بيىل 2021 جىلى ەلىمىز تاۋەلسىزدىكتىڭ 30 جىلدىعىن اتاپ وتۋىنە وراي رەسپۋبليكالىق ءىس-شارالار قاتارىندا ناۋرىز «قازاقتىڭ ۇلتتىق مادەنيەتى مەن ءداستۇر» ايى رەتىندە بەلگىلەندى.

«ەسىك» قورىق-مۋزەيى مەرەيتويدىڭ مازمۇنىن بايىتۋعا ارنالعان مادەني ءىس-شارالاردى ايدىڭ العاشقى كۇنى «العىس ايتۋ» كۇنىنەن باستاپ كەتتى. ەڭبەكشىقازاق اۋدانىنداعى ەتنو-مادەني ورتالىقتىڭ وكىلدەرى مەرەكەنىڭ ماڭىزدىلىعىن ايتىپ، قازاق ەلىنە العىستارىن ءبىلدىردى. 8 ناۋرىز – حالىقارالىق ايەلدەر مەن قىز-كەلىنشەكتەر مەرەكەسىنە وراي جاڭا ءىس-شارا «قازاقستان ارحەولوگياسىنىڭ قىزعالداقتارى» اتتى جاريالانىمدار توپتاماسى ۇسىنىلۋدا. قورىق-مۋزەي قىزمەتكەرلەرى كەلۋشىلەردى قازاقتىڭ ۇلتتىق كيىمىمەن قارسى الىپ، قازاقي ناقىشتاعى كيىم ۇلگىلەرىن دارىپتەۋدى العا تارتىپ كەلەدى.  سونىمەن قاتار «2021 جىل – بالالار مەن جاسوسپىرىمدەردىڭ كىتاپ وقۋىن قولداۋ جىلى» دەپ جاريالانۋىنا بايلانىستى قر مادەنيەت جانە سپورت مينيسترلىگىنىڭ باستاماسىمەن ەلىمىزدەگى بالالار مەن جاسوسپىرىمدەردىڭ كىتاپ وقۋىن قولداۋعا باعىتتالعان «قازاقستاننىڭ وقىرمان ۇرپاعى – 2021» جالپىۇلتتىق اكتسياسىن جالعاستىرۋ ماقساتىندا «ەسىك» مەملەكەتتىك تاريحي-مادەني قورىق-مۋزەيى ەڭبەكشىقازاق اۋدانى، راحات اۋىلدىق وكرۋگىنىڭ راحات №1 ورتا مەكتەپ وقۋشىلارىنا قورىق-مۋزەي كىتاپحانا قورىنان تۇمانباي مولداعاليەۆ، حاكيم ومار، كوپەن امىربەك سىندى اقىن-جازۋشىلاردىڭ جيىرمادان استام كوركەم ادەبي شىعارمالارى، ورازاقىن اسقاردىڭ  «اقشا تۋرالى اقيقات» اتتى بالالارعا ارنالعان  كىتاپتارىنىڭ 20 داناسىن تارتۋ ەتىپ، كەزدەسۋ وتكىزىپ قايتتى. اتالمىش كەزدەسۋدىڭ باستى ماقساتتارىنىڭ ءبىرى – بالالار مەن جاسوسپىرىمدەردىڭ وقۋ ساۋاتتىلىعىن ارتتىرۋ، زاماناۋي قوعامداعى تابىستى، باسەكەگە قابىلەتتى جانە زاماناۋي قوعامدا ءوزارا ءىس-قيمىل جاساي بىلەتىن تۇلعانى قالىپتاستىرۋ، كىتاپ وقۋ بەلسەندىلىگى مەن كىتاپ وقۋ مادەنيەتىن ارتتىرۋ، كىتاپتىڭ مارتەبەسىن كوتەرۋ جانە وتباسىلىق كىتاپ وقۋ ءداستۇرىن قولداۋ.

كەزدەسۋ بارىسىندا راحات №1 ورتا مەكتەبىنىڭ ديرەكتورى ب.ج. بۋكاەۆا كىتاپ وقۋ جاسوسپىرىمدەرگە وزىندىك اسەر ەتىپ، تۇلعا بولىپ قالىپتاسۋىندا ماڭىزدى ءرول اتقاراتىنىن تىلگە تيەك ەتىپ، قورىق-مۋزەي قىزمەتكەرلەرىنە العىسىن ءبىلدىردى. سىيعا تارتىلعان كىتاپتاردى مەكتەپ كىتاپحاناشىسى د.ا. جانابيلوۆا قابىلداپ، ەتافەتا رەتىندە بۇل ءۇردىس جالعاسىن تاباتىنىن اتاپ ايتتى. تاريح ءپانىنىڭ مۇعالىمى ش. باتىرحان وقۋشىلاردىڭ تاريحىمىزعا، اسىرەسە ساق مادەنيەتىنە دەگەن قىزىعۋشىلىقتارىنىڭ باسىم ەكەندىگىن ايتا كەلە، الداعى ۋاقىتتا «وتكەن ءومىر بۇگىنگى ۇرپاققا ونەگە» اتتى مۋزەيلىك ساباقتاردىڭ جاڭا وقۋ جىلىندا جوسپارعا ەنگىزۋ بويىنشا كەلىسىمشارت جاساۋدى ۇسىندى. سونداي-اق، جاسوسپىرىمدەردىڭ قىزىعۋشىلىعىن ارتتىراتىن كىتاپتار لەگى قاراستىرىلىپ، تالقىلاندى. اقيىق اقىن مۇقاعالي ماقاتاەۆتىڭ 90 جىلدىعىنا وراي اقىننىڭ «تۋعان جەر»، «اتامەكەن»، «وتان» تاقىرىبىنداعى شىعارمالارىن مانەرلەپ وقيتىن بىرنەشە وقۋشىلار ىرىكتەلىپ، قورىق-مۋزەيگە شاقىرتۋ الدى. كەزدەسۋ سوڭىندا، مۋزەي مەن مەكتەپ اراسىنداعى ارىپتەستىكتى كەڭەيتۋ، دوستىق قارىم-قاتىناستى ورناتۋ ماقساتىندا قورىق-مۋزەي قورىنا «تاتۋلىق سيمۆولى» اتتى كادەسىي تارتۋ ەتىلدى.

Abai.kz