىقتارىنا شابۋىل جاساۋ قازاقتىڭ بولاشاعىنا بالتا شابۋ.

قوعامىمىزدا ايەلىن ادام قۇرلى كورمەيتىن، بولماشى نارسەگە بولا كوك-الا ەتىپ سابايتىن، كەز-كەلگەن جاعدايدا ايەلدى كىنالى ەتىپ شىعاراتىن ەركەكتەر دە، كەلىنىن كۇڭ سەكىلدى كورەتىن ەنەلەر دە بار. ونى جوققا شىعارا المايمىز. وسىنداي ناداندىقپەن اعارتۋشىلىق ارقىلى، زاڭنىڭ اياسىندا كۇرەسۋىمىز كەرەك. بىراق بۇلارمەن كۇرەسەمىز دەپ، ايەلگە شەكسىز ەركىندىك بەرۋ، نەكەسىز جىنىستىق قاتىناستى مادەنيەت، جەزوكشەلىكتى ادال قۇقىلى ماماندىق ەتۋدى سۇراۋ اداسۋ، قوعامدى بۇزۋ بولماق.

قايرات جولدىبايۇلىنىڭ جازباسى

Abai.kz