قازاقتىڭ ازدىعىنان كۇن قۇرعاتپاي زارداپ شەگىپ وتىرمىز. قر پارلامەنتى ءماجىلىسى دەپۋتاتى قازىبەك يسا پارلامەنتتە قانداستار كوشىنىڭ ىركىلۋىنە وراي جانە سول كوشتىڭ جولىن اشۋدىڭ باعىتىن كورسەتەتىن وتە وزەكتى ماسەلە كوتەردى. قازاق كوشىنىڭ توقتاپ قالۋىنا ءبىر شولاق شەنەۋنىك كاسىپكەر «جاڭاوزەن وقيعاسىن جاساعان ورالماندار» دەگەن جالعىز اۋىز ءسوزى توسقاۋىل بولعان. قانداستارعا 4 جىلعا دەيىن ازاماتتىق بەرمەۋ تۋرالى شەشىم قازاققا قارسى قابىلدانعان شەشىم بولدى. ول سولاقاي شەشىمدى جوندەگەنشە ءبىراز جىلدار ءوتتى. ەندى بۇگىندە كوشىپ كەلۋشىلەر لەگى ەڭ تومەنگى دەڭگەيگە ءتۇستى. بۇل سوراقىلىق قازاق كوشىنە تۇساۋ بولدى.

ەندى بۇگىن سول سول سوراقىلىق زاردابىن جوندەۋ ءۇشىن ءبىر پارمەندى شەشىم كەرەك. ول – شەتەل قازاقتارىنا كەلگەن بەتتە ازاماتتىق بەرۋ. ازاماتتىعى جوق قانداستاردىڭ قانداي قيىندىققا ۇرىنىپ جاتقانىن كورىپ وتىرمىز اقپارات قۇرالدارىنان.

شىندىعىن ايتساق، ازاماتتىعى جوق ادامنىڭ قازاقستاندا كۇن كورۋگە مۇمكىندىگى جوق. ولار قاڭعىپ قالادى. ەندەشە ازاماتتىق ولارعا قازاقستان شەكاراسىن اتتاعان بويدا بەرىلۋى كەرەك. يزرايل سويتەدى. ونسىز ولاردى شاقىرۋ وبال جاساۋمەن بىردەي. ال ءوزىمىز بولساق قازاقتىڭ ازدىعىنان كۇن قۇرعاتپاي زارداپ شەگىپ وتىرعان حالىقپىز.

ەندەشە كوشتىڭ اياعىنا تۇساۋ بولىپ وتىرعان كەلەڭسىزدىكتەن قۇتىلۋ كەرەك!

سماعۇل ەلۋبايدىڭ جازباسى

Abai.kz