نۇر-سۇلتان قالاسىندا قر ىشكى ىستەر مينيسترلىگى مەن ەقىۇ-نىڭ ۇيىمداستىرۋىمەن «قازاقستانداعى قاۋىپسىز قوعامداستىقتار» تاقىرىبىندا فورۋم باستالدى. اتالعان فورۋم  قازاقستانداعى پوليتسيا رەفورماسىن قولداۋ جونىندەگى ەقىۇ (ەۋروپاداعى قاۋىپسىزدىك جانە ىنتىماقتاستىق ۇيىمى) جوباسىنىڭ ءبىر بولىگى بولىپ تابىلادى. 

باستى تاقىرىبى - ەلىمىزدە سەرۆيستىك پوليتسيا قۇرۋدىڭ ەرەكشەلىكتەرى جانە  قازاقستاندا ورنىقتى جانە قاۋىپسىز قوعامداستىقتار قۇرۋ ءۇشىن مەملەكەتتىك ورگانداردىڭ، بيزنەس-قوعامداستىق پەن ازاماتتاردىڭ كۇش-جىگەرىن بىرىكتىرۋ.

فورۋم جۇمىسىن قر ىشكى ىستەر ءمينيسترى، پوليتسيا گەنەرال-لەيتەنانتى ەرلان زامانبەكۇلى تۇرعىمباەۆ اشىپ، قاتىسۋشىلارعا قۇتتىقتاۋ ءسوزىن جولدادى. جيىندا سونداي-اق، ەۋروپاداعى قاۋىپسىزدىك جانە ىنتىماقتاستىق ۇيىمىنىڭ وكىلدەرى، قازاقستاندىق ىشكى ىستەر سالاسىنىڭ وكىلدەرى بايانداما جاساپ، سەرۆيستىك پوليتسيا رەفورماسىنىڭ قىر-سىرىنا توقتالدى. ءتۇرلى ۇسىنىستار مەن ساراپتامالىق ويلار ايتىلدى.

ال، ماقان ەسبولاتوۆ اتىنداعى اكادەميانىڭ باستىعى، پوليتسيا پولكوۆنيگى ايدار مۇتالىكۇلى سايتبەكوۆ «قازىرگى تاڭداعى پوليتسيانىڭ سەرۆيستىك مودەلىنە كوشۋدەگى وزەكتىلىك» تاقىرىبىندا بايانداما جاسادى. باياندامادا «الەمدىك تاجىريبەدە سەرۆيستىك پوليتسيانى قۇرۋداعى نەگىزگى ماقسات – ول الدىن-الا قىلمىستى ەسكەرتۋ جانە زەرتتەۋ، قوعامدىق ءتارتىپتى باقىلاۋ، سونداي-اق قىلمىستى اشۋدان بۇرىن ونىڭ الدىن الۋ، ازاماتتاردىڭ پوليتسياعا ايتقان وتىنىشتەرى بويىنشا ولارعا كومەك كورسەتۋ، قىلمىستى قۇرىقتاۋدان بۇرىن، ونىڭ الدىن الۋ ماڭىزدى»، - دەي كەلە، مەنەدجمەنت كادرلارىن دايارلاۋدىڭ شەتەلدىك ونىڭ ىشىندە ۇلىبريتانيا، رەسەي فەدەراتسياسى سىندى مەملەكەتتەردىڭ تاجىريبەسىن زەردەلەپ، ءىىم الماتى اكادەمياسىندا 2021 جىلدىڭ 29 ناۋرىزىنان باستاپ، ءىىو نىڭ باسشى قۇرامدارىن دايارلاۋعا ارنالعان №1 فاكۋلتەت نەگىزىندە  جوعارى  شەندى باسشى قۇرام مەن №2 ورتا باسشى قۇرامدى وقىتاتىن 3 اي مەرزىمگە ارنالعان كۇندىزگى وقۋ نىسانىمەن باسقارۋ كادرلارىن دايارلاۋداعى باسىم باعىتتاردىڭ ءبىرى – قوعاممەن جۇمىس ىستەۋ تاسىلدەرىن ۇيرەتۋگە باسىم باعىتتا كوڭىل بولىنگەنىن جانە بۇل جۇمىستاردىڭ الداعى ۋاقىتتا دا جالعاسا بەرەتىنىن  ايتتى.

حالىقارالىق دەڭگەيدە ءوتىپ جاتقان فورۋم «سەرۆيستىك پوليتسيا مودەلى» تۇجىرىمداماسىنىڭ باستى يدەياسى نەگىزىندە – قوعاممەن اشىق سەرىكتەستىك قاتىناستاردى قۇرۋ، ادامداردىڭ قاجەتتىلىك قۇندىلىقتارىنا نازار اۋدارۋ سەكىلدى ماسەلەلەرگە دە نازار اۋداردى.

فورۋم جۇمىسى ءالى جالعاسۋدا. ول اياقتالعان سوڭ ءتيىستى قارار قابىلدانادى دەپ كۇتىلۋدە.

Abai.kz