سەناتور نۇرجان نۇرسيپاتوۆ قۇقىق قورعاۋ ورگاندارىنداعى قوس ازاماتتىعى بار قىزمەتكەرلەردى جۇمىستان بوساتۋ كەرەك دەپ ەسەپتەيدى. ول ءۇشىن مەملەكەتتىك قىزمەتشىلەردىڭ قوس ازاماتتىعى انىقتالعان جاعدايدا ەڭبەك شارتتارىن بۇزۋ سياقتى زاڭناماعا تۇزەتۋلەر ەنگىزۋ ماڭىزدى.

دەپۋتات ەڭبەك كودەكسى مەن "مەملەكەتتىك قىزمەت تۋرالى" زاڭعا ەنگىزىلگەن تۇزەتۋلەر قۇقىق قورعاۋ ورگاندارىنىڭ قىزمەتكەرلەرىنە قولدانىلمايتىنىن اتاپ ءوتتى. ولاردىڭ سالالىق زاڭدارىندا مۇنداي نورمالار مۇلدەم جوق.

- بىزدىڭشە، قابىلدانعان شارالار ودان ءارى جۇيەلى جانە دايەكتى دامىتۋدى قاجەت ەتەدى. سونىمەن قاتار، ەلىمىزدىڭ قۇقىق قورعاۋ قىزمەتى تۋرالى، اسكەري قىزمەت جانە اسكەري قىزمەتشىلەردىڭ مارتەبەسى، ارناۋلى مەملەكەتتىك ورگاندارى تۋرالى سالالىق زاڭداردا شەت مەملەكەتتىڭ ازاماتتىعى قىزمەتتەن شىعارۋ ءۇشىن دەربەس نەگىز رەتىندە قارالمايدى، - دەدى نۇرجان نۇرسيپاتوۆ.

سەناتور سونىمەن قاتار بۇل بولىمدەگى زاڭنامالىق نورمالار الدىن-الۋ بولۋى كەرەك دەپ سانايدى. ياعني، قۇقىق قورعاۋ ورگاندارىنىڭ قىزمەتكەرلەرى ازاماتتىقتان شىعۋ فاكتىسى بويىنشا ەمەس، ولاردىڭ وزدەرى، جۇبايلارى نەمەسە جاقىن تۋىستارىنىڭ وسىنداي نيەت بىلدىرگەن كەزدەن باستاپ ءوز باسشىلىعىن حاباردار ەتۋى ءتيىس.

Abai.kz